《我炒咗車之後入廠訓咗四年覺》: 屋企樓下嘅重遇

晴晴：你係咪…貓仔？ 

我果吓真係呆一呆，因為估唔到冇見咁耐，佢仲會記得我。 

當你喺人生之中有幸遇到一個久別重逄嘅好朋友，你自然就會明白我嘅心情。 

我：你係…晴晴？我冇認錯人嗎？ 

晴晴：冇…冇啊… 





我：我地真係好耐冇見喇… 

晴晴：係呀…差唔多四年喇… 

梗係啦，我暈咗果四年，真係"夢中方一日"…都唔夠咋！對佢嚟講就幾年，對我嚟講幾個月嫁咋！ 

我地一路行，一路講吓啲近況。 

我：不過估唔到你仲認得我。 





晴晴：梗係啦！你個樣都冇乜點變… 

我：(=_=||) 

晴晴：不過個樣好似成熟同靚仔咗！ 

我：邊係…會唔會係咁… 

晴晴：咁係吖嘛…男神貓仔！ 





我：誒…！ 

17歲半仲係得米6多啲咁高，幾靚仔都冇用啦…下嘛？係咪先咁多位絲打？

我：你都係啦！冇見一排，你真係靚咗好多喎… 

晴晴佢即刻有啲面紅。又會咁易面紅嘅…哈！ 

晴晴：乜係咩… 

我笑笑口講：你靚咗咁多，喺學校一定做咗唔少男同學嘅女神啦！ 

晴晴笑而不語。不過睇佢個樣都知，佢一定有唔少裙下之臣啦！ 

其實晴晴個樣真係變靚咗好多。而家已經係紮馬尾、鄰家女孩果類，仲要係"好pure好true"果啲，應該已經屬於女神級。 





晴晴：係呢…我記得你當年係因為入咗醫院先冇返學嫁喎…冇見你咁耐，近排點樣？好返未？ 

我：好返喇…咪入咗廠訓足四年囉！訓醒就留多幾個月囉… 

晴晴：哦…我仲以為你地搬咗屋添。咁auntie uncle呢？呢四年又唔見佢地嘅？ 

我：佢地嘛… 

爸爸？媽媽？ 

我黯然低頭，腳步一下停住，一時間唔知比咩反應好。 

佢地…近況又點樣呢？天堂嘅生活好過嗎？ 





一滴暖暖嘅眼淚流經臉頰。 

晴晴：係咪佢地有啲事令到你唔開心？你唔想講嘅話唔緊要嫁… 

嗯？ 

我抬頭望望佢，從佢嘅眼神睇得出，佢好想同我分擔一吓我嘅失落。 

晴晴：總之到你有一刻準備好同我講果陣，我唔會介意做你嘅聆聽者嫁…我會一直陪住你嫁…

之後晴晴佢輕輕攬一攬我，拍拍我背脊。 

我：嗯… 

人生一定會遇到一啲事令到我地好感動。對於我嚟講，喺呢一刻有個真正關心自已嘅朋友已經係一件好難得嘅事，我真係好感動… 





我：啊晴… 

晴晴：嗯？ 

我：多謝你… 

過咗一陣，晴晴就放開咗我。 

晴晴：嗯…返去喇。 

不過佢居然不知不覺咁拖住我隻手嚟行…但係我一啲都冇介意嘅感覺… 

點解呢？我都唔係好清楚… 





之後果段路，佢就冇再撩我講嘢，可能佢察覺到我呢一刻嘅心情掛。 

直到我地行到屋企門口。 

晴晴： 係呢…你食咗飯未？ 

我：未啊…啱啱見出院咋… 

晴晴： 咁你等我吖，我煮埋你果份。 

我淺笑：好呀，唔該哂。