[男籃]一球穿Jump: 第十八回 – 意想不到

打完第四輪之後，元山同官中都係四戰全勝，我地就三勝一負排第三。官中既最後一場早我地對元山一日開波，由於佢地冇左牛佬，亦都輸波收場，以四勝一負繼續排第二。咁變左而家三隊爭兩個出線席位，元山只要羸我地就一定出線，輸少少都可以以得失分差壓過官中出線，所以形勢最好。我地就一定要羸元山，而只要羸到，我地就可以憑比較好既得失分差以第一名出線，輸左就一定出局。
 
所以，最後個場對元山，一﹗定﹗要﹗羸﹗
 
睇完官中最後一場波後，我同高佬同犀牛去左麥記醫肚。
 
犀牛「喂阿駿，我地聽日對元山，有冇信心先﹖」「信心實有架，但係羸唔贏到又係另一樣野黎喎。」高佬加把嘴「你估話羸就羸咩，人地有3個區隊係入面架，而且佢地一個禮拜操足4日，點同我地呢D業餘波丫。」「嘩乜你咁讚人既﹖唔使打已經認輸拿﹖我地返去同李SIR諗下有咩計可以贏到好過啦。」
 
跟住我地3條友就急急腳返到學校，進行大戰前既最後一課操練。
 




呢一課比平常的操練輕鬆，都係做D簡單既舒展同射波，可能李SIR唔想我地消耗太多體力同整傷掛。操左個零鐘之後，李SIR叫哂我地埋一邊圍圈坐。
 
李SIR「好喇，黎到最後一場比賽，之前既表現要一筆勾消，因為唔理你之前打得幾好，呢場輸左就冇用。今年係你地最後一年打B grade，我唔想你地有一個唔好既回憶，所以你地為自己又好，為學校又好，你地聽日要醒醒定定。。。」
 
犀牛拍一拍我，細細聲講「做咩李SIR咁感性既，平時佢都係屌下我地就走架喇喎。」「唔知呀，可能佢緊張呢場波掛。」
 
李SIR「最後，我想同大家講一個消息。」
 
李SIR板起臉，大家都不其然肅靜起來。「岩岩係校長度收到消息，我教埋呢一個學期就會調去隔離區既學校。換言之，如果你地今場輸左，就會係我最後一場帶你地既波。所以，我希望你地俾心機，等我可以帶多一場得一場。」
 




我地都唔敢相信自己隻耳仔，睇住籃球隊大既李SIR竟然話下場波可能就係佢最後一場帶隊既比賽﹖氣氛開始變得死寂。
 
李SIR「好啦，我可以教你地既都教哂架喇。聽日放開D打就得，我地有機會羸架。時候都唔早喇， dismiss啦。」說罷便徐徐步向教員室。
 
我地一班人你眼望我眼，一時之間都唔知點做。呢個時候，阿傑起身，執起個波，一步一步咁行去籃框方向。我地望住阿傑，見佢開始起步，帶住波向前跑，上籃，再回頭執番個波重覆練左右手上籃。
 
講真，呢下我真係覺得佢有D型，咁耐以黎呢下先係最服佢係隊長既一次。我忍唔住，起身，執起另一個波，排係阿傑後面，同佢一齊練上籃。就係咁，我地冇一個肯走，全部留係度加操，希望以最好既狀態打聽日場波，羸到元山，令李SIR可以帶多我地一場。
 
MACY「你講真架﹖李SIR教埋今個學期唔教﹖好可惜呀。雖然我同佢唔熟，都覺得好可惜。」
 




「係呀，李SIR平時雖然好嚴，但都係為左我地好者。平時俾佢鬧就好鬼憎佢，而家佢要走反而有D唔捨得。」
 
MACY「唔好咁啦，聽日比心機打呀，為李SIR而戰啦。係喎，夜喇，早D訓啦你。」
 
「唔，好啦，咁聽日見啦。」