自修室，學界既蘭桂坊: 7

的士已經去到銅鑼灣海旁，我離遠已經見到Shirley坐咗喺度，就諗住停車行過去。
   「司機大佬喺呢度落得啦。唔該。」我好有禮貌，廢事再刺激到佢。
   「唔得!!」
   「點解!?」
   「我要見到你個朋友先會停車。」
   我無佢咁好氣，唯有指住Shirley叫佢駛過去。
   Shirley又再次M字腳咁坐咗喺度，dup低個頭，呈現麻倉憂嘅姿態。
   當司機大佬見到Shirley嘅時候，我終於見識到咩叫擘大個口得個窿。
   佢完全呆咗，過咗幾秒…





  「青春呀!!!我嘅青春呀!!!」司機大佬再度咆哮。
  我廢鬼事理佢，喺銀包拎錢隊俾佢。
  「今程車唔收你錢﹗」
  「吓？點解？」
  「呢程車我已經得到我想要嘅嘢，死仔，多謝你。」
  此時此刻我已經唔知可以講咩好。
 「我唔理你地朋友又好，兄妹又好，乜鳩都好，你地今晚一定要錫錫，咁我依家走，都走得安落。」
  雖然條友痴痴地線，但佢呢番話，好窩心。
 「好﹗」                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                       
 





  的士已經駛遠。
  我望住坐咗喺度粒聲唔出嘅Shirley，有啲無從入手。唯有坐喺佢側邊唔出聲。
  究竟佢搞咩？
  過咗兩分鍾，Shirley率先開腔。
 「你專登搭的士嚟架？」
 「err…係嘅。」我緊係老閪都唔講其實係因為我唔識嚟。
 「你真係好好。」Shirley輕聲道。
 
  你真係好好。





   呢句說話，唔知點解好似有種神奇嘅魔力，令到我嘅男性賀爾蒙急速上升。加上頭先個含春的士佬嗰番說話。
 
  我已經無嘢好驚。

  我無講嘢，只係一手搭落Shirley隻手臂，輕輕力將佢哄落自己身軀度。
  佢無反抗，仲慢慢挨落我個膊頭度，左手放喺我大脾上面，呢一刻，我感受到嘅唔係佢手臂嘅柔軟，唔係佢頭髮嗰浸香味，都唔係佢身上嘅暖意。

  而係，我又再次扯到行一行，好撚辛苦。


  「你地今晚一定要錫錫!!!」
  「你地今晚一定要錫錫!!!」
  「你地今晚一定要錫錫!!!」
   含春的士佬嗰種絕望又帶點猥瑣嘅咆哮不停喺我腦海中徘徊，我依家思緒好亂，一方面今次係我第一次咁樣攬住一個女仔，另一方面，其實我對呢個女仔一無所知。




 
 
「其實我有男朋友，你知唔知？」Shirley道。

屌…
「唔知…」
「但係其實我同佢好疏，我都唔係好鍾意佢。」
「唔鍾意點解又會一齊嘅？」呢個係我打從心底裡嘅問題，唔鍾意點解又會一齊呢？
「我都唔知…我想同佢分手。」

  啱呀，呢句先係人話嚟架嘛。
「佢對你好差架？」我嘗試問啲誘導性嘅問題，廢事俾佢知道我都想佢地分手。
「同佢行街拍拖，佢成日都多手多腳，借啲意摸我，又成日帶我去啲少人嘅地方，又乘機想親熱，我好唔鍾意咁樣。」

  講真，俾著我係你男朋友，我都想搞你啦。




「咁又真係幾仆街…」
「喂，你講粗口架？」
仆街，唔俾講架咩。
「Err…咁佢係仆街呀嘛，我幫你鬧佢渣。」
 
 聽到我咁講，Shirley又再次嫣然一笑，個頭哄得更加埋我個身度。
「所以我都話車厘龜係最好。」
「其實我有名架。我叫呀楠。」我嬲嬲地。
「哈哈，藍龜，你係咪藍貓個frd？」

 好爛，一啲都唔好笑。
 但係Shirley就係咁笑，佢笑得好甜。
 嬲唔落。

「多謝你呀，藍龜，我依家無唔開心啦。」




「咁你諗住同你男朋友點呀?」
Shirley聽到我咁問，扁一扁咀。
頂，睇嚟我唔應該提返起佢男朋友，個人心急，出事。

「佢遲下一定仆街，我話你知﹗」

  就係咁，我地就一路傾計傾到十一點，讀咩科，平時有咩做，鍾意食乜嘢，住喺邊，乜都傾。
  原來，我同佢一樣都係讀Econ，geog。
  原來，我同佢一樣都唔食紅蘿蔔。
  原來，我同佢一樣都係怕凍架。
  海旁零舍凍，佢就捉得我愈實，我就愈暖。

  去到咁夜，佢又住小西灣，無乜車搭，我就提議搭的士。
  就講就到，眼前一架的士慢慢咁駛過嚟。
「又會咁好彩嘅，一話搭的士就有車。」Shirley笑道。





  我有種不詳嘅預感。
  一上到車。
「兩位去邊呀？」
 
 望一望個司機倒後鏡，果然係個痴線的士佬。
 我極度懷疑頭先佢一路無駛走，喺度捕住我地兩個。

「小西灣呀唔該。」我扮唔識佢。
「好嘅。」從倒後鏡中，我望到佢露出一絲淫笑。
Shirley乜都唔知，繼續挨喺我身邊，可能因為都夜，佢恰著咗。
 
 我見佢瞓著咗，就開始同個痴線的士佬進行眼神交流。
 我用一個帶點仇視又兇狠嘅眼神睥住佢，分明就唔妥佢跟蹤我地架啦。
 點知個的士佬不以為然，對眼變到兩個桃哈多咁嘅款，個咀仲要嘟起哂，啜啜聲。
  「你地今晚一定要錫錫!!!」
  「你地今晚一定要錫錫!!!」
  「你地今晚一定要錫錫!!!」

  呢句說話又再一次浮現喺我腦海。
  目標仲未達成，我仲未錫到佢。
  我望住沉睡中嘅Shirley，佢白滑嘅面珠…我個咀都慢慢同的士佬一樣，嘟起咗。
  我慢慢…慢慢咁哄埋去。
  的士佬個頭慢慢…慢慢咁愈擰愈過，就嚟拎轉哂成個頭。
 
我慢慢…慢慢咁哄埋去……
  啜~~~~~~~~~~~啜~~~~~~~~~~~
  嘶~~~~~~~~~~~~~~~~~~~~~~~
  睇住呀~~~~~~~~~~~~~~~~~﹗﹗﹗﹗

  嘩屌嚇撚死我，架的士無啦啦九十度飄移，煞車聲如雷貫耳。
  個的士佬掛住望我，無睇到前面，點知突然要轉彎，就炒咗。
 「咩事呀﹗？」Shirley即刻醒咗。
 「對唔住呀，香港腳發作。」的士佬拎轉頭。
 「妖，用愛膚堅啦。」我怒道。
 
 「好彩，大家都無事。」Shirley回過神，安慰返我轉頭。
 
  睇嚟佢feel唔到，我頭先鍚咗佢一啖。
 「sorle sorle，最多呢程車我唔收你地錢啦。」個痴線的士佬又玩呢招，睇嚟佢又得到咗佢想要嘅嘢。
  我發誓我以後唔會再立亂搭的士!!!

  送完Shirley返屋企，回程嘅時侯，我不斷咁回味當我嘴唇觸碰到佢塊面嗰一刻，佢嘅肌膚係幾咁嫩滑，係唔需要用愛膚堅嘅。
  返到屋企，收到佢嘅whatsapp。
 
 「多謝你陪我呀，又送我返屋企，我好感動。你返到屋企未呀，快啲瞓教啦，唔係聽日返學唔知醒呀。」

今晚應該好好瞓，因為我覺得，我戀愛了。