於這個Wtsapp群組中輸入名字，他就死路一條: 其之二十

其之二十)
 
「得架啦，記住唔好俾傷口惦到地面，ok? 妹妹，我幫你慢慢除低啲飾物先。」
「年青人，我依家同你用清水沖一沖傷口，之後會用消毒敷料幫你，會幾痛，要忍住，啲水泡唔好整穿呀，傷口感染會一命嗚呼架。」
「小姐你啲傷口紅、疼痛、腫脹，有出現水泡，但仲有無觸覺？」

張樂平以極高效率為我們斷症並作出初步治療...口吻與醫生無異。
眼看這診所中比起一般的還先進不少，儀器亦頗充足。那時我們決定跟他走，也許是做對了選擇吧？
 
回想起個多小時前，我們在小徑遇上他。




「我叫張樂平。」
於此時此刻此地出現的男人，加上這名字，可以肯定他就是群組中的樂平。連思想最跳躍的梁一懿都呆若木雞。他一直都是一個謎，甚至大家根本都當他是一個無人使用的空號，怎想到他竟會在關鍵時刻現身？
 
對於此男子，我們心中疑惑太多，一時之間反而構想不到完整的問題。
樂平苦笑說：「哎呀！估唔到我嘅出現竟然換嚟一陣冷場添！哈哈哈哈！你哋都受哂傷。不如爭取時間上我車，我帶你哋返診所處理傷口先啦！放心，我真係醫生嚟！」
 
這種展開實在太超過，他好像對所有事瞭如指掌，我們卻對他一無所知。有了阿偉叛變的經驗，我不敢輕信這個陌生人...也許他也是阿偉派來的刺客。
 
我冷冷的道：「我唔知你有咩企圖...但我哋一定唔會同你走！你太過可疑...」
樂平蹲下來，打開了手機，分別是《亡選(貳)》與《選擇者》的群組。




「喺2號求救在先，我嚟幫大家，唔會有咩企圖，就算有企圖，都係想解決依件事。」樂平語氣友善中帶沉穩。
 
阿空用僅餘的氣力：「你明明較咗顯示在線時間...如果你一直有觀察我哋，點解最後在線時間可以停喺01/04/2014？」
梁一懿亦質疑：「既然你一直都知，點解一句聲都唔出！咁都仲唔係有企圖？」
 
樂平一邊把玩著電話，再笑說：「小把戲啫～」
他在我們面前，首先關掉了所有Wifi與數據連線，再進入Wtsapp，他選擇了其中一個朋友的對話作回覆，輸入完成，因為沒有網絡，回覆並未成功發出。這刻他關掉Wtsapp，然後開啟數據連線。
「幾秒之後，Msg會成功送出，而Wtsapp唔會當你上過線，咁就可以營造你一直無用過Wtsapp嘅錯覺。同一道理，每次睇你哋嘅對話，都係熄哂Wifi同數據連線先，所以你哋都唔會知道我上過線。」樂平回答得清晰。
 
「你由2014年就開始咁做？你一早知會捲入依件事上面！」我愈問，心愈寒。




樂平急忙揮手：「緊係唔係！你同你哋一樣，都係突然入咗個Group，只係一年前有個女朋友太顛，成日Check我Wtsapp時間，我唔耐煩咪用依招囉，同埋我覺得啲人咁鐘意用科技竊探人哋生活，所以要用返科技嘅漏洞還擊！當然啦，見到《亡選(貳)》，加上陸百狗嘅死，第六感話我知有唔妥，所以我拒接所有來電，制造出『空號』嘅假象，隱藏自己，希望查清楚先現身。」
 
雖然他作出了解釋，但我還是懷有敵意：「你係查《亡選(貳)》，抑或查我哋呀？」
面對這惡意問題，他依然微笑：「兩者皆是。」
「眼下情況，跟我走係你哋唯一出路，小徑偏僻但總警察總會上嚟，唔會睇小佢哋嘅搜索範圍，加上你哋嘅傷勢，由其係依位小姐，唔接受治療就手尾長。加上我無惡意，因為三位嘅名字，我早就查到。要對你哋不利，唔使俾你哋見到我個樣啦。」他滔滔不絕。
 
我心中有火，想動手但苦於痛楚蔓延全身：「你唔好亂咁嗡！你查到哂我哋啲名？有咩證據呀！」
樂平表情保持溫和，把嘴巴湊近我的耳朵，以最小的聲量說：「江懷禮，依個算唔算證據呀？」
 
他，說中了。
我的神色被惶恐佔了六分，驚訝佔了四分。旁邊的梁一懿與阿空從我的反應也估計到這傢伙所言非虛。
 
「仲行唔行到呀？行到就上車啦，我哋時間唔多，喺車上話我知啱啱發生咩事，我再一路講自己查到啲咩。」
 
在短短三十分鐘車程上，我們簡單描述了工廈的死裡逃生。張樂平感覺滿輕鬆的說：「以我估計，你哋啲手機應該係陳仔手上。應該咁講，嗰個自稱阿偉嘅只係佢手下，係個替身。真正嘅阿偉係偷你哋電話嗰嗰人。」




（詳見其之十五：只見一個表情陰森的男子從窗外爬出，一把將我們的手機奪去！）
 
樂平嘗試代入阿偉的思想世界：「依個人行事小心，懶正氣得黎又陰陰濕濕，咩都諗定後路，佢點會放心俾人拎住自己部手機走人？講真一陣打起上黎佢走唔到？咪葬身火海？佢應該連陳仔都呃埋，真正嘅阿偉一早就係窗後面Standby，之後打包啲電話走，嗰時連陳仔部電話都喺佢度，仲唔玩哂？」
 
我對於樂平的冷靜與客觀非常佩服，這世界的確人外有人，突然感覺自己的心思比不上梁一懿與阿偉，與樂平的距離則更大。
 
梁一懿接著說：「所以阿偉一早就拎住啲手機走人，但佢估唔到我竟然先佢一步殺咗佢，喺佢後面嘅陳仔見佢突然死咗，六神無主之際就執哂啲手機走人？」
 
「百份之九十會出現依一幕。」樂平輕描淡寫。
我的手機落在陳仔手中的話，算是不幸中的大幸，陳仔應該不敢妄動。問題在於他會否落入其他人手中。
 
而阿空在傷重時也不忘問樂平：「你啱啱話查到啲嘢，係咩？我哋可以從《亡選(貳)》全身而退？」
 
車速維持在120公里，只是樂平的說話模式無視速度，保持條理清晰：「你唔覺得我哋嘅電話號碼有個地方好巧合咩？」
 




我把視線轉向梁一懿的手機中，群組資訊的一頁。
 
Admin：
+56 32 272 1093
阿空：
+852 X3541381
我：
+852 X564 0231
樂平：
+852 X5740043
Fiona Yu(Selina)：
+852 X1940993
LEE Ming Wai：
+852 X4040581
OneTwoThree(梁一懿)：




+852 X3441091
陳：
+852 X5420031
 
「有咩咁古怪？」我問。
 
「尾數，非1即3；第四個號碼，非4即2。」這是樂平的答案。
「好，就到啦，等我幫你哋處理傷口之後，再慢慢解釋。」
 
PS. 下一章明晚深夜時份!!謝謝!!