無啦啦有兩條女同左我一齊住: 7

7.
冇幾耐,我地就返到屋企
正當我地開大門既時候,有一家三口響旁面條樓梯落黎(我姑丈住哂咩,仲有樓上兩家人嘛)
「黃生唔係移左民啦咩?....咦你好熟面口嘛」個阿姨指住我
「哦..黃生係我姑丈呀,呢幾個月會入黎住下既」
「係呀係呀,我記得你好似係叫池仔呀嘛,咦呢2位係?」
「呃..呃...呢...」大佬點答呀?佢唔會以為我地三個入黎玩3p掛
智詩插嘴:「係大學同學黎,我地冇hall住所以先入黎住姐」
「哦...原來係咁,我叫李太,呢個我老公同個仔,我地住樓上兩層架」咁有錢既
李生就普通一個中坑啦,個仔就好耐同我地差唔多大咁




個仔係咁望住阿白
我地同李太一家打過下招呼之後就返返入屋

一返到去,智詩就響梳化訓左
而阿白亦開始煮飯
我換完衫入去睇下,嘩屌,有板有眼喎
阿白已經著住條私家圍裙,落d炸粉落豬扒度

「咦阿白今晚食乜呀?」
「今晚食吉列豬扒,炒芽菜呀」阿白放左d豬扒落滾油度




「嘩,幾好餸呀,吉列豬扒你都識整呀?」其實老母煮黎煮去都係果幾味
阿白翻轉d豬扒:「係呀,我之前睇書學架,而且婆婆都教過下我煮野食...」
我見阿白踩完成日單車好攰咁:「我幫你炒芽菜丫」
「點..點好意思呀?今日係我負責喎」
「唔緊要啦,好快姐」我將阿白洗好既芽菜,放落鑊冰
「唔該哂你呀阿池」

搞左陣就有得食
我咬左啖豬扒
嘩屌!!好好食!!係好撚好食!!!




好食過果陣去日本食果間和幸
「喂阿白,d豬扒好好食呀,又脆又夠香」
「咁襯熱食多d丫」阿白夾多塊俾我
智詩皺眉哂:「喂,你係咁夾俾佢,我冇得食架啦」
「咁我夾埋俾你囉」

阿白爬多幾啖飯,講:「係丫,我個女學生話聽晚先補到習,我諗聽晚返唔到黎食飯啦」
我:「我聽晚都唔返黎食飯啦,我約左中學同學reu」
智詩一面無奈:「頂,咁即係聽晚冇著落啦,出街食算」
「拿,聽晚都計我煮左飯架,後晚到返阿池你!」

食完飯之後,大家都好早訓

轉眼間,就去到reu前夕
佢地約左6點響旺角其中一間partyroom搞reu,有d野食又可以傾下計咁囉




而我亦都特登靚得試正少少咁,恤衫牛仔褲咁啦都係
連子晉今日返學見到我都話:「嘩屌你,毒撚池你今晚去飲呀?」
輸人不輸陣,就算冇囡囡都唔可以太柒!

6點正,準時入去
一入到去,好多熟悉既臉孔都出現響我面前
個場都幾大,有部電視比人睇下dvd,有張大枱放哂d到會野食
「喂阿池hello!」阿王飲住七喜走過黎同我打招呼
「hi阿王」
之後再象徵式咁同d舊同學打下招呼之後
不過聽得最多既係
「同你介紹,呢個係我女朋友jenny」「同你介紹,呢個係我女朋友vicky」「同你介紹,呢個係我女朋友wendy」「同你介紹,呢個係我男朋友jack」「同你介紹,呢個係我男朋友tommy」「同你介紹,呢個係我男朋友vincent」
我望下全場d女,有d都唔差既,全部化哂妝咁
不過比起依家同我住既阿白,真係差得太遠





一對男女走向我
「好耐冇見啦阿池」屌,係大軍...同佢條女
「hello」我真係唔想理呢條濕鳩
「你依家讀咩呀?high dip定asso呀」佢讀港大science,不過成日都覺得自己好威威咁啦
「poly n展」我都盡量鳩hea答佢,等佢知難而退
「都好丫,返學咁近...同你介紹,呢個我女朋友jessica」
「你好」
「你呢?出左pool未呀?不過又難怪既,n展都冇女,哈哈哈...駛唔駛我介紹d女俾你呀」連埋佢條女都笑緊我
情況就好似新年d親戚問你拍左拖未咁,明知你溝唔到女都要特登串鳩你黎等自己有返d優越感
呢一刻,我真係好想搵窿捐

「阿池,sorry呀我遲左」呢把女聲,係來自門口
把聲好似好熟咁
我擰轉頭,就見到全場既目光都投向門口果條女
男既就流哂口水,女既就極葡萄




呢條女,就係智詩!

灰色鬆身背心,牛仔熱褲,照舊果對白色con屎,戴左d飾物咁
更加唔好講智詩既c cup身材
化埋少少淡妝,已經輕鬆ko呢度所有囡囡

智詩走埋黎,繞住我右手
「你地好呀,我係阿池女朋友,叫我智詩得啦」笑容滿面,小鳥依人既佢,同平時真係好大分別
果晚我仲以為佢係9up
我實在估唔到,智詩真係會黎扮我條女

「唔好意思呀阿池,今日放學遲左」智詩挨到勁埋,連把聲都變埋
我呢下真係受到太大衝擊,唔知俾咩反應
就好似朝早起身發現係謝安琪叫醒你一樣,你真係會成個人呆左





大軍個樣,既葡萄又難以置信
我冷靜返,洋洋得意咁講:「呢個我女朋友,智詩」

大軍口質質咁問:「你..你....地響邊..識架?」
屌,我點答呀

「我地係返補習班partime識架,係咪呀阿池?」丫屌智詩又諗好哂d答案喎
又繞哂手又用上目線望住我,呢刻既智詩真係好gfable
「係..係呀,我同阿智詩就係返partime識既,都拍左一年拖架啦」
「係呀,阿池佢好好人架,又叻」智詩係咁讚,搞到我都唔好意思
「阿池呀..我有d肚餓呀,去食d野丫」
「好丫」
我同智詩手拖手,行去大枱拎野食

全場既人,目光都投向我地呢一對「情侶」
雖然我都知係假,不過我都不禁流露出勝利者既笑容

「阿池~我要食意粉呀」智詩把聲嗲到嚇親我
我見冇乜人,細細起響佢耳邊問:「喂智詩你搞乜呀?」
「見你咁陰公,咪黎幫下你囉...你唔鐘意呀?我走囉」
我拉住智詩:「咁,咁又唔好,做戲做全套嘛」

「阿池~我餵你丫~~啊~~~~」智詩用膠叉卷起一堆肉醬意粉,遞向我口,我唯有一啖食哂啦
阿王走埋黎,眼都凸埋咁問:「嘩,阿池,你女朋友都幾靚女喎」
我:「都,都唔係好靚姐」

在場每一個男性動物實在估唔到,我江天池呢個死毒撚,唔單只溝到女
仲要係智詩呢位有樣有身材既靚女

食左一陣,之後成班友仔玩truth or dare
咁岩又中左智詩,智詩:「我揀dare啦」
阿王諗左陣,竟然話:「智詩,你嘴啖阿池啦」
「嘴佢!」「嘴佢!」「嘴佢!」「嘴佢!」「嘴佢!」「嘴佢!」「嘴佢!」「嘴佢!」「嘴佢!」「嘴佢!」「嘴佢!」「嘴佢!」

屌你呀,阿王
好玩唔玩,玩kiss?呢鋪實穿煲啦
要智詩扮我條女已經好委屈佢啦,仲要嘴...

「啜!」智詩一野嘴左落我左邊面
全場馬上歡呼,好比李思捷個one man show'今晚睇李'既觀眾,乜鳩都嗚嗚嗚

唔撚係掛,佢真係夠膽嘴?!
我呢刻就好似吳卓羲俾欣宜錫左啖咁,當然我比吳卓羲好彩啦
我摸一摸塊面,仲hi到智詩d唇膏印
我望住智詩,佢輕輕一笑:「點呀?唔鐘意呀?」
「唔係.....」

玩多陣,大約九點幾,大家就散左band
走果陣,班狗公仲想抄智詩牌(想俾帽我戴..食屎狗)
智詩當然唔俾啦

我同智詩坐番68x番元朗
我開口問:「喂,智詩?」
「做咩呀?」
「今晚既事唔該哂..」
佢飲左啖水:「上次村口隻狗單野你幫過我嘛,咪報答咪你囉」
「果次好小事姐,你回份咁大既禮..」又扮我條女又錫哂面珠登咁,我真係受唔起
「屌你男人老狗咁婆媽架,益左你就算啦!不過唔好同阿白講今晚單野呀...廢事佢以為我地拍拖呀」
「知啦...咁錫我單野..」
「是但啦,唔通果陣由佢穿煲咩...咪住先,你唔係未試過俾囡囡錫下話?」
問d咁既野,好尷尬姐:「未..未試過呀」
「你唔係掛?你成廿幾歲都未溝到女?」最後都係要俾佢恥笑
「咁我樣衰嘛,又矮」

智詩「控」到勁埋:「都唔係丫,你個樣都算幾試正丫,正正常常冇理由溝唔到女架喎」
「咁我本身響學校又係摺友黎,溝唔到女都正常丫」

「哼...咁抵你俾舊同學串啦柒頭,咁..你中學溝唔到女咩?」
我嘆一口氣:「我中學果陣曾經對個女仔有好感,而我每次足球校隊a grade比賽佢都會黎睇」
智詩打左我個頭一下:「喂,佢黎得睇你踢波,即係佢都對你有d意思囉傻仔,你果陣on9架?」
「最後佢去左英國讀書啦,之後都冇返過黎」

「你真係傻仔黎既,女仔諗咩野好易睇架咋」
全程車,我同智詩就係討論緊我以前既野
例如點解我溝唔到女呀,點解我咁樣衰呀等等

返到屋企既時候,就見到阿白坐左響廳睇達哥
「喂!!!!咁都射唔中,白痴仔黎架?」

「咦,阿池你同智詩一齊返黎既?」
智詩搶先答:「係丫,我響村口撞到佢」
「係呀,阿池黎睇達哥丫」
「好呀」阿白叫到,冇得say no啦
智詩:「其實呢個達哥有咩
好睇姐,睇人打不如自己打..」
........

「哈哈哈哈哈哈哈哈哈哈哈哈哈哈哈條友傻架哈哈哈咁都射唔中哈哈哈」
原來智詩仲癲過阿白,笑到成個may姐咁

我望住阿白同智詩,聽住佢地既笑聲
呢兩條女,似乎已經響我人生中,佔左個重要位置