[男籃]一球穿Jump: 第十九回 – 最強對最強

今場大戰氣氛濃厚，我地去到球場既時候已經座滿人，兩邊既同學好整齊咁分開座，真係有少少甲一FEEL。
 
經過一輪熱身，我地圍埋一齊聽李SIR講戰術。
 
李SIR「拿，我地睇過元山幾場波，佢地個人既實力好平均，每個人都可以得分，所以以實力黎講係我地之前咁多場既對手冇得比既。亦係咁既原因，佢地都可能覺得對我地係羸硬，所以可能會比較掉以輕心。大家今場記得控制番個節奏，慢慢打，等元山個邊keep住覺得我地係underdog，到第4節先同佢地決一勝負。OK?」
 
「OK!」
 
為左李SIR，我地既士氣可以去到最高點。犀牛「喂阿駿，你望下元山佢地，真係好平均，連高度都好似差唔多咁，你估可唔可以恰佢地重心高丫拿。」「未必喇，上次睇佢地對官中呢，就算俾你過到一個，佢地個15號D block shot好勁架，除時俾人抹番落黎。」犀牛「唔，都要試下。」「聽李SIR講，盡量拖慢個節奏，得分低，佢地想lead都有個譜。」
 




「咇咇」
 
分組賽最後一場，亦係呢一組既生死大戰，正式開始。
 
元山實力好平均，而且身高亦比我地高，所以好快就攞到優勢。其中15號，好似叫Ivan，係佢地籃底支柱，每場都封唔少波。其實佢地5個正選個個都射得，好似你對住鷹隊咁，防到一個，防唔到第二個。
 
但係我地都唔係善男信女，照住李SIR個打法，我地將第一節個節奏拖到好慢，下下都打半場陣地戰，去到24秒先起手，咁樣元山一節最多廿次起手機會，俾盡佢入一半，都係攞廿分。就係咁，我地第一節以10:14落後。
 
李SIR「好，防守方面我地冇咩問題，照咁打落去啦。攻個度你地要再差空D，佢地15號D籃板同Block Shot好勁，剷唔到架喇，試下用盡個闊度佢。」
 




我地當然信任李SIR既戰略，但似乎元山都睇穿左我地。
 
元山第二節開始將防線拉哂入三分線入面，完全放我地射三分咁，而進攻佢地開始想加快節奏，等比分稍為拉開既時候我地一急佢地就有機會拉開比數。
 
比元山一開波攞左2個and 1波之後，比分拉開到10:20。我心諗「咁落去唔係辦法，一係犀牛或者高佬係出面起Q，拉出佢條防線。一係剷多D底攞D easy basket。」
 
高佬帶左個波上前場，我同佢打埋一邊。佢用我做左個pick，即刻roll in，我亦後手輕輕笠番個波俾佢，「麻甩三角戰術」一出，高佬輕鬆過左一個，而佢面對既，係Ivan。高佬諗都唔諗即刻係Ivan面前上籃，見到Ivan成個人跳起一心諗住封個波落黎個陣，高佬原來呢個係假動作。佢fake起左Ivan之後，衝前兩步，係另一邊籃底做個反手layup攞兩分。
 
我地既啦啦隊見到我地有個咁靚既組織，即刻起勢叫春，嘈到個地板都有D震。但呢個時候我除左同高佬黎個high five 之外，仲有少少不祥預感。我望到Ivan既眼神，佢一定要報呢個仇咁款，打波者，好驚驚囉。
 




元山既進攻唔入，俾我地搶到籃板。高佬好似上一球咁帶個波去我個邊，我眼神示意佢差番個波出去，唔好硬闖。但係高佬好似食過番尋味，想做多次「麻甩三角戰術」。我照同佢做左個pick and roll，但今次Ivan比頭先更快一步封左高佬個位，當佢諗緊點做時，已經有兩個元山球員夾住佢。眼見個波就快俾人夾甩，高佬情急智生，將個波dump落Ivan隻腳度出界，攞番個界外球，但進攻時間共剩4秒。