《我可以做你的樹洞嗎?》: 3.大學死黨

「喂!做咩發哂呆呀!食快啲啦就黎遲到啦!」一把聲音將我由回憶拉返去現實。

我同曉凝係大學canteen入面食緊早餐。

自從果件事發生左之後，我地就再冇理過對方。什至係學校、自修室見到對方時，都會專登掉頭走。然後中六study leave果段時間，我亦再冇係自修室見過佢既出現。

我好順利一take過考左入大學。但係，曉凝居然失左手，要retake一年。

直到佢同我考入同一間大學，時間又沖淡左件事，我地終於重新做返朋友。





「得啦得啦。」

食完之後，我同曉凝一齊行去上堂。沿途有好多男仔經過同佢打招呼，而曉凝都用微笑回應。

「唔好意思呀!」曉凝突然停低，向我鞠躬:「又搵你過橋。」

「哈哈!」我抓抓頭皮，發覺自己唔係咁熟悉對我有禮貌既曉凝。

曉凝為左快啲適應大學既生活，所以參加左好多o camp，從中亦都識左好多人，當中梗係唔缺乏男仔啦。而且以曉凝既容貌丶身材丶完全唔港女既性格，被封為「女神」實在不足為奇。





除非果啲男仔好似我咁，知道佢好多秘密。

去到lecture hall門口，我同曉凝道別後，獨自一個行入去。

其實......其實曉凝果陣真係講得冇錯既......嘉渝真係搵我黎zip時間，搵我黎填補佢感情真空期。但係就算俾我揀多一次，我都一定會揀同嘉渝一齊。因為......因為旁觀者清，當局者迷。

只係有啲後悔，我同曉凝既感情因為呢件事而受到考驗。

坐係後排既雯凱向我招手，並且騰空左佢隔離擺滿書丶筆記既位。但係我扮睇唔到，自己一個人坐係最前果排。





「唔好意思，我遲到!」突然有個人衝門而入，並且同教授道歉。

我望都唔洗望，就知道佢係駿耀。

「坐低啦。」教授話。

「究竟你有邊次會準時到架?」我望望手錶，發現佢又遲左半個鐘。然後我將放係隔離既筆記攞俾佢。

「唔係呢!今次真係有重要事先遲到。」

「你次次都係呢句架啦。」

「唔係呢!我岩岩去左隔離班房偷睇曉凝，佢真係好正呀......你同佢咁熟，可唔可以介紹我俾佢識呀?」駿耀雙手合十，擺出一個苦苦哀求既樣，但係佢猥瑣既眼神，真係一下就挑起我把火。

「平時你點樣昅女我唔理，但係你知曉凝係我邊個架啦!做兄弟既你咁都問得出?」我嬲到彈起，然後一下轟落張枱到。





但係過左唔夠一秒我就後悔。