《我炒咗車之後入廠訓咗四年覺》: 班會旅行去邊好?
好彩呢個週末冇再發燒。星期一返學果陣，我嘅感冒已經好返好多…
結衣：咦？你今日嘅面色唔錯喎！好返啲未啊？
我：好返好多喇，多謝關心啊！
結衣：咁就好，呢排天氣開始回暖返，應該暫時冇咁易再病喇。
我：其實我想病多幾日啊，嘻嘻嘻！
結衣：點解想病多幾日？病咗唔係好辛苦嫁咩？
我：但係我病咗又可以偷多一兩日假喎！
結衣：懶啊你！懶蟲！死懶鬼！
結衣笑住打咗我手臂幾下。
我：哈！我認我係懶蟲啊！
結衣：哼！好意思認嫁喎！
班務時間之間，個班會主席話有啲嘢想同我地全班傾吓。原來下個星期五學校有教師發癲發展日，學校比多咗個假同學，咁佢地想下個星期五約出嚟一齊玩，問吓大家意見咁。
佢嘅提議好似幾受歡迎咁。
主席：咁大家有冇啲咩地方想去？
唔…
同學P︰不如去海洋公園吖？
同學Q︰form 1咪去咗囉！赤柱BBQ啦！
同學R︰又BBQ？悶唔悶啲呀，遊長洲啦！
長洲？
不如遊船河去？
三姨丈好似有遊艇喎…
我：喂，如果去長洲，不如遊埋船河去吖？
結衣︰遊艇？！
我：我有個親戚有架遊艇，我可以叫佢載我地去，中途仲可以上去玩。
主席：坐遊艇去旅行，好似ok喎！諗得過…
呢個時候，我聽到附近有男同學細細聲講…
男A︰坐遊艇，正啊！！
男B︰點解正？
男A︰有得睇女仔着泳衣啊！！你想像吓，特別係結衣呢種級數着三點式去遊水…
男B︰wow…諗起都正啊！嘻嘻…
我地班有質素嘅靚女同學都唔少嘅…
最後，班同學都係揀咗遊船河去長洲…
結衣：你啲親戚都都幾有米嫁喎！
我：佢地都係生意人嘛！
結衣：係呢chilam，晏晝一唔一齊食？
我：啊？我睇睇到時得唔得閒先啦…
====================
小息時間。
"喂！chilam！晴晴娘娘揾你啊！"有同學大叫。
"喂啊！我幾時做咗娘娘嫁！"
"WOE~~晴晴特登落嚟揾你啊！！"其他同學起哄。
我：你地真係…好無聊啊！
我立即行去課室門口。
我：晴晴，揾我？
晴晴：你食飯時間有冇時間返一返去？
我：應該ok嘅，咩事？
晴晴：我下晝有PE堂，但係冇帶衫…
我：咁呀…ok，你放咗喺我課室門口等我。
晴晴：唔該哂你啊真係！
晴晴捉住我隻手多謝我。
我：呃…唔駛…
"WOE~~拖手仔~~FF~"又有同學起哄。
我：多事啦你！
====================
小息之後，結衣食完喇返上嚟。
我：我轉頭返屋企食啊。
結衣：吓…咁算…
我：跟唔跟上嚟一齊食？
結衣：上…上嚟食？
我：係啊，我琴晚有啲餸剩。你順手幫我清咗佢，等我今晚可以食第二啲餸，好嗎？
結衣：咁…
結衣諗咗一陣，個樣顯得有啲緊張。
結衣：好…好啊…
我：做咩咁緊張啫？上嚟幫我清餸咋喎，我唔該你都嚟唔一切啦！
====================
"Goodbye class！！"
"Goodbye Mr. Tse"
同學魚貫行出課室，結衣跟住我行。
出咗課室之後我見到晴晴。
我：晴晴啊，結衣佢轉頭會嚟幫我清埋琴晚啲餸啊，你攞埋衫之後一齊幫手吖？
晴晴：啊…
我留意到晴晴個樣有少少變化。
晴晴：啊…好啊…
我：係喎結衣，我啱啱都冇同你講，晴晴可能會一齊食飯啊，你都一齊嚟吖？
結衣：啊，我…
我：come on! 多個口快啲清哂啊！
結衣：哦，咁好啦…
====================
結衣：哇！估唔到你屋企都係咁乾淨喎！我仲以為會好亂添！
佢一入嚟就咁講。
晴晴：係啊！平時有我得閒幫佢執屋嘛！
結衣好似無言喇。
我：哈…你估係男仔嘅屋企都係咁亂咩！反而有啲女仔嘅屋企或者房都會好亂啦！
我意味深長咁望一望晴晴。
我：係咪啊？
晴晴：喂…我有執房嫁！
我奸笑：我又冇話你，做咩自爆？
晴晴：你…
我：恭喜中伏！
結衣：你地真係好搞笑啊！
晴晴：唔關你事！
結衣又無言喇。
====================
好快就煮好哂飯，有菜，有肉餅，仲有啲煙鴨胸。
我將一碟碟餸由廚房攞出嚟。
我：食得飯喇！
我屋企嘅飯枱係長方型嘅，佢地坐哂我對面。
晴晴：貓仔，食多啲菜吖，有益啊！
晴晴夾咗一大注菜比我，個碗就快滿哂。
結衣：chilam，食多啲肉餅吖，好咪啊！
結衣又夾一大塊肉餅嚟，碗入面嘅食物就快要瀉出嚟喇！
我苦笑：喂喂，我叫你地嚟係清餸嫁！唔好質哂比我好冇？
我一路講一路夾一塊肉餅比結衣，又夾一啲煙鴨胸比晴晴。
我：麻煩你地幫吓手清多啲吖！唔該。
晴晴：喂，你想食肥我呀？
我：又話幫我清餸…而且你食極都唔肥嫁！
晴晴：哈…又係喎！
====================
食完飯返去果陣，見到路邊又有雪糕車。
我將架車泊去雪糕車前面。
我：我去買雪糕先…
結衣：我又要！請我！
晴晴：請埋我！
我：但係我淨係夠錢買兩個咋喎！
結衣：吓…
晴晴：咁請我！
結衣：喂啊！我出聲先嫁！
晴晴：但係我同佢熟啲喎。貓仔，請我！
一個form 7女仔同一個form 3女仔爭起嚟。
我：呃…唔好嘈喇！我兩個都請，我唔食喇！
晴晴、結衣：好嘢！
呼…
終於平息呢場爭鬥。
不過就犧牲咗我一杯雪糕。
唉。