[男籃]一球穿Jump: 第七回 – 決賽

犀牛帶領既4A直接入左決賽。我同高佬經過第一場熱身之後已慢慢適應打全場，係第二圈對4B時輕鬆贏40- 20，只差一步就入到決賽。而我地第三圈既對手，就係爆冷係第二圈羸到大熱4D既3C班，佢地班底夾慣夾熟，係上年帶領學校係學界丙組入到分區四強既主將。
 
睇完佢地第二圈，阿傑同我地都發覺3C好鐘意打pick and roll，再加上佢地分波出牛角位又有個叫Martin 既幾射得，係一場硬仗。
 
犀牛「喂，你地好擔心呀﹖」
 
高佬「你就講風涼說話啦，入左決賽，黎緊真係硬仗一場呀。」
 
「3C真係唔講得笑，佢地仲夾得熟過我地三個呀可能。我都諗唔到應該點對令佢地。而且，後日就比賽，冇咩時間練。」
 




高佬「阿駿，你早排咪成日練牛角位既，不如你同佢地鬥射﹖拉佢地個底出黎，射得入固然好，唔入我入去衝搶，點都快過佢地見到先去搶丫。」
 
我地即刻揾埋阿傑同其他隊員商量，大家都同意我地既戰術。同時，為怕俾敵人適應到我地既戰術，我地已經安排左唔同隊友分別係第一至四節輪流做主攻手，等對手不停撲波，再次用消耗戰術。
 
比賽一開始，我地都咬得好緊。好在阿傑早段著哂火入左幾球中遠距離，如果唔係都咬唔住D分。3C繼續用佢地純熟既pick and roll攻我同高佬既另一邊，而防守上佢地似乎睇通我地想用消耗戰，係我地換走正選既時候佢地都照做，甚至休息時間比我地長。半場時我地些微領先28-26。我地得分最高既係阿傑，有10分，對方最高得分既係Martin，有成14分。
 
「夾實個個Martin呀，佢入左成一半分，mark實Ｄ佢，唔好比佢掂波。」
 
高佬「我都想呀，不過佢真係好準，有幾球我差Ｄ掂到佢隻手都俾佢入到。」
 




阿傑「阿駿，你mark佢啦不如﹖你高Ｄ佢都有Ｄ避忌，等佢凍番Ｄ我地先轉番mark。」
 
「ＯＫ」
 
講真，要個ＰＦ行出去mark個ＳＧ都幾冒險，不過我地Ｄ中學雞波，跑多兩步都勉強可以彌補到唔夠靈活既腳步。係第三節一開始，Martin都試過係我面前射過幾球，但命中率低左好多，其中有一球仲俾我block到，似乎阿傑個戰術係ＯＫ咁。但係３Ｃ其他人都唔係流既，佢地係Martin俾我mark實左之後就轉而攻內線。
 
打到第四節得番１分鐘，兩隊打到40-40，我地波。第一個攻勢，我係底過唔到對方球員，將個波分番出去３分線俾阿傑，阿傑一fake，fake過左一個守衛之後踏前一步射個兩分，可惜中前框唔入。到３Ｃ進攻，佢地去到牛角位一pick，好彩我地都知佢地呢招，已經有人block左佢地既去路。點知Martin一個後手將個波傳出去零度位３分線，一起手，穿針。
 
剩番４０秒落後３分，我地要兩個攻勢。阿傑叫再個暫停。
 




阿傑「打個quick two再守一球啦。阿駿你ＯＫ﹖」
 
「唔，用番pick and roll打佢地。阿傑你幫我。」
 
阿傑「好。」
 
一開波高佬快速帶到中間三分線，傳向右邊既阿傑，阿傑殺入中路，我同佢做左個pick。我pick完之後即刻轉身roll in，仲特登留番一步位，見到阿傑笠個波入籃底時我即刻起跳，右手tip左個波入網。「咇、咇」球證示意　－　and one﹗我預留位置俾防守者衝過來的想法原來都行得通，當佢一見到空位就會過來防守，但一有碰撞就很容易被吹犯規。我射入埋罰球追成43-43平手。
 
３Ｃ再開波，佢地用番同一套戰術，控波去到牛角位一pick，亦都俾我地block左佢地既去路。當Martin打算用同一招後手將個波傳出去零度位３分線時，阿傑標出指手佢個波。高佬一支箭咁衝前搶到個loose ball再運波上前場，佢見到有兩個對方既後衛已經返到鎖匙圈，理都唔理佢地cut右少少已經上籃。正當兩個防守者都跳起想封佢時，高佬轉下手向籃框左方交個彈地波。夾慣夾熟既我已經係適當既時候出現左，係籃底接應高佬既傳波輕鬆攞兩分。
 
呢個亦係我地同犀牛夾慣既「麻甩三角戰術」之一。正當全場在尖叫時３Ｃ已經開左波打快攻，但頭先我地有三個球員係後場冇上黎所以佢地既快攻一Ｄ都冇用，迫住射左個三分波，但唔入。係呢個時候球證亦都吹雞完場，就係靠呢個「麻甩三角戰術」我地贏左３Ｃ，入到決賽。
 
決賽我地對犀牛帶領既４Ａ，大家都知道冇得打，但既然目標已經達成，放開黎打更加好玩。我地Ｄ主力只係上陣左半場，雖然犀牛都打得好好，但最尾都係俾我地炒52-28。