《我炒咗車之後入廠訓咗四年覺》: 返屋企

中午12點，刺骨嘅寒風迎接我出院。 

三姨媽原本打算百忙中抽時間接我出院，點知一個電話，佢又要飛去外國工幹。 

最後都係一條友自已出… 

唉！ 

有個太陽出嚟中和吓氣溫就好嚕… 





我走出醫院正門，搭小巴落山返歸。 

一路上行返屋企，我發覺周圍啲嘢嘅變化唔係好大，熟識嘅茶記、雜貨鋪仍然喺度。 

lunch食咩好呢？ 

嗯…都係返上屋企先…有啲攰… 

咦係喎…大閘嘅密碼呢？ 





都行開咗幾年啦？冇理由未轉掛？ 

三姨媽好似知道密碼嫁喎… 

咪住…佢去咗公幹，我咪揾唔到佢？？ 

唉頂！大檸樂！ 

我就喺密碼鎖前面苦思咗一陣，諗極都諗唔起之前三姨媽比我嘅密碼。 





女仔聲：唔該借借… 

我：喔…咦？你咪係… 

女仔：咦？！ 

我個腦一下子播返啲兒時回憶…


====================


我記得我讀小學之前，我成日去同對面屋個軒仔一齊玩，又周不時過佢屋企打機。 

直到小二嘅暑假，佢地就好似搬走咗。 





不過嗰陣嘅我有個等點，就係個腦得果4GB空間。 

即係中文嘅豬腦，英文嘅bird's brain呀。 

一兩個星期之後，我又諗住走去對面禁鐘。 

點知一開門… 

咦？！女仔嚟嘅？ 

女仔：揾邊個呀…咦？ 

我：咦？軒仔呢？ 





女仔：媽媽！！！！ 

之後有個姨姨出咗嚟。 

姨姨：咦？細佬，做咩啊？ 

我：姨姨，我想揾小白啊。 

姨姨：冇呢個人喎… 

呢個時候… 

媽媽： 啊仔！！我咪話咗嫁囉，軒仔搬走咗啦嘛！唔好煩住人！快啲返嚟！ 

媽媽：唔好意思啊，我個仔阻住咗你地… 





姨姨：唔緊要啦…


====================


之後，我啊媽就同佢地熟落咗，而且佢周地不時都嚟我地屋企一齊食飯。不過我就係未見過個女仔嘅爸爸，後來先知，原來佢地係單親家庭。 

之後，我就多咗個由細玩到大嘅女仔朋友，好似呢啲就係叫做青梅竹馬，後來仲做埋我小學同學添。呢個女仔叫晴晴。 

唔知幾時開始，我地就成日走去大家屋企玩，不過好似係佢成鬼日上嚟上嚟搞搞震多啲，多過我主動揾佢好多… 

吖唔係，係玩。 





果陣我屋企有乜玩具玩，我地就玩乜。不過男仔細細個都係玩車多，佢就成日陪我顛。 

我老豆又係好鐘意砌模型…吖，講白啲，係巴士模型。不過啲型號你又識條鐵咩！同你講我屋企有咩車型都嘥氣！ 

小學嗰陣佢成日教我砌，於是我又愈砌愈上癮，最後我成世都係訓老豆老母間房，因為原本比我訓嗰間用咗嚟擺呢啲。 

咁啊晴就成日都同我一齊砌，砌完慢慢上色。雖然成品都麻麻地吓，不過嗰陣搞掂之後都好大滿足感。 

呢種生活，好毒呢？ 

我果陣都唔明，點解佢會同我癲埋一份，陪我玩呢啲男仔先會玩嘅嘢。 

不過後來大過咗，我開始發現一啲嘢，呢啲後話。