《我炒咗車之後入廠訓咗四年覺》: 病人

啱啱食完飯洗完碗。 

晴晴：喂，可唔可以比條毛巾嚟？ 

我：喔。 

我入廁所攞我平時抹面條毛巾比佢。 

我：做乜？ 





晴晴攞咗個盆裝水。 

晴晴：你食完藥就上床先啦。 

我：哦… 

食過一包又一包五顏六色嘅"糖"之後，我就上咗床合埋眼。 

忽然覺得額頭一涼。 





我擘開對眼，發現原來係晴晴幫我敷毛巾。 

我：唔好敷毛巾喇，廚房冰格有冰袋啊… 

晴晴：吓？原來有冰袋啊？ 

我：早知你係要幫我降溫，你就講白啲啦，用冰袋唔駛咁煩嘛。 

晴晴：哦… 





然後我合埋眼繼續訓。期間感覺到條毛巾離開咗額頭，之後就係更涼嘅冰袋。 

冇耐周公就嚟揾我，一揾我就揾到夜晚。


=====================


燒已經退咗一大半。 

今次一起身我就立即着返件衫，費事凍親。 

噢！白白過咗半日，真係好唔爽！ 

不過我一撐起身之後，先發現晴晴係我身邊訓着咗。 





一定係幫我換冰袋照顧咗我成日，搞到好攰啦？ 

被都未冚好，你真係呢… 

小心又凍親啊… 

我幫佢冚好被之後，見有啲肚餓，就出咗去買嘢食，費事着爐。 

我行到附近一檔麵檔，叫咗外賣之後就挨喺路邊欄杆等嘢食。 

呢個時候見悶悶地，我就攞咗部電話出嚟打算碌兩碌。點知一睇，個mon就顯示住一個來電。 

我：喂？ 





晴晴：貓仔…你去咗邊啊…？一起身就唔見咗你，打咗幾次電話都唔通，WhatsApp又唔應，我好擔心你啊！ 

啊…係喎，今朝考試之前較咗静音，我都唔記得開返聲添！ 

我：哈…sorry啊，原來我較咗静音，sor…係呢，你食唔食嘢？我買緊麵啊… 

晴晴：哈，咁啱嘅？我今晚又想食車仔麵喎！ 

我：咁你想食咩啊晴晴娘娘？ 

晴晴：哈！你又窒我！ 

我：咁唔叫娘娘囉，皇后！ 

晴晴： 唔玩喇，我要個紫菜四寶麵啦。 





我：臣遵旨！ 

晴晴：病咗仲有心情玩，真係吖！ 

我：嘻嘻！我好返好多喇，有心喇。上嚟先講啦…


cut咗線之後我先至全日第一次睇WhatsApp，發現結衣都send咗幾段訊息嚟。 

結衣：hey… 

結衣：今日見到你個樣好似真係病病地咁，冇事嘛？ 

結衣：擔心你啊… 





結衣：上水果陣應吓我？ 

我就立即覆返佢。 

我：發咗燒，不過退咗好多，有心喇。 

################### 

我一邊食飯一邊碌住Facebook。 

一嚟真係唔想睇膠味濃郁嘅"愛。回家"送飯。 

二嚟，佢今日好似真係有啲病病地，我有少少擔心chilam。 

WhatsApp嘅訊息佢全日都冇睇，冇事嘛？ 

"叮！" 

啊！係chilam嘅訊息啊！ 

####################


結衣嘅狀態好快就變返"上線中"。 

結衣：退咗燒就好喇！你又會無啦啦感冒嘅… 

我：考試呢排我都係好夜先訓，抵抗力弱咗，冇計啦… 

結衣：下次小心啲嘛…係呢 
今日份卷識唔識做啊？ 

我：ok啦，我琴晚通頂溫書溫到3點，應該應付到掛？ 

結衣：哈…我琴晚9點半左右就訓，諗住3點左右起身溫書，點知5點先至醒啊，激死！ 

我：sosad… 

結衣：我驚我溫唔夠…sosad 

我：你份人咁聰明，今次考試應該冇事嘅… 

結衣：希望啦…