[男籃]一球穿Jump: 第十回 – 加緊備戰

接住落黎個2個月，我同犀牛同高佬，除左逢一、三同五跟校隊練波之外，星期六我地都會一齊去街場打波，希望可以係最佳狀態打分組賽。
 
學界分組賽有2組，每組有6隊，打單循環，首次名晉級淘汰賽階段。我地組入面有SSY、官中、校友會、元山同第二總理，而第二組就有學界大熱門陳李桂芳。以我地組黎講元山實力最高，校友會同官中同我地應該差唔多，其餘兩隊比較易應付。根據李SIR所講，由於我地最後一場先打元山，只要之前幾場打得好好睇睇，就可以坐二望一，向冠軍進發。
 
不過我地就唔係咁睇，李SIR講緊既係我地正選既實力，但因為今年我地隊入面有幾個係由4A入黎既，所以板凳力量係一個好大既問題。我地一班主力應該要好好咁保留體力，留番淘汰賽用。
 
我地曾經同李SIR講過呢個問題，結果係俾佢鬧左一身。
 
李SIR「做人同打波一樣，每一場每一件事都要俾心機去做，只要出盡全力，無論輸贏你都會問心無愧。所以你地提到既係頭幾場留力，我做唔到。你地落到場，就要尊重對手尊重自己，無論對手係點都唔可以有分別。」
 




犀牛「頭先李SIR即係話我地5場分組賽都要正選呀，想打死人咩。」
 
高佬「咁你落到場可以就住架麻低能仔，邊個叫你下下去盡者﹖」
 
「咁會唔會唔係咁好呀，如果俾阿李SIR知道。。。」
 
高佬「只要我地羸到波李SIR就冇籍口留難我地啦。我地第一場先對SSY，半力都羸佢地啦，留番D氣打第二場對校友會好過啦。」
 
「Let’s see」
 




講真，我地都好尊重李SIR，係呢2個月入面佢都教左我地好多打全場既戰術、訓練方法等，令到一班人實力提升左唔少。但係，我地依然冇聽佢既說話。
 
第一場波，我地對SSY，同組實力最差既一隊，勝出可以話係十拿九穩。賽事係彩虹道體育館打，由於係分組賽同戲碼唔強，觀戰既人不多。係做熱身既時候，我不其然望左入口幾次，腦中不停回轉我講過既一句話「之後我地打學界你都記得去打氣呀。」
 
「之後我地打學界你都記得去打氣呀。」係我之前同MACY講既。自從上一次食飯之後，我再冇同MACY講過野，係學校見到面佢都會避開我。唔知點解，每次見到佢咁樣避開我我個心都會那左一下。「唔知佢今日會唔會黎呢﹖」我問了自己一下，「佢都可能唔知道今日有比賽啦。。。」我答了自己。
 
阿傑「攪咩呀阿駿，唔使緊張喎。」
 
「唔係呀，冇野呀我。」
 




阿傑「黎啦，出場喇。」我眼光再望向入口，依然見不到我想見的人。