【微甜】點解有五條女同我一齊?: -序章-
是咁的，我叫啊龍，原本小學時期既我係一個好活潑既小朋友。
自從小學四年級果年有左一部電腦之後，我正正式式成為一個死毒撚。
由小學雞時期到我中學畢業都唔知點解無咩女人緣。
識得個個fd都係男仔，係唔係我個樣天性夠毒呢？
我覺得可能係啲男仔見到毒撚就覺得好好相處
而女仔見到咁毒就梗係走得摩，無鼻哥啦。
所以莫講話想要一個女朋友，連女性朋友都無個。
不過又好好彩，中學林畢業之前求其搵左個女仔拎左個電話，
而且果個女仔係唔多人理佢，如果要我搵一個名比佢，我會稱佢為隱藏人物。
點知個女仔又好順灘咁唔介意比電話我，可能係畢業之後大家都唔會見。
之後係我用左少少努力加天時地理人和之下收左佢做我條女，我地就係咁一齊左。
唔知由幾時開始，佢係邊，我就跟到邊。
因為我無咩主見，所以所有既約會都係佢約我。
但係每次佢約我果陣我都好唔撚情願，可能係阻住我打機。
但係為左符合我既身份，所以就扮撚哂好自願咁。
或者可能係我真係求其搵個個既問題，所以唔係咁中意佢。
而我所付出既少少努力去追佢，係怕自己毒撚無人要既諗法，所以先會做出自己後悔既決定。
由我讀完ive 基礎文憑收撚左皮要重讀開始，就覺得同佢一齊真係好撚辛苦。
因為樣樣野都就哂佢，係唔係個個無fd既人都唔識同人相處，所以完完全全係變左佢奴隸咁。
有一日我真係忍唔撚住，好想同佢就咁算，所以我決定要同佢講清楚。
果日我仲記得係一個落雨既夜晚，個天真係好黑，黑到連月亮都無出現。
又無星星，總之黑到好似再無明天咁，如果人地同我講今日係世界末日我都會信。
同埋當時係落緊雨，佢同我都係我屋企。
我果晚係因為係度諗我點開口好，所以訓左係張床到諗左好撚多無咩可能做到既方法，諗到我頭都爆埋。
佢見到我好似好多野諗緊，所以佢就逼我講我有咩煩....
我條女就問我:「喂，做咩成晚咩都唔講？諗緊咩？講黎聽下？」
「無呀，攰姐。」佢咁樣講講，我又想收收埋埋就咁算。
「你個樣唔似攰喎，講啦，有咩煩呀。」
我心諗，屌你，我就係諗緊點同你講分手好囉，唔撚好煩住先。
跟住我就話:「唔啦，唔想講。」
「話比我知啦，又話咩都同我講。」之後佢就繼續進攻咁問
係喎，我之前係應承過你好似咩都同你話架喎。
但係呢一樣野我未諗好，點撚樣同你講，佢個樣開始有小小變化，變得好想喊咁。
之後我條女經過無數既比我拒絕回應之下，
佢終於忍唔撚住，出埋手，猛力前後搖我，我就感受到我血量條一格一格咁扣緊。
我比佢搖到個心都煩埋，但係我當然唔可以講出黎。
「都話唔撚想講，唔好逼我得唔得？」我終於忍唔住。
佢個樣即刻變哂，喊到個樣完全唔同哂，雖然我係睇過佢喊，但係次次都係搵野遮住，攬實我咁。
完全無機會睇到佢喊個樣，所以我今次係第一次無遮無掩咁睇佢喊個樣。
我開始個心有啲唔舒服，因為我好似feel到佢知我諗咩咁。
我開始係度諗如果將來先同佢講，佢會唔會仲唔開心，所以我打算依家同佢講，我想同佢分手。
「我....我.....我想......我想同你....」我開左口講。
屌你，點解咁撚難開口，仲難過同女神講我中意你咁。
係，的確我係同過女神講過我中意你，但果時有個同學同女神傾計，我果時無野做，所以我就搭下爹。
傾傾下我都唔知傾到邊，佢就問我係唔係中意佢，我係用同佢開玩笑既心講:「係咁，我係中意你呀。」
我講果刻係feel到個面好紅，佢望住我果時既果塊面紅到我未見過咁紅，
所以我的確係表白，而且係第一次表白。
話返轉頭，我真係好難開口。
我問自己點解咁難開口，因為我天生係一個男仔，所以都唔希望傷害一個女仔。
但係一諗到如果我將來先講，好似仲更加唔好，所以我決定左要講出黎。
我諗到咁，即刻大膽哂。
「不如我地...」我深呼吸一下咁講「不如我地分手啦，好冇？」
我終於講到出口啦，好似開左個頭，其他野都好易講出口咁。
之後佢無講野，我就繼續接住個勢講。
「其實我有咩好，將來可以你會同我捱，我唔想你捱，而且....」講到呢度好似講到自己好好咁，但係確實係我想講既野。
跟住佢好似想講野咁，我就梗係講埋先啦。
「而且我一直都無中意過你。」
哇，屌你，雖然我想講，但唔好咁直接呀嘛，講完呢句我都覺得自己好賤，
賤到唔中意人同人一齊，仲要表白話中意佢果個都係我，我想埋左自己死左佢算。
「姐係你個心一直都無我？」條女話。
其實我想答有，你一直係我心入面都佔重要既位置，只係一直都無中意既感覺，或者係我當左你係我好朋友囉。
但係我無咁答，因為我怕再同你久纏落去，你唔會向前行，去忘記我，正如話長痛就不如短痛，所以我選擇否認。
「係。」我點一點頭。
條女眼睛水汪汪咁，忍住淚無出過一句聲，汁哂野走左。
我係睇住佢汁野，我一句挽留佢既野都無會講過，
因為我想佢走，又想佢唔好浪費自己既時間，所以我無送佢走。
我果晚，成晚都訓唔著，係度諗係唔係好對佢唔住呢?
其實我係咪應該咩都唔講？甚至到死果刻都唔講出黎，咁樣係唔係好啲？
不停諗，諗到天都光，我都訓唔著。
當我諗諗諗，諗到唔知幾時，我攰到訓著左。