[男籃]一球穿Jump: 第十三回 – MACY

呢晚我碌左好耐先訓到，因為我諗緊MACY點解會黎睇我地比賽，但睇完之後招呼都唔打就走左去，佢其實係咪黎睇我﹖真係唔知道。仲有，點解我自從上次同佢食完日本野之後，我個腦就不停咁LOOP住佢﹖佢有咩吸引我先，個樣係執靚左，但都未到女神級，好似LUCY咁丫。我沈子駿鍾意得既一定係天資國色黎架麻，但我又不得不認而家個心係為左MACY「囉囉攣」。
 
第二日返到學校，由於尋晚訓得好差，成日都釣魚。一直去到LUNCH個陣，行左去球場睇下有冇波打啦，就係樓梯口撞到MACY。
 
突如其來既碰面攪到我地都唔知講咩好。「多謝你黎睇比賽呀。」呢句開場白真係好無聊囉。MACY「唔使客氣，你地都打得好好呀，可以反勝。」「係呢，你有冇預人食飯呀﹖」其實我自己約左高佬同犀牛既，但我都鼓起左勇氣，冒住又食檸檬既風險，預MACY。
 
我見MACY俾我嚇一嚇，一時之間都唔知點反應「。。。冇呀」「咁一齊食啦。」我話。「唔。。。」
 
同MACY去左一間比較遠既茶記食，一來有位二來唔想附近有同學係度。我地好快咁點左野食，大家都冇出聲。
 




係呢個DEAD AIR入面，我好唔自在，個腦不停係度諗，諗下有乜野可以講。點知，係由MACY打開話題「阿駿，做咩唔講野既﹖你尋日打俾我個陣唔係話有野同我講架咩﹖」
 
「係呀。」我鼓起生平最大勇氣「我尋日比賽前係咁望，好希望你黎左睇我比賽。」「點解既﹖」MACY有D難以至信我既說話。「我諗左好耐，雖然係李SIR抽籤既，但MACY你個日去到學生會室即係證明你都係有個心想幫我啦，只不過估唔到李SIR比你先入去之麻。」MACY冇出聲。
 
「仲有，我唔係為左利用你幫犀牛先埋你身架，你睇下。」我係個袋度攞左一張紙出黎，上面寫左我尋晚GOOGLE可以係賣物會既source。MACY接過張紙睇左一陣，。你真係想同我一齊再玩賣物會﹖」「唔係。」我答。「我係想以後無時無刻都同你一齊。」嘩沈子駿你講D野好噁心呀，雖然你係有D鍾意MACY者，唔使講D爛GAGA又老套到死既表白詞呀麻。
 
「你講真架﹖」MACY都好似唔係好信我講既說話。我好大力咁UP頭，個動作大到隔離枱都望住我，笑我傻他咁。MACY見到我咁先有番D笑容，「我幾驚你係利用我先同我一齊玩。。。」「唔會啦，邊係D咁既人﹖」我梗係唔係啦，高佬叫架咋麻。
 
之後一路食一路傾，原來MACY個日早走係因為除左我之外，籃球隊其他人佢都唔熟，而佢個陣又唔知我諗緊乜，所以一睇完場波就走左去。MACY對我忽然既表白雖然覺得突然，但係都冇懷疑過我係呢一排先鍾意佢，之前係因為要幫犀角先至扮同佢熟。呢個秘密，由佢一直唔俾人知啦。