無啦啦有兩條女同左我一齊住: 6

6.
「吓?唔撚係掛」我呆一呆,同佢對望左5秒
老老柒柒,尋晚都仲話我係變態佬,今日就話要扮我條女去威
d女人真係善變

「講下咋傻仔!即刻眼甘甘咁!」屌,又俾佢玩鳩
「好地地扮咩你條女呀,影衰我咋!」
「不過睇死你無論點都唔肯去架啦」

「屌你,我駛撚驚?」我會俾智詩拋到?食蕉啦




我拎出電話,終於搵到阿王電話number
「我係阿池,後晚我ok」
過多30秒,阿王就覆返:「ok,後晚6點西洋菜街果間greentree partyroom見啦」
我遞部電話俾智詩睇:「拿,咁得未呀?」


「唔比到時你縮沙呀?」智詩又飲左一啖,真係唔怕醉咁款
「屌你真係四方西黎既」
「食屎啦你四方撚!」
飲下屌下,最後唔知點解斷撚左片






-------------------------------
我身處一個更衣室
隊長拍拍我膊頭,同我講:「阿池,頭先果球中橫眉,係我地唔好彩姐」
「唔好氣餒呀」

我撥開隊長既手,拎起袋,走出更衣室
後面有人拉住我
「阿池,你..你點呀?」





「對唔住,麗娜」
「我,唔會再踢波架啦」


當我醒番既時候,我發現訓左響自己間房度
我慢慢組織番尋晚既事
同智詩飲酒,互屌,之後就斷左片

唔係屌屌下...真係屌左下話?!

我摸摸隔黎,好彩冇人
我唔想咩都唔知就做左爸爸呀

我開門,發現智詩已經坐左響度,食緊果醬方包飲緊奶




「估唔到你都幾廢架喎,飲幾啖就收皮,仲要我抬你入房」又俾智詩恥笑,屌
我緊係死都唔認啦:「屌我尋日攰姐」

呢個時候,阿白都起埋身,今次佢著粉紅色睡衣
我望下個鐘,10點幾
好彩今日dayoff姐

「早晨呀智詩,早晨呀阿池」
「阿白早晨,你地今日唔駛返學咩」
「今日dayoff呀,所以我先咁晏起身咋」

「我同智詩今日去吐露港踩單車呀,你去唔去呀?」
兩人望住我,好似等緊我回應

「好..好囉」我猶豫左陣先答到




老實講,其實今日我剩係想打下fifa上下網
不過阿白呢位靚女叫到,又好難拒絕既(智詩唔知啦下)

對上一次有女仔約我去邊度邊度,已經係中六



響一間茶餐廳入面
「阿池呀,我有d野...想同你講」響我眼前既女仔飲左一啖熱檸水
「你講丫」
「我下個月,就要去英國啦」
我呆左,成個空間得番茶記的冷氣機聲
「......咁..咁咪幾好,你又可以...讀到你想讀既..藥.藥劑」
「阿池,你唔好咁啦,我地仲係朋友黎架嘛」
「唔..唔好意思,我約左人,我走先」我放低錢,走出呢間茶記






「喂!喂!」智詩響我眼前係咁fing手「你做乜撚野發吽哣呀?」
我回番神「冇..冇野呀」
「換衫啦,出到大圍先再食野」



響元朗去大圍,最直接既就係西鐵再轉火車(東鐵係新移民同大陸人先會叫)
搞左成粒鐘,終於入到大圍,去到都差唔多12點
n年前上高登睇過奇樂快餐店好似唔錯
就帶左佢地試下
食完就去左借單車

我:「識踩,就一定要架dup頭」




智詩:「似你囉,矮,又dup頭」
「屌你老味呀」呢條女真係下下質著哂

由大圍出發既時候,我問阿白:「你同智詩成日出黎玩架?」
「有時啦,有時放假太攰都寧願唔出街啦」

其實我都係第一次響吐露港踩單車
「喂乜你地兩個咁慢架,快d啦」游智詩一開波就踩到咁快,小心冇氣呀屌你

今日都幾好天,仲好撚熱
我地三個踩左成粒鐘已經出哂汗
阿白話:「呢度個海景咁靚,不如我地三個影張自拍丫」
最後,阿白揸機,就影左第一張我地三個既自拍合照相
「嘻嘻,post上facebook先.....咦,我仲未知阿池你facebook喎」

add左阿白同智詩facebook,佢地icon都冇乜特別
雖然佢地facebook寫單身,但係佢地d status多數都好多男仔fd(狗公)like
而阿白岩岩既status(即係合照),就係寫:「與家人踩單車haha」
咁班狗公應該會以為我係佢d親戚
點會估到,我同呢兩條女,會住響同一屋簷下

最後我地踩到大埔還番架車之後,都4點幾
就搭番巴士返黎
好彩呢個鐘數仲未有太多人搭車,我地三個揀左上層最後一排坐

智詩一坐落最入面個位,就訓着左
我問:「阿白呀?其實呢,前幾日響巴士站智詩講果個支付寶單野係點架?」
阿白個樣變得尷尬,笑住講:「果陣我上緊堂,智詩去左廁所
我個line有人搵我,係我舅父黎,佢話佢急住要支付寶,叫我儘快買俾佢
好彩智詩返得切黎阻止我咋,如果唔係我又冇左幾千蚊啦」阿白講到呢度自己都扁哂嘴
我:「咁都係證明你係一個肯幫人既女仔姐,依家好少有架啦」
「真係既?智詩成日都話我唔識保護自己,果陣佢講到你又有陰謀又剩咁,但係相處左三日你都幾nice丫...智詩而家都冇咁防範你啦」

「阿白呀,你兩個冇屋企人咩」
「我爹dee響我細個就走左佬啦,我媽咪就改嫁左俾個大陸佬,掉低我俾婆婆」
「前幾年婆婆都過左身啦....至於智詩,中學果陣離家出走就黎左我婆婆度住啦」阿白講到呢度眼紅紅咁,我都知自己on9問錯野啦
「唔好意思呀,我唔知你地咁慘」我遞番張紙巾俾佢
「唔..唔緊要呀,一時間諗起婆婆姐」阿白抹抹眼,佢眼紅紅個樣真係我見尤憐,令人好想一野抱住佢

「係呢,阿池你有冇女朋友架?」阿白無啦啦咁問,嚇死我咩
「冇呀...一直都冇」「咁阿白你呢?」
「中學果陣有一個,依家冇啦」都合理丫,阿白咁靚冇人溝先唔正常
「冇理由架,你咁靚女又咁好人,咁都..」講講下,阿白既頭已經挨左落我膊頭上面,訓着左

我望住佢既臉龐,仲回想呢幾日既事
我諗,我對阿白開始有d好感