《我可以做你的樹洞嗎?》: 17.玩火

「唔好意思，冇事嘛你?」

我抑頭一望，我撞到既人居然係嘉渝，我既前度。

「......好耐冇見。」

三年啦，外表上嘉渝變左好多。可能因為受外國文化浸淫，所以衣著性感左好多。嘉渝著住露肚臍既白色背心同黑色熱褲，加上天生既魔鬼身材，有點惹火。

「係呀......」突然之間撞返佢，一時之間都唔知俾咩反應好。





「不如去飲杯野?」嘉渝望一望我著落街既拖鞋，似乎知道我只係得閒落街行下。

「Err...」我好似冇藉口推搪。

「行啦。」

嘉渝將我帶到附近既一間酒吧。入面有唔少人見到嘉渝都向佢打招呼，似乎佢成日都落黎。

「你飲咩?」嘉渝問我。





「Err...是但啦。」其實我飲啤酒多，但係嘉渝睇落好似識好多種酒，唔知有咩好介紹呢?

「咁半打啤酒先啦。」嘉渝向侍應講，然後向我單一單眼。

估唔到時間過得咁快，而我地重逢之日居然係去酒吧。

中學時既我倆，大概唔識飲酒吧?

啤酒好快就送到，嘉渝將其中一罐遞俾我，然後自己都開左一罐黎飲。





一飲而盡。

我一邊驚訝住嘉渝既酒量，一邊感受到佢眼角流露出黎既哀傷。

「飲啦!」嘉渝對我笑一笑，然後準備開第二罐啤酒。

「你係咪有咩唔開心?」我遞出手阻止佢。

「冇呀，你以為自己識讀心呀?」嘉渝揮開我隻手，繼續飲第二罐:「咁耐冇見就陪我飲啦!」

都岩既，就算有唔開心，都冇可能問一兩句就將自己心底既秘密講哂出黎。

或者呢家既我，只可以陪佢飲酒。

半打酒，眨下眼就飲哂。於是，嘉渝又叫多左一打酒。





以前識嘉渝都唔知原來佢咁飲得，又或者係因為佢去左外國之後學識左飲酒，愈飲愈多而練返黎。

自一次同親戚食飯俾舅父叫我飲酒之後，我就發現我係好難飲醉同埋飲極都唔會面紅既人。雖然係咁，但我都唔係成日飲。

因為飲再多既酒都只可以填滿個肚，填唔滿心靈。

見到嘉渝咁樣飲法，傷心仲多過傷身吧?

「其實我好唔開心......」嘉渝塊面開始變紅，似乎醉醉地:「~!@#$%^&*()_」

「你講咩呀?」我將隻耳仔烘埋嘉渝到聽佢講野。

「我話......我......仲好......掛......住......」





「嘔!」

就係咁，嘉渝嘔到我成面都係。

其實我真係好想爆粗，只不過見住嘉渝醉左個樣真係嬲唔落。

「要嘔就一次過嘔乾淨佢啦。」我用紙巾抹面，再扶嘉渝去廁所嘔。

一邊掃背一邊望住咁辛苦既嘉渝，心裡有點難受。

「......唔好對我咁好。」嘉渝清醒返少少，再次推開我隻手:「我知道你已經有曉凝。」

「......咁關心朋友都好應該姐!」雖說我冇咁易醉，但飲左咁多我個頭都開始有d痛:「返去啦! 唔好再飲。」

我慢慢起身，再扶起佢。





點知，我踩左落灘水到跣低左。

差啲我就同嘉渝頭撼頭，好在我反應夠快，用雙手支撐住廁格既兩面牆，不至於完全撞落嘉渝身上。

但係我同佢幾乎臉貼臉。