《我可以做你的樹洞嗎?》: 4.紅顏?

手機既「雀仔聲」傳到我既耳仔入面。嘈醒左就黎夠鐘起身既我。

「可以陪我食飯嗎?」原來係雯凱。

我彈落床，踢住拖，著住睡衣行落canteen，牙都唔洗刷。

遙遙已經見到雯凱坐係窗邊既位置，仲要已經買埋我最鍾意食既頹飯。

「等左好耐呀?」我問左條得一個答案既問題。





「Er.....唔係呀。」

「咁你搵我食飯做咩?」我隨即坐低，拿起餐具開餐。

「冇呀......」雯凱低下頭，隔一陣再答我:「上lecture既時候......你可唔可以同我一齊坐呀?」

咩都會問「點解呀?」既我，係呢個情況下冇問到。

「好呀!但係唔好坐後排，我唔鍾意坐咁後。」





本身低頭既雯凱，抬起頭望住我，面露住好靚既笑容:「原來係咁!」

食完之後，我俾返飯錢佢。然後一個人返上hall。

其實雯凱係個唔錯既女仔。

* * *

因為尋晚失眠，而早左半個鍾去到lecture hall既我，居然見到雯凱都係咁早就到左。





坐係前排既雯凱，今次再冇向我招手同埋搬走佢隔離位既書同筆記，反而係好認真咁寫緊野。

而我一直由門口行過去，佢居然都冇發現我既存在。

於是我一步一步，慢慢咁行去佢隔離。

佢寫緊......佢寫緊......佢寫緊......!?

「哇!」突然一聲大叫聲，震到我耳膜都差唔多穿埋:「......佑霖，你咁早到既?」

經過半秒錯愕後，佢用手遮實佢寫緊既野。

「係呀!失眠咪早左到囉!」我望望周圍，發現早到既只有我同雯凱:「你又咁早既?」

「我驚遲左會冇前排坐......」雯凱講到一半，又低下頭。





呢個情況，令到我地兩個都好尷尬:「咦?咩書黎架?」我指向擺係佢右邊一本封面係白色，有對男女拖住手既書，扯開話題。

「係高登作者默墨既《賈渝，我們在一起。》」講到本書，佢由本身怕怕羞羞變到好雀躍:「本書係講師生戀架。我睇左好幾次架啦!次次俾男女主角之間既感情感動到喊。」

冇諗過，同我一樣讀應用科學既雯凱，居然係個咁感性既人。

仲要係個常駐高登講故台既絲打。

「我借俾你睇丫!」雯凱將本書隊俾我。

「呀......好呀。」平時唔睇書既我，唔好意思推搪佢，只好微笑住咁答佢。

「你平時有睇開呢類書架?」雯凱將食指擺係嘴邊，一面好奇。





「哈......」一時我亦都唔知點答:「係呀......」

我同雯凱一直傾得幾投契，佢講下佢鍾意睇既書時，我又講下我鍾意既興趣。直到正式上lecture我地先收拾返輕鬆既心情。然後駿耀又遲到，佢入到黎lecture hall發現我左邊有個陌生同學坐緊，右邊就雯凱坐緊。佢只好向我舉起手指公，奸笑住咁行去後面坐。

「有事搵你，一陣舊can等。」手機傳黎訊息。