【微甜】點解有五條女同我一齊?: 1-全新一日-「修正版」
當我醒左之後，我起身想拎副眼鏡，準備打機既時候....
我睇到電腦枱上有一抽鎖匙同一張摺左既紙。
係喎佢有我屋企鎖匙，所以佢返過黎，我隱隱約約同睇到張紙有d字痕。
我拎起張紙然後笑左，雖然張紙未打開，但我仍然睇到係我前度既字蹟。
因為佢寫字係好大力，大力到係紙背係摸到凹凹凸凸。
我二話不說就翻開黎睇。
====================
係呢一年來，我過得好開心
因為有你既包容同照顧
我就算錯你都幫我
我真係覺得好幸福
你尋晚講果返說話
其實我一早感覺到
不過係我唔面對現實姐
我已經放低左你抽鎖匙做電腦枱到
我以後都唔會煩你架啦
你要照顧自己呀
====================
睇完之後我第一個反應係已讀不回，得個知字，或者係佢講既野無咩特別。
所以我求求其其放埋左一邊，諗住做個收藏。
我當時既心裏只係諗「好野！可以打機打成日啦。」
因為唔洗陪女，可以將所有時間放哂去打機度，諗起都爽。
話說我都有好多年無咁癲過，自從有女既日子開始，我都未試過好好咁享受打機。
你會諗我唔撚洗返學架？我都講左我收左皮，retake嘛。
得返一兩科要返，一個星期返2同4。
姐係返一日，放一日，返一日，放四日，不斷咁loop，所以我好撚得閒。
但係我當然無咁hea啦，我只係搵唔到工姐，所以先咁得閒。
咩都唔洗諗既日子真係正，起身打機到訓教，唔計食飯沖涼同大小便，又無人whatsapp我。
所以成日都可以搵朋友陪我打機，我終於得到解脫啦。
佢地都問我唔洗陪女咩，我都唔知答咩好，唯有答佢唔得閒。
當我打到攰啦，丁都打埋，想訓既時候，我忽然諗起佢......
係無錯，就係我前女友，諗緊佢係度做咩。
所以就打開電話，睇下佢有冇上whatsapp......
一打開whatsapp，嘴到o撚埋，點解搵極都無佢既whatsapp。
我心諗，會唔會係佢黎我屋企順手清我whatsapp，所以無哂我同佢既對話。
不過我仲記得佢電話，所以加返佢，改名改做"前女友"。
今日既時間表真係編得好，夠鐘我又可以去訓教。
=========夢世界========
「啊龍，啊龍！」一把迷人既女仔聲線從後傳出。
我另轉身，發現係一個黑色長長既秀髮，身穿白色長裙既女仔。
呢個女仔慢慢咁行到我面前，然後對住我講。
「你經過今日之後你既人生將會改變，會令你快快樂樂，唔會再無女人緣。」黑髮白衣女仔講。
我比佢講既野驚左一跳，我都唔知佢講乜。
「你唔需要知我講咩，由聽日起你就會多兩位各有長處既女仔做你女朋友，之後會越黎越多。」
我都黎唔切問佢野，佢就對住我笑一笑就另身走左。
==========================
我一醒返就發現自己係張床度。
原來係發夢，如果果條女講既野係真就真係發達啦。
不過現實總會從夢境帶回事實，就係咁大個人就唔好咁多FF啦。
所以現實d，單身既我就諗起今日係星期一。
姐係天日就要開始返學啦，所以今日係我四日連假既最後一日。
之後我就拎一拎電話睇下幾點既時候，發現左啲驚撚死我既事件.......
一開電話螢幕，密碼都未畫就見到有三個未接來電。
我心諗會唔會係我前女友呢？
應該唔會掛，前日聽完我講既野，攤哂牌都仲可以打比我？
唔通佢有野係我度？所以打黎係為左拎返？
我一睇之下發現未接來電係一個叫做啊柔既人
打左比我兩次，而且又有個叫做啊情既人打左比我一次。
咩料呀？我邊度黎兩個女仔電話呀？
我諗左一諗，明明尋晚無見過有啲咁既名係度架，係唔係部電話出現問題呀？
我忽然諗起尋日個夢，黑髮白衣女仔講過既野。
唔會佢講既野係真架？但係呢啲事情點會係我呢啲人毒撚會發生。
係我諗爆頭之際，突然發出「啪，啪，啪」既拍門聲。
我心諗乜水呀？
「啊龍，你訓醒未呀，係我呀。」從門外面傳入一把好甜既女人聲。
邊位黎架？聽把聲我完全唔識喎，但係又叫到我個名。
我個心越黎越亂，不過唔好理咁多，開左門先算。
我慢慢咁開門，有一個長髮；皮膚白滑；眼大大；身穿粉紅色短衫同牛仔熱褲既女仔企係我面前。
我望住佢，佢又望住我，我諗緊呢位係邊個。
不過係我記憶中好似未見過呢個女仔喎。
隔左一陣，佢扁住嘴同我講:「你做咩企左係度閘都唔開呀？」
唔知係陌生定點樣啦，我都只係望住佢，一邊諗呢個係邊個，一邊又欣賞緊呢個咁靚既女仔。
佢望住我仲係企左係度，就再講:「啊龍，啊龍呀，你無野呀嘛?」
「無野，當然無野啦，哈哈。」我究竟係度講緊乜？
可能係第一次同仙女講野.....呀唔係，係靚女講野先啱。
所以我超緊張，個心呯呯咁跳，跳到諗唔到野。
不過諗深一層，會唔會係咩遠房親戚，又或者係咩青梅竹馬呢？
唔知發生咩事既我只好搵出少少既線索去了解下成件事。
「咪玩啦，係我呀！今朝打左比你兩次啦，你又唔聽，又話約我出去，依家又要人等你，仲要上埋你屋企搵你，你係唔係想約我架？」個靚女笑住講。
唔通啊柔就係你？咩事？搞咩？點解我電話度會有你既記錄？又點解你識我？又點解我無印象約過你？又點解......
一下子搞到我連我自己係邊個都唔知。
於是我好聰明咁諗到啲大台劇情，就作左個大話打算打發佢走，希望可以靠少少既時間搵出破案既真相。
一黎如果比人玩，我唔會咁柒，二黎係真既，我都有自己時間去睇下發現咩事。
我開始啟動藝人mode......
「我有啲唔舒服，都係唔去啦，喀!喀!」仲要扮埋聲，今次視帝仲唔係我拎硬？
啊柔睇到我好似扮哂野，所以個樣都好似唔開心咁，而且又好似知我想自己一個人咁，佢又跟著我扮無野咁。
「係呀，咁好啦，你休息多啲啦喎，等你好返再約我去啦!」啊柔講。
「咁等我好返就去啦！」我都鬆一口氣。
「好啦，咁我走啦，你小心身體呀，拜拜!」啊柔對住我揮手，就咁就走左。
啊柔一走我就閂左棟門先啦，我就係度諗唔撚係路呀，咩事先？
正當我想組織一下發生咩事就諗起果個夢。
係啦！要知發生咩事最好問一個人，我最熟悉既人-前女友。
所以我拎起電話，點擊「前女友」既電話號碼，直接打電話去問佢。
一打之下，我即刻就"喂"左一聲，聽既人竟然係一個講強國語既女人。
「喂，你是誰？(國語)」個女人就話。
屌你呀，我識一國語言渣，咪撚玩我啦。
我就 豁 豁出去~ 用左啲超爛強國語咁講:「你好，不該將個手機給機主聽吧，不該哂。」
佢好似聽得明，但係笑左幾聲。
個女人就用唔咸唔淡既廣東話講:「部手機係我架，我就係機主呀！搵我有事？」
唔係呀，咁奇怪，個電話號碼都記左兩年有多，唔會有錯架喎。
我就同個強國女人講:「唔好介意，打錯，拜拜。」講完呢句，佢就收鳩左我線。
我再望望個號碼，明明係啱，但係點解係強國女人？