[舊文重修] 假如蝙蝠俠想做的，其實是小丑。: 8.

的士跟住架貨Van，去到一個郊外既貨倉。的士停左係遠少少既地方，我準備落車。
「知唔知呢度係邊度。」我問司機。
司機講左呢度既位置之後，問：「你係咪騎士？你呢家出動去救人呀？我成家都好支持你架！加油呀兄弟！」
我望左佢一眼，唔想答佢，好快就落左車。
 
一落車，電話就響起。好彩較左靜音。
係阿福。
「仆街仔，你唔撚係又扮騎士下話？」佢一開口就屌。
「係。同你講，我已經搵到面具人。」
「邊撚個面具人呀？」




「面具人咪個白西裝友……」
「戇鳩仔！你嫌命長咩！我叫鳩左你唔好再扮騎士，你係要唔聽，仲要去搵佢！」阿福好激動。
「信我啦，今次一定掂，好快我就可以鹹魚番生！」我第一次充滿自信，「不過，我要阿福你幫我手。」
 
深夜既郊外，瀰漫一種城市感受唔到既廣闊同安寧。
一輪彎月印於星空之上，所映照既，卻係地上一陣淡淡既殺意。
我已經黎到貨倉前。
貨倉好大，有兩三層高，從窗口望入去，個格局好明顯係黑幫用黎收藏軍火用。
裡面燈火並唔通明，有幾盞燈仲閃下閃下，令到貨倉既氣氛格外陰森。
而係暗淡既燈光之下，我見到兩個假騎士比幾個蒙面人毆打緊。




佢地面前仲有一個白色人影坐左係度。
面具人。
佢不動聲息咁坐係一張摺櫈上面，靜觀假騎士比人打既情景。
面具之下，佢既表情係點，冇人睇得出。
 
我繼續係外面觀察，留意到有一個窗口，因為上面盞燈壞左而特別暗。
我烏低身，過到去個邊，由個窗口爬左入去貨倉裡面。
佢地未發現我。
佢地被假騎士身上發出既拳擊聲所吸引，而我輕浮既腳步亦引起唔到佢地注意。
我發現貨倉既燈掣，就係我既不遠處。




天助我也。
我本來仲諗緊，行邊條路去搵個燈掣，我從來冇諗過會順利成咁。
我深呼吸，然後走去燈掣度，一拉掣，整個貨倉頓時進入黑暗。
 
漆黑一片。
「做乜？」
「停電？」
「唔係……係佢！」
 
我飛撲向面具人既方向，一手禁低左一個人。
我一拳打落佢塊面，感覺到硬物同我拳上的鐵蓮花碰撞。
係面具，佢就係面具人！
我立即亂拳毆打佢，唔比佢任何還手既機會！
 
呢個就係我黎呢度既目的。




我要利用黑暗同恐懼作為我既掩護，擒賊先擒王，係呢度擊潰面具人！
只要頭領收皮，我就有機會控制佢地既手下。反正我爛命一條，我要用我條命去搏一鋪！
每次成為騎士，我都會係某啲方面出奇地好運，估唔到今次都唔例外，更加估唔到電影學返黎既方法真係行得通。
只不過好運，往往都唔係我所希望既個種。
 
突然強光一閃，貨倉開左燈。
面具人企左係上一層走廊。
「終於見到真正既你喇。」佢話。
我愕然。
我感覺到，我地面具下被隱藏既眼神，係空中交接，激起一陣火光。
「你剛才打既，只係我既替身。」
我望向比我捉住、打到訓係地下既人，同樣帶住傑克面具，我分唔清邊個打邊個。
「騎士，你知唔知我幾咁想見下你。」佢講完，蚊左一支手槍出黎。
而我亦發現自己比蒙面人包圍。
我係心入面嘆息，果然個天唔會比我如願。




好彩，我既計劃，其實仲有一半。
 
「咁你知唔知有班人都好想見下你。」我話。
貨倉外同時傳黎警鳴同車聲。