自修室，學界既蘭桂坊: 8
短短呢兩日就發生咗咁多事，我由一個剩係識打機嘅毒撚，到識到一個女仔，仲同佢發展曖昧，老實講我仲未適應到。
然後第二日，本來十年都唔震一次嘅手機，依家改為每三分鍾就震一次，每震一次，我都驚一驚，一嚟我驚俾老嚴發現，二嚟我又要苦惱點應佢好。
喺一個咁高頻率嘅對話入面，要保持對話嘅質素係非常之難，我唔可以諗太耐至覆佢，但急住覆，覆埋啲廢話，又好易做話題終結者。
唉，溝女難，難過Penta kill呀。
由於成日剩係掛住覆Shirley，都無乜同過肥鈞講嘢，到放學，我就主動搵佢落自修室。
「喂，行啦。再唔行你就坐唔到Venus側邊架啦。」我向肥鈞道。
「唔得住，今日要落一落銅鑼灣先。」
「點解呀？」
「去報補習。」
勢估唔到，肥鈞依家除咗去自修室之外，仲要去埋補習。
「你諗住報咩？」
「英文，報Alex Wong，Venus都係補佢，我諗住報佢嗰堂去撞佢。」
Alex Wong? 哦，成日喺巴士見到嗰條友。
哦…原來搞咁多嘢都係想溝女姐。
係喎，唔知Shirley有冇補習呢，有嘅話，一齊補習，多個機會見都幾好。
我whatsapp佢問佢有冇補習同補邊個，佢話佢同jojo逢星期六會一齊補econ。
唔…等我都報下先，雖然唔係二人世界，但係可以星期六都見到佢，話唔定補完習都可以行下街。
不過，我無帶錢，要返屋企問老母攞。
陪完肥鈞去報補習後，我地就出發去自修室。我呃Shirley話我今日唔嚟，佢打咗個唔開心符號，我地就停止咗對話。
於是我喺樓下買咗盒Melty Kiss，諗住俾個驚喜佢。
上到去自修室，因為我地遲嚟嘅關係，成六點幾，個場都幾FULL，我同肥鈞入去兜咗個圈，只見Shirley，Jojo，Venus佢地雖然都係坐埋一齊，之但係佢地旁邊就坐咗兩個男仔。
我絕對無誇大，嗰兩條仔個頭gel到九樓咁高。
佢地側邊無位，我地唯有搵個望到佢地嘅位嚟坐，而佢地都唔知我地嚟咗。
我同肥鈞無得坐喺Shirley同Venus側邊，自然無哂心情，我就拎本書出嚟然後坐喺度發夢，肥鈞就繼續金晴火眼咁監視住嗰兩條仔。
我發發下夢，突然左邊有人拍一拍我膊頭。
「喂，又見到你，咁啱嘅!」
屌你個thomas，你仲好意思出現。
無錯，當日拆穿我係隻車厘龜嗰位小學同學又再出現。
「喂，hello，又見到你。」我忍住心入面道火，勉強咁擠出一個好西嘅笑容。
啪一聲，左邊拍完我又到右邊，今次係肥鈞。
佢係咁示意我去望Shirley嗰邊。
仆你個街!!!我一望到火都嚟埋。
嗰兩個GEL頭怪，哄到去Shirley同Venus度埋一埋，個頭直頭過埋過隔離位。
次次講嘢都要哄到去個耳仔埋一埋。
我望到嗰兩條友個側面，靚係幾靚仔，但係一副淫相露哂出嚟，正宗mk相!
「嘩，St.lou雙麒麟又出動啦原來。」Thomas道。
「St.lou雙麒麟!?」我同肥鈞異口同聲。
「乜你地唔知咩，佢地喺呢度起哂朵啦，個頭gel到成隻麒麟咁架ma，佢地今年repeat架，不過佢地係幾型嘅，上年佢地已經喺度食咗唔少女架啦，原來依家又再出嚟搵食。」
照咁講，佢地咪姐係睇中咗Shirley同Venus!?
唔係喎，repeat...姐係大我地一年，唔通佢就係Shirley男朋友?
今次仆街了。
佢地MK係MK，不過如果將我同肥鈞拍埋佢地兩個度，真係拍馬都追唔上。
就好似要我地同Angus爭女一樣，輸鳩緊。
正所謂知己知彼，百戰百勝。我決定起起佢地兩個底先。
「喂Thomas，你仲知佢地幾多嘢，講嚟聽下呀。」
「哈哈，我都唔係知好多架喳，好似話左邊嗰個就叫Andy，右邊嗰個就叫Marco。」
咁姐係我嘅敵人係Andy，肥鈞嘅敵人係Marco。
我望住Andy，睇到火都嚟，不過此時此刻，我反而發覺到一樣好有趣嘅事。
一個對稱嘅畫面。
Andy，Shirley，Jojo，Venus，Marco。
雖然佢地背住我，但我都feel 到Jojo俾兩pair人咁樣夾住，應該幾灰。
我同Jojo都算有啲交情，心血來潮，一方面想串下佢，但最主要嘅係想激下Shirley，俾佢知道我嘅存在。
我喺盒Melty kiss上面貼咗張memo紙，上面寫住「陰公豬」，然後行去Jojo個位度放低。
走嘅時候，我仲特登繞去佢地前面，等佢地成行都見到我。
我插住褲袋，戴住耳筒，頭也不回，保證喺呢個示威mode中嘅我，係最型嘅我。
然後，我走咗去廁所洗面。
因為我好緊張，毒撚要扮型係需要用好多氣力同埋心力。
去完廁所洗洗個面之後，我就行返入去。
我繼續插住褲袋，昂到個頭有咁高得咁高，今次我終於可以望清楚哂佢地個樣。
我望到，肥鈞竟然走咗去Jojo個位度坐，佢同Venus，Marco形成一個嬲字，相信Venus夾喺佢地兩個中間一定好難頂。
喺Shirley側邊嗰個Andy，好面善，好似唔知喺邊度見過。
我好努力咁回想，明明我應該呢幾日見過佢，仲要係喺自修室見到。
我認得佢套校服…認得佢副眼鏡…
呀屌!!就係我當日喺自修室後樓梯見到嗰條仔!!
仆街….
唔通…當日喺後樓梯同佢打茄輪嗰個，就係Shirley!?
當日，因為佢地打緊茄輪，個女仔背住我，我望唔清楚個女仔個樣，我只係依稀記得…個女嘅擘大對腳，騎喺條仔上面…條仔嘅隻手不停喺個女嘅個胸附近打轉…
如果…嗰個係Shirley…
媽呀….我唔敢再諗落去啦…
我一臉死灰，走返去自己個位到，我唔敢再望Shirley…因為一望，當日佢地打茄輪嘅畫面就不停地呈現喺我眼前。
話唔定…比起喺後樓梯打茄輪，更污穢嘅嘢可能已經喺第二度做咗…