[男籃]一球穿Jump: 第九回 – 真相大白

「喂，MACY呀﹖係呀，個日你咪問我星期五得唔得閒既，我同籃球隊講左我個日有D野做，淨係去食糖水呀，我地可以去食飯呀。」
 
MACY「係呀，咁真係太好喇。去食日本野咯﹖」
 
(果然係生勾勾、ON99)「好呀冇問題，不過我地早少少去食啦，費事撞口撞面見到咁多同學啦。」
 
MACY「做咩者你~同我出街好失禮你咩﹖咁驚撞到人﹖普通朋友之麻。」
 
(平時唔聲唔聲，咁好口才既)「唔係，同埋早D易book位麻。」
 




MACY「你鐘意啦咁，星期五見啦。」
 
如果唔係為左要MACY幫我保守呢個秘密，真係唔鬼睬佢呀。不過話說回頭，呢排江湖傳聞MACY對自己個樣好似注重左好多，番學時都會整下個頭，拉高番條裙。仲有聽佢D姊妹講，佢仲開始買化妝品同做Facial咁，總之就唔同左啦。至於男仔個面，普遍分數都上升緊，大家都話睇唔出原來佢打扮下都叫冇咁樣衰，仲有幾條毒撚開始J佢添。
 
咪先，點解我咁清楚既；點解我好似有D留意人地講佢咁既。冇既，大家一間學校，知道下D八掛野好正常者，哈哈，冇野既。
 
「喂行得未呀你﹖」我打緊俾呀MACY催佢，因為我唔想係學校門口等佢時俾任何我識既人見到，又唔想俾佢知我唔想係學校門口等佢。
 
MACY「等陣，5分鐘到。」
 




結果我等左15分鐘。
 
「嘩乜4樓行落黎要咁耐咩﹖」
 
MACY「咁男仔等女仔都好正常者」
 
去到我地訂好位既餐廳，我拿拿臨叫好哂野，諗住快D食完快D走。「係呢，你又話有D關於抽籤既野想同我講既﹖」
 
MACY「係呀，不過我想問你一條問題先。」
 




「好呀，你問啦。」
 
MACY「如果我冇幫你係抽籤度做左手腳，你係咪唔會同我去食飯﹖上次一齊去買你係咪只係想要我幫你架﹖」
 
雖然兩條問題既答案都係YES，但我都係答佢「梗係唔係啦，見你有野同我講我先出黎咋，究竟咩事者~」
 
MACY「幫你個個唔係我，係李SIR。」
 
下﹖玩咩呀，幫手抽籤個個係李SIR，邊有可能呀，同埋佢都冇理由咁做啦。係咪吹大左D，佢俾人知道佢係呢D地方做假，分分鐘工都冇埋架喎。
 
「你講真架﹖但李SIR點解要咁做﹖」
 
MACY「你估呢個世界得你諗到呢條屎橋咩沈子駿。我個日行過教員室，見到犀牛同李SIR係欄杆傾緊計。我聽唔到佢地講乜，但見到犀牛眼泛淚光，係咁捉住李SIR隻手。就係我行過佢地身邊個刻，我聽到犀牛講「抽籤都唔一定抽唔到呢合結果架」。我當時都唔明佢地講緊咩，但後尾到你揾我既時候我就明哂喇。」
 
「但都冇證據話李SIR最後真係有幫到佢架。」我依然半信半疑。




 
MACY「我原本真係諗住幫你架，就係我要去抽籤個個lunch。我見到李SIR係學生會室。「MACY，你黎拿﹖我見我早左到，幫你抽好哂籤喇，寫左係塊板度，你睇下有冇問題﹖」我望一望塊板，exactly 就係你想我幫你抽既結果。」
 
「哦，即係李SIR特登早左去就係為左幫犀牛。。。」
 
MACY「所以幫我個個唔係你，你李SIR。」
 
(咁即係我冇差你人情啦)「都唔係呀，你都去左即係個心都係諗住幫我啦，所以都多謝你呀。之後我地打學界你都記得去打氣呀。」
 
MACY「你冇嬲我唔早D同你講﹖」
 
「唔嬲，多謝你同我講添啦，其實你一直唔同我講我都唔會知，會繼續以為係你幫我之麻。」
 
MACY「我就係唔想我地做得成朋友係因為我幫過你。我地同左校3年，講得唔多過30句野，包括舊年一齊賣物會。。。但你忽然主動揾我，我雖然好開心但我知道你係因為我可以幫你先同我講野。」
 




MACY越講越激動「我知我唔夠人靚，身材又冇人咁好，好難吸引男仔既注意。。。(講到有D眼濕濕喇已經)所以我諗左好耐先決定到講俾你知個事實。。。」
 
MACY幾經辛苦講哂句野，已經忍唔住攞紙巾「唔好意思我有D唔舒服想走先，拜拜。」
 
我冇追出去，一來我要埋單，二來追到出去我對住喊緊既MACY都唔知講咩好。但有一點我想講既，頭先MACY起身走既時候我望過佢一眼，唔知點解佢好似有一種發光既感覺，好似D聖人咁，唔係為左自己利益而付出，令我有少少慚愧。