《我可以做你的樹洞嗎?》: 16.理想與現實

所謂愛情，大概分為曖昧期丶熱戀期丶過渡期等等。

曖昧期，應該係由細至大都算係? 數數手指都有十年。雖然最後係因為機緣巧合先係埋一齊。

據非正式統計，熱戀期大概會維持六至八個月。如果你係未拍過拖既話，等我解釋下咩叫做熱戀期。

好簡單，熱戀期就係伴侶放屁你都會覺得香不斷聞既時期。

你每一日都會想見到佢，就算訓覺都會夢見佢。





你地出去邊度都唔緊要，最緊要係見到佢，有佢陪係你身邊。

所有野就好似係童話故事入黎發生咁:「王子同公主已經幸福快樂咁生活落去。」

但係，一但過左熱戀期，踏入過渡期之後，就明白現實同理想差好遠。

* * *

現實中從來都冇王子同公主。





「點解你唔明我心入面諗緊咩野?」曉凝一掌打落我塊面到。

呢一掌唔單止打落我塊面到，更打我個心到。 從佢既力度話俾我知，佢會記住我岩岩所講既野。

同曉凝一齊左既呢一年半黎，我同曉凝都應該算係維持係熱戀期內。我地好少會爭執，可能係因為識得太耐既原因啦。點樣去站係對方立場諗，點樣去遷就對方已經係家常便飯冇難度。

可能因為咁，所以一嘈起黎情況就會一發不可收拾。

學校襯住放新年假舉辦左個攝影比賽，平時鐘意影開大自然相既曉凝，今年搵我陪佢去影相參賽。起初，曉凝提議去西貢。但係諗深一層，應該有好多人都會去影大自然風景，相比之下主題冇咁突出。於是我就提議去AxA carnival，一方面可以玩攤位同機動遊戲，另一方面又可以順便影埋主題唔同既相。





我地帶齊攝影器材，交低二百蚊入場費，就開始我地既攝影之旅。

「你記住丫，攝影係拍攝出人同事物最自然個一刻。」 曉凝入場個時同我講。

跟住，我show咗一張曉凝之前行山影大自然既相俾佢。

「咸濕仔，你幾時影架。」曉凝睥住我。

可能我用低炒既角度，所以佢先至話我咸濕仔。

「我想捕捉你最靚個一刻。」

張相係我由曉凝背面影過去，而夕陽就係佢面前。

我地用唔同角度去影唔同既人。有一對對既情侶坐住幸福摩天輪丶有一家人帶住個細路去玩拋波，亦有老夫老妻係到散步。





過左一個鐘左右之後，我地已經影哂全場，而且我地亦都好滿意啲相既質素。所以，就到我地開始玩既時候。

我同曉凝登上摩天輪，由高空望向下面，望向外面。夕陽慢慢從西山落下。

「你望下果邊個細路幾得意?」曉凝指向摩天輪下面，正在排隊既一個細路:「我諗好架啦......到時如果生仔呢，就叫凌晨星，女呢，就叫凌晨曦。好唔好呀? 凌佑霖?」

「咁快就諗咁長遠既野啦? 呢家我既目標係畢業咋喎!」我伸個懶腰。

「我諗好哂架啦! 我地搞ig shop同埋返兼職都已經儲埋儲埋唔少錢。到畢左業之後返一年到工，應該就可以組織到我地既小家庭。」

曉凝一向做事認真我知道，但係我卻從來無考慮過成家立室既事。

唔係話我唔愛佢，而係......而係我真係冇諗過原來我地已經咁大個人。





一時間，我真係唔識點答佢。

「原來你咩都冇諗過......?」氣氛開始變得凝重，曉凝亦打破沉默:「我地都拍左拖有一段日子，而且又已經差唔多要畢業......」

摩天輪旅程完結，我同曉凝唔再離地，而係返到地面上。

然後幸福留係幸福摩天輪上。

平時對住曉凝有好多野講既我，此刻居然一句說話都講唔出。

我同曉凝步向地鐵站，途中我腦海裡不斷出現同曉凝岩岩係摩天輪上既情景。

「我走先啦。」曉凝頭也不回。

原來我諗得太入神，我同佢已經行到地鐵站。





而曉凝係我未黎得切反應之前，已經消失係人海之中。 

自果一日起，曉凝就再冇搵過我。而我，亦都唔知搵佢可以講啲咩好。

放假既呢段日子以黎，我漸漸開始思考曉凝提及既問題。

呢家既佢，一定係覺得我對未來，對佢既幸福冇打算過。

但事實上唔係，而係我覺得結婚咁大件事真係要諗得清清楚楚。

在我而言，結婚唔只係簽個名，讀段宣言咁簡單。

而係一世既承諾。





由細到大，我都係同阿爸阿媽一齊住。

直到我小三既時候，我阿媽同我講，阿爸唔會再返黎。

我以為阿爸佢死左，於是就喊，不斷咁喊。

喊到本來忍住淚水既阿媽都喊埋一份。

到後來懂事之後，阿媽先同我解釋返，原來阿爸出面有左第二個女人。

一方面我好憎我阿爸，好憎佢拋棄我同阿媽，好憎佢鐘意左第二個。

另一方面，我睇唔透點解婚姻可以咁脆弱。

「從今時直到永遠，無論是順境或是逆境丶富裕或貧窮丶健康或疾病丶快樂或憂愁，我將永遠愛著您丶珍惜您，對您忠實，直到永永遠遠。」

一切都係謊言。

* * *

望住曉凝「在線上」既wtsapp，我想搵佢又唔知講咩好，如是者持續左幾個鐘。

「唉，落街行轉。」

我沿住樓下條街一直行一直行，好想呢家面對緊既煩惱可以行行下跌哂落地。

「呢家有邊個可以打救我？」

掛住諗野，我一個不留神係轉角位撞到人。