[男籃]一球穿Jump: 第六回 – 小試牛刀

一轉眼就到要比賽既日子，呢2個星期我地除左去練波，就係去練波，為的就係一圓三兄弟一齊打學界既夢想。
 
走線上，我地比較難打，由第一圈到決賽前都要同番中四既隊伍打，如無意外，決賽就會對住犀牛個班。今日放學會有三場波打，我同高佬會對4E班(第二場)，犀牛就會對3A(尾場)。
 
4E班平均高度高過我地，但係整體技術麻麻，平時打半場都係俾我地食住多，所以我地贏面都幾大。開波前，我地隊長阿傑就同大家講「大家打番平時水平就得架喇，我地平均技術都高過佢地，唔倏驚佢地﹗」
 
「講左等於冇講。即係各有各打啦。」我心諗。眼尾望一望高佬，見佢同我打個眼色，就知到佢都係有同感。Anyway，贏到就得。你睇得出人地既野人地都睇得出你，4E班就係利用佢地既身形優勢，攻既時候係咁攻底，守既時候就密密麻麻入哂鎖匙圈，等你冇得剷，剩係射外圍。
 
打開三打三既人都知，一轉到打住場成個打法就唔同哂，十個人迫係半場，要突入都唔係咁易，而且跑黎跑去都幾考體力。係頭一節，對方憑住兩個6-0 既run，領先我地12-2，我地只係靠高佬剷入去博到犯規入左兩個罰球。第一節我地既戰術完全失敗。
 




休息既時候，我同阿傑講「不如我地換多D人，打多D快攻，唔入都可以浪費下佢地D體力。到最後一節先搶分，第二同第三節做多D低位夾擊，受番好先好唔好﹖」阿傑知道上一節我地全無隊形咁打都唔係辦法，於是話「試下啦，我地打多D快既，傳多D波，消耗佢地體力。」
 
第二節，高佬多左引球入三秒區，引到兩個人夾撃就兜出零度位睇位傳俾cut入去個個剷籃。呢個戰術令到我地博到大量罰球機會，可惜我地都係守唔住人地既進攻。半場，20-15。第三節，我地刻意俾高佬休息，輪換左多個後備出黎，繼續消耗4E既體力，同時亦成功foul out左佢地兩個內線主力。進入第四節時，32-29。
 
「佢地冇左兩個底，靠你喇阿駿。」阿傑係開波前同我講。高佬休息夠之後，對手根本追唔到佢，多次俾佢引左兩至三個人夾佢時，佢就分波俾底線既我，我fake埋佢地個後備底博埋and 1。一開波有地就打左個8-0既攻擊反超前32-35。其後我地體力既分野越來越大。係我地調番轉係咁屈佢地底之下，我地最後贏38-48。
 
高佬「贏得險，好彩留前鬥後咋，如果唔係輸左都有份。」
 
「嘩，比預期打得辛苦好多，都係唔慣打住場，要再練多D至得。」
 




係我地吹緊水既時候，犀牛既關鍵戰(佢只係打一場﹗)已經開始左。「加油呀犀牛﹗」我同高佬係場邊落力為犀牛打氣。
 
犀牛班4A比我地想像中更廢，不過好彩佢場對手都唔好得去邊。海軍鬥水兵既情況下大部分同學都走左，得番小貓三四隻係度睇波。4A係犀牛係咁開turbo下半場領先緊22-10，但犀牛第三節一休息，佢地就即刻俾對手追番到25-22。就算犀牛已經累極都要係第三節末段頂硬上。
 
而對二人、三人夾撃，犀牛根本連起手都有困難。不過有犀牛在陣，4A既防守就真係穩陣好多，起碼保得住個領先優勢。最後，犀牛係第買節不停用盡24秒之下，幫到4A贏30-27，佢自己就攞到20分，可以話真係靠佢一個。
 
完場雞一響，我地都衝出去同犀牛慶祝，因為我地三個最擔心個關已經過左，黎緊我地可唔可以一齊打學界就係靠我同高佬自己喇。