自修室，學界既蘭桂坊: 3
第二日放學，肥鈞照舊搵埋我去自修室。等緊車其間，我突然醒起。
「喂肥鈞，你唔係話你約咗個人幫你溝女架咩?」
「係，我約咗佢喺度等，應該就到。」
話口未完，就有個人搭肥鈞膊頭，我一拎轉面。
嘩…簡直係男神。如果夾硬要我形容佢嘅話，應該係洪卓立托世。
我地互相自我介紹，佢叫Angus。
上到車，佢就主動同肥鈞傾。
「點呀肥鈞，想我點幫你?」
「我唔知點樣去識佢，我同佢一啲關聯都無，我驚突然走去識佢會嚇親人。」肥鈞一講到女，就霸氣盡失。
Angus聽到之後，笑咗笑。
「你同你呀哥真係一模一樣，咩都驚一餐。」
「其實啲女去自修室，你估佢地真係全程溫書?你唔覺佢地成日去廁所嘅咩?」Angus續道。
講起又好似係，仲以為佢地尿頻。
「佢地行嚟行去都係想吸引人注意力，咪又係想俾人溝，自修室俾到佢地嘅好處就係最易識到人。咁多女校，你估佢地成日對住本書唔悶，唔想識下仔?佢驚你地唔去識佢添呀。」
講完Angus就拎轉佢個背囊，上面掛住好多校章。
「當年我同你呀哥去自修室，當我每次溝到一條女，我都會問佢地拎個校章，佢地嗰陣唔知咩事，但係對於我嚟講，係一種紀念。」
「嘩…」我同肥鈞完全係擘大個口得個窿。個背囊上面大大話話有成十幾個校章，姐係十幾條女…
「自修室根本就係溝女聖地，你地唔好好珍惜呢一年就徒哂，溝唔到女嗰陣咪真係溫書囉，你地根本無嘢好輸。」
雖然一睇就知呢個Angus係食家MK格，不過佢講嘅嘢又好似有啲道理。
我係咪都應該試下溝返條女?
麻倉憂，點睇? 好似唔錯。
去到自修室，Angus問完肥鈞希志坐喺邊之後，叫我地企喺外面等，自己就行入去兜咗個圈。
當佢出返嚟就同我地講，叫我地入去坐喺佢地對面，佢要去準備啲嘢。
其實坐喺佢地對面，我同肥鈞都有啲驚，特別係當麻倉憂又用佢嗰種若有若無嘅仆街眼神望住我，搞到我好唔自在。
過咗五分鐘，Angus返到嚟，俾咗盒朱古力肥鈞。
「肥鈞，將盒朱古力掉過去，你就識到佢。」
我見到盒朱古力上面，寫住「hi~請你食朱古力<3」
其實句嘢無乜問題，但係個心心我真係接受唔到。
「真…真係要咁做?」我相信肥鈞同我嘅諗法一樣。
「心心呢啲嘢對女仔嚟講好閒架咋，信我。」Angus充滿自信咁講。
我望住肥鈞，佢拎住盒朱古力掙扎咗好耐，結果都係一嘢掉咗去對面，掉完之後，佢紅都面哂，即刻扒底。
等咗一陣，對面都仲係無反應。
仆街，無啦，肥鈞無啦今次。
我喺度諗，呢啲招數，Angus用就話掂姐，依家呢個係肥鈞呀，實俾人當變態佬啦陰公。
肥鈞依家仲係扒喺度，唔敢向上望，我諗佢呢一刻真係想捐返入老母個西度，當無出過世。
「肥鈞你都係跟我返去ione打機算鳩數啦。」我細細聲喺佢側邊講。
點知，喺呢個時候，對面掉咗張memo紙過嚟。
「多謝呀!」仲有個笑笑樣，應該係希志講。
Angus即刻拎起，隊俾肥鈞睇。
「嗱，我都話掂架啦，食住上啦。」
肥鈞即刻由佢老母個西度突返個頭出嚟，睇嚟佢自己都估唔到真係掂。
「咁依家應該點呀Angus。」喺呢一刻嘅我仲緊張過肥鈞。
屌，咁撚唔要面嘅嘢，偏偏啲女就buy，我真係見識少。
「依家緊係認識咗對方先，然後打開話題。」Angus拎起支筆寫。
「我叫呀鈞呀，你叫咩名呀?」
「哈哈，我叫Venus呀。」
Angus一路幫住肥鈞同Venus傾計，好快就知道咗佢全名，叫張雅蔚。
佢地溝緊女，坐喺一邊嘅我無嘢做，唯有上fb search下Venus cheung。
搵咗一陣，我就搵到希志個樣，仲要無private到。
我噤入去諗住J下佢啲相，一睇，全部都有埋麻倉憂同埋麻美。
原來，麻倉憂叫Shirley，麻美叫Jojo 。
本能反應下我噤咗入去Shirley個fb，佢張propic係佢著住套校服M字腳咁坐喺地下度，有睇過麻倉憂套野球拳嘅話應該幻想到，之不過佢就private咗fb。
要知道private咗嘅fb你點噤佢張propic都唔會有大圖睇，屌你呀梁國雄議員!咁細點睇呀。
嬲嬲地嘅我用隻手指係咁大大力啪落佢張相度，但都係無反應。
點知一個唔覺意，我大大力啪咗落個張propic下面個add friend掣度…
今次仆街啦!!!!個add friend掣變咗做friend request sent…
我眼都突埋，即刻再噤多次，cancel返佢。
之不過，佢應該都會收到通知…
我扮聽歌行出去去廁所，拎一拎轉頭，見到麻倉憂原來一直喺度玩緊電話…
死啦，咁姐係佢一定睇到有個叫james chan嘅人add佢…
唯一慶幸嘅係我都private咗facebook，而我張propic只係一隻車厘龜。
無啦啦有隻車厘龜add佢姐，何況我已經cancel返，佢應該唔會放喺心度嘅。
我不停咁安慰自己。
喺廁所行返出嚟嗰陣，我撞到麻倉憂同麻美，佢地一路有講有笑，唔知點解，好似喺度笑鳩緊我咁，我掌心出哂汗…
返到埋位，頭先仲係一粒鵪鶉嘅肥鈞依家已經春風滿面，我見到memo紙上面密密麻麻嘅字，睇嚟佢同Venus傾得好開心。
唔通真係有機?
「我覺得自己已經戀愛啦。」肥鈞喺我耳邊細細聲講，得戚到佢呢。
無癮嘅我諗住打開手機玩手機game，點知一開…
Shirley Lee sent u a friend request.