【微甜】點解有五條女同我一齊?: 40-擊中要害-「修正版」
過左二日之後，女神whatsapp左我，就話約2點半，爭鮮等。
我就係度諗究竟咩事呢？咁急搵我，係唔係搵到返去原本世界既方法呢？
所以我一路行一望諗，其實係唔係唔應該返去，因為我依家不知幾開心，洗唔洗咁執著要返去，而且我覺得咁既生活都唔錯。
至少我唔會做單身寡佬呀，又有3位女友，我覺得我已經好幸福，無咩必要要走。
我終於行到去爭鮮門前，女神見到我就話：「喂，啊龍，你到左啦。」
我轉頭望下周圍，從人群中摸索，終於搵到女神既身影，之後我走左埋佢，原來女神排緊隊。
「Hi，你咁早既。」我同女神講。
我望一望女神排既位置，係隊中既中間位，從而得知都等左有段時間。
「入黎一齊排啦。」女神講完之後我就拉開布帶，成個人穿過去。
「係喎，做咩約我出黎既。」
「呢度多人呀，等陣坐果陣要坐卡座，方便同你講重要野。」我點一點頭。
等左無幾耐，我地都入左去，坐左卡座，原本個侍應講話多人時段係唔可以兩個人坐卡座，但係我見到女神同個侍應講左啲野就比左我地坐卡座啦。
我同女神都埋左位，話哂都係第一次約會，所以都好緊張，而且我無刻意打扮，著返啲平常著既衫。
「你要咩呀，我幫你嗌呀。」我問。
「唔洗啦，呢度有得拎。」女神指住個回轉壽司帶。
「咁個啲重要野呢？講得未？」我問返正題。
女神深呼吸一下，好認真咁望住我就話：「啊龍，我都開始覺得你講既野係無錯，一個月前相比依家係有呢唔同左，知唔知邊個係長本大治？」
我點一點頭回應，女神就繼續講：「呢個係我追開既明星。我中學畢業之後就讀左大學，忙左好多，所以都無時間追星，不過係我前兩日上網既時候發現搵唔到佢既任何資料，所以就諗會唔會係出左啲問題。」
其實女神係我記憶中只係中意過明星，真人就未見過，所以我覺得都係處女，咁岩佢星座又係處女座，真係符合做女神既條件。
我聽完女神講，我就有個結論，我可能係涼宮春日既男版，因為所有我知識既野都順我意咁出現同消失。
例如話我有三個女朋友係我想既，而且女神個中意對象都係我唔想既，照推論，只要我知道女神有中意既對象，我都可以用潛意識令佢消失。
不過諗諗下，有個矛盾啲，就係點解我前女友會消失呢？因為並唔係我想，會唔會係想逃避問題，所以將佢從呢個世界中消除呢？
因為呢個矛盾，所以我唔敢亂做假設。
「你姐係話，你中意果個明星係喺一個月前消失左咁呀？」
「唔敢肯定，但係有咁既可能，因為啊龍你係一個月後變化好大既一個，反而我只係微微既變化。」女神講。
我又點一點頭。
女神繼續講：「好可能你就係改變呢個世界既核心。」
下？我都係咁諗，但係點解你咁輕易就話我係改變世界既人？
喂，其實可以有其他原因姐，可能係咁岩得咁橋就入左時空裂縫之類，所以去左極樂世界呢？
極樂世界？會唔會係我死左呀，所以所有野都係我幻想出黎？
「咁好可能我已經死左，所有野都係幻想出黎，你覺得係咪？」我講。
「如果係咁既話，我就唔會係度同你講野啦，咁FF嫁你。」
「咁又係。」唉！比女神知我成撚日FF添。
「點解我會話你係世界核心呢，因為你得益最大，所有既野都係順你意。」
女神拎左一碟三文魚刺身又再講：「或者咁講啦，一個月之前既你，成為左改變呢個世界既人。」
「咁點解得你同我有啲唔同，其他人就咩都唔知，有可能唔係我改變左世界，而係進入左另一個世界。」
「如果咁講，姐係你同我入左個順哂你意既世界？」
「咩順哂我意咁難聽呀，我好彩先會咁姐。」
「我覺得唔係咁，因為我知你咩我嫁，由中五開學之後，你既變化好大，對我無咁自然。」
佢無直接同我講我中意佢，可能係佢想點到即止，而且大家都明就得，就係因為咁先吸引到我。
我呆左一呆，身為一個暗戀既毒撚，係女神面前篤爆既感覺係好尷尬，等於你打緊飛機比老母見到一樣。
原本以為暗戀得好成功，但係其實係暗戀果刻已經出賣左自己啦，唔會有人暗戀中既時候完全無改變過，所以女神係一早知我中意佢，只係無篤爆我姐。
而女神既講法，係我改變呢個世界，所以我就係呢度既神，但係點解唔係一開始就有哂條五條女，又要我搵又要我估呢？
照咁既推論，女神將會係我其中一條女，唔係點解我同佢會特別唔同，因為呢度係我同佢了解既契機。
諗到呢度，我又FF過頭啦。
我呆完一輪，回一回神就話：「你想講既係，因為咁，所以我就唔將你既記憶消除，反而留低我同過寶如一齊過既記憶？」
「可能係你潛意識唔想消除掛，但係種種因素都係有利於你，而且所有野都已成現實，一定係你令到大治消失架！」
我唔知點解好想屌鳩佢，明明我咩都無做過，但係的確係全部順我意，點解偏偏會係呢一個月先發生呢？
講到呢度我都唔知駁佢咩好，可能佢對個異國人或者係蘿蔔頭起左痰，所以先講得咁無理智。
相比起以前既我同佢的確由我中意佢果刻開始，我地係好少講野，甚至1日1句。
從岩岩既對話入面遠遠超越左係暗戀既兩年黎係最多同最長，但係我一啲都感覺唔到我同女神既感情係拉近左，反而係隔膜大左。
「你冷靜啲先，未必係我想點就點嘞。可能唔係你諗咁樣呢？」
女神個樣開始怒視我：「依家個問題係出係我度，麻煩既人又唔係你，如果係咁，咁我呢世都無得同中意既人一齊啦。」
係喎，如果正如女神咁講，我係會將所有佢中意既人都消失，諗諗都恐怖。
我就話：「咁我都唔想睇住你唔開心既，依家既辦法就係要查出原因，咁先解決到個問題嫁。」
女神開始崩潰，根本就無聽我講野：「如果我中意既人會消失，咁我就只可以同你.......你咁樣咁咩，又無樣叻，我點會......」
當時我灰到盡，根本比唔到反應，一個男人比一個心儀既女人講得咁明既拒絕，係有夠難堪，直頭係想搵個人槍斃我啦，我唔想活啦既感覺。
我呆左五秒，我忍唔到眼淚，流左兩滴，我轉身頭也不想回頭就走。
係出門口既一刻，我知道唔知好過知既道理，當女神想收兵既時候，擺出個收兵格係好過表白被女神拒絕咁難堪，直頭無地自容。
我終於明白點解啲人寧願做一世兵都唔溝女神。
因為毒撚係接受唔到咁大既打擊，係會想死嫁，寧願將件事收收埋埋等佢不了了之，可以一世留下美好既回憶，有一種缺陷美好過比人當面拒絕。
我一路行一路諗，好彩我無食過野，唔係留多一陣都想死。
我去左我樓下既公園，我坐左係度，諗起同女神相處過既日子，或者佢只係一個想討好人既女人，係一個帶著面具既人，其實佢一啲都唔想同我做朋友，一諗到呢度我 眼淚就不停流。
喊到咁上下，突然有人比張紙巾我。