[男籃]一球穿Jump: 第十一回 – 輕敵

雙方球員列陣。見到SSY既球員雖然平均身材矮過我地，但從佢地既眼神中我睇到既係鬥志，同埋士氣。相反，我望一望我地D隊友，高佬同犀牛去到開波個刻仲傾緊一陣去邊度慶功，阿傑亦都顯得漫不經意。呢個對比令我有D擔心。
 
一如所料，我地實力係比SSY高一班，係開賽頭5分鐘，我地輕鬆領先10:0。對方叫暫停。
 
李SIR「醒神D，千祈唔好輕敵，我地快D放甩D分咁下半場就可以多D時間優息。犀牛你跑動要多D，頭先有兩球高佬想PASS俾你你都冇現身去攞波。阿傑你多D同阿駿打埋一邊，SSY個邊比較多空位。」
 
李SIR不停咁用盡暫停既每一秒去同我地分析同講解佢既戰術需要，但好多隊友都冇心聽，因為個領先優勢來得太易。
 
重新開波之後，SSY連入左兩個3分波，追到10:6。呢個時候高佬行埋我度，細細聲咁問「你使唔使射番球3分試下﹖哈哈」「我打底架大佬，認真D啦」
 




高佬「講下笑者，做咩咁認真﹖」繼續帶波上前。當佢一去到3分線前，諗都唔諗，望都唔望隊友，就起手。中前框，對方搶到籃板。
 
高佬「差少少，下球一定入。」
 
隨後幾球，我地隊波唔係夾硬要做一D好悅目既攻勢，就係射一D較高難度既射波。越射，手感就越差。手感越差，就越打得心浮氣燥。俾SSY追下一球，追下又一球，我地竟然落於下風，半場落後22:30。
 
李SIR「你地今日攪咩呀﹖完全都打唔出水準既。再咁落去，我地會輸，仲會輸得好慘。你地睇下，我MARK低左你地上半場既進攻，有6成幾唔係一有空位就射，而係拖到第二、第三時間先起手。人地行都行到返黎啦咁。」
 
大家聽住李SIR訓話，都頭耷耷，冇人有聲出。
 




李SIR「你地5個休息下，到你地諗通個問題，話到俾我聽係邊先再落場。」
 
下﹖一次過換咩我地落黎﹖淨係靠4A班後備出去打﹖李SIR呢個行為大出我地意料，因為我地心知一班後備既實力。
 
「咇﹗」球證雞聲一響，下半場展開。起初SSY見我地一口氣換哂人都唔敢貿然進攻，只係慢慢以試探性質睇下我地一班後備既賽力。但好伊，我地既底牌已經俾SSY睇清，佢地知道我地D後備實力唔強，開始加強進攻。佢地係我地既內線可以話係予取予攜，頻頻得手及擭到犯規。
 
第三節剩低1分鐘，我地落後26:40。「李SIR﹗」犀牛大嗌。「你幾時換番我地落場呀﹖再唔換就趕唔切架喇。」
 
李SIR「咁你地而家究竟明唔明我點解要換你地出黎﹖答我﹗」
 




正當大家你眼望我眼既時候，一個熟識既身影在遠方的觀眾席上出現。係MACY﹗佢應承左黎睇我地打波，但係我地一班人竟然係球隊落後14分既時候乜都幫唔到手，眼巴巴睇住其他隊友係場上面被玩弄。更重要既係，我唔可以令MACY失望。
 
「我地唔可以睇低對手，如果咁做，人地就有機會反咬我地一口。同埋。。。李SIR你之前講得岩，尊重對手就要每一場都盡力去打，令對方輸得心服口服。」
 
李SIR嘴角微微向上一笑，「其也人呢﹖」
 
大家見李SIR都滿意我既答案，都沒有再加把口，只係默默咁點頭示意同意我既說話。
 
李SIR「阿駿你出去幫下手啦，其他人第四節出去，俾佢地睇下我地真正既實力。」
 
「好﹗」
 
場內所有人見我地大嗌一聲，都不其然望一望我地。係呢一刻，我從未試過咁想落場比賽。