[男籃]一球穿Jump: 第廿回 – 沈睡巨人

我將個界外球開左俾阿傑，再兜過佢身後去罰球線接應。元山好快就對阿傑做左個包夾，好彩阿傑交左個彈地波俾我，時間得番2秒。之前mark阿傑個2個元山球員好似搶錢咁追過黎，再加上原先包我位個個，有三個人埋緊我度。呢個時候我眼尾望到，即刻向佢地撲過黎既相反方向交過去，犀牛已經係零度位三分線等左好耐，佢一接波已經wide open，諗都唔諗就起手。
 
穿針。
 
頭先大叫既同學們呢一刻更瘋狂，好似攞左第一咁。我地追到15:20。
 
第二節一開始，元山進攻，並以一個中距離攞到2分。高佬key住個波上前場，睇黎佢想再用一次頭先個招。但我意識到，俾我地爆左佢2次既Ivan唔會俾我地得手。從佢野獸般既眼神，我感覺到。。。
 
「拍」清脆的一聲，阿傑的上籃已被Ivan完完全全抹了下來。正當阿傑還向球證投訴的時候，元山4個球員已經跑到我地後場。Ivan一個長傳，已經形成4打3既快攻，一輪互傳後元山輕鬆攞多2分。
 




此時，Ivan在我背後細聲的說，「我唔會再俾你地係我面前攞分。」
 
說到做到，係上半場剩餘既時間，我地竟然無法係顏色地帶得分，只可以靠外投苦苦支撐，而我在上半場亦只得4分進賬。我地當場落後元山22:35。
 
阿傑「條友仔short架，下下話Block就Block，好似唔使力咁既。」「唔好氣餒呀，我就唔信佢成場都咁好氣。」
 
李SIR「阿駿講得岩，下半場佢體力一定會下降，而且佢已經有2犯，多D埋佢身。仲有，阿駿你多D擋開mark犀牛個個，等犀牛有多D位射，再唔係拉15號出黎撲波，浪費佢體力。」
 
「係。」
 




第三節一開波，我地就根據李SIR既指示，多左打Ivan埋身波，希望唔入都搏到佢犯規。高佬帶住個波落底線，呢個半場換左我同Ivan做正面既match up，佢hand check住我。我背住佢打算壓入籃底，元山其他球員見我打算同Ivan打1 on 1都冇包夾埋黎，睇黎佢地對Ivan真係好有信心。
 
我右手一個假動作，打算fake Ivan到右邊再係佢左邊上籃。正當我轉去左手邊用正手放波既時候，面前一個巨物跳起，將我前而所有野完全遮住。
 
「拍」我個波俾Ivan一手拍左落黎。
 
「野獸，佢係一隻野獸﹗」我心想。
 
阿傑「返去防守呀阿駿，下球再黎啦。」正當我仲諗緊頭先個球既時候，元山已經過左半場打左個2對1既快攻攞左2分。
 




之後犀牛入左個3分波先令到我地不至被拋開。到元山發動攻勢，佢地落左個波俾底線既Ivan，其餘4人向四周散開。Isolation!佢地要Ivan同我打Isolation。Ivan面對面對住我，打算用佢既foot work過我，但我將重心放低，好專心咁望住佢個波，而我地之間亦留左一步既距離以放佢過我。
 
就係呢個時候，佢就係我面前作出一個跳投，我即刻向上跳，但都係差半隻手位。穿針。
 
我望住個波由網入面趺落地下，再彈高。我感到絕望，我懷疑自己既能力。攻，我俾佢完美地封阻，守，佢亦輕鬆係我面前攞兩分。
 
我係咪真係咁廢﹖我望住地下既籃球，汗水由下巴滴到地上。我見到隊友係我身邊走過，佢地開左口，但我完全聽唔到佢地講D乜，成個世界好似靜哂咁。
 
「咇」
 
球證吹左個暫停。係阿傑見我有D唔妥，叫左個暫停睇下發生緊咩事。