[舊文重修] 假如蝙蝠俠想做的，其實是小丑。: 7.

一整日，我心口都好似比十個未減肥既欣宜擲住咁，逗唔到半啖氣。
我以為黑仔既，就只有我一個，失敗只會降臨係我身上。
最多只係咁姐。
但我估唔到，我既惡運連其他人都影響埋。
我害死左人。
 
「你害死左人。」
阿福返工前同我講。
「我唔知會搞成咁……」我望住地下，唔敢直視佢雙眼。
「我知。你條友最初只係想打劫，冇諗過會發展到咁撚樣。」阿福搭一搭我膞頭：「但係呢個世界就係你想像唔到咁柒癲，你控制唔到。當有癲佬扮蝙蝠俠去做英雄，就會有癲佬扮小丑去挑釁佢。現實唔同拍戲，真正既壞人唔會比你做到英雄，只會血淋淋咁毀滅你。就好似呢班人咁，你好似電影既蝙蝠俠去救人，佢地就用返電影橋段入面小丑既殺人手法去殺人……」




阿福停左一陣，可能覺得自己講太多。
「總之，現實世界係冇可能有英雄。唔好再諗咁多，以後咪撚再扮騎士喇，好快就冇事。」
佢講完，開門走左。
我知道阿福想安慰我，但係我既心情唔能夠因為幾句而好轉。
果個人被殺既畫面，不停係我腦入面打轉。
 
我想知道個班人係乜野人。
我一上網，無論邊一個網站，都熱烈討論緊假騎士公開被殺一事。
有警方宣言嚴禁任何人破壞社會秩序，將全力緝拿犯案人士。
討論區有人話係佢地自己死蠢，冇咁大個頭戴咁大帽；




亦有人話係騎士害死佢地。
我唔想知呢啲，我唔想再探討呢個問題，呢啲野留返比阿福呢類人去諗飽佢。
我只係要知道個班人係乜水。
好快，我就係高登搵到線索。
 
佢地係最近先興起既一個黑幫。
唔係，應該話，個白西裝友係最近先發圍既一個黑幫大佬。
傳聞佢用左一晚，以一人之力摧毀左香港最大既一個黑幫集團。因為佢既危險性同犯罪魅力，立即被各路人馬推舉為新一任既首腦。
冇人知佢係邊個，黎至邊度，大家只係幫佢起左一個外號──
面具人。




而佢出現個日，係係騎士第二次出現之後一日。
 
夜晚，我再次成為騎士。
網上面果個巡邏組織未解散，雖然有好多人淆底離開，不過依然有人堅持宣揚騎士精神，唔向惡勢力低頭，繼續夜晚落街巡邏。
我就係要等個班死蠢。
 
我喱係平日最多搶劫案發生既巷仔，等唔夠一個鐘，兩個假騎士就出現。
佢地唔似我咁喱埋，而係大搖大擺咁從巷既中間行出大街。
戇鳩仔，咁樣冇事先奇啦！
我再跟住佢地半個鐘，果然有事發生。
 
佢地無啦啦同一班MK初則口角，繼而動武。
我諗唔明點解會打起上黎，可能佢地各自都覺得自己好型，對方好戇鳩。
佢地係我眼中，個個都咁戇鳩。
我發現其中一個MK打左一個電話。




唔駛一陣，一架貨Van高速駛至，開門跳出幾個蒙面大隻佬，對住兩個假騎士拳打腳踢，然後夾左佢地上車。
我心諗一句：屌你正呀喂！
我人生第一次行動得咁成功，一如我計劃般進行。我好感動，好想大聲多謝我老母。
我認得出，個啲蒙面人既衣著，同電視個啲係一樣。
佢地係面具人既手下。
 
我跑出去，截左一架的士，跳上後座。
司機見到我，嚇左一嚇，之後問我：「大佬，打劫？」
「唔係，跟住前面架貨Van。」我壓低把聲答，「不過我冇錢。」
司機拉一拉掣，打開我個邊度門。
「你想你載我過去，定係我自己渣你架的士過去？」我問。
司機靜左兩秒，關門踩油，全速追個架貨Van。
 
我知道佢地去緊既地方，面具人一定係度。
我要佢收皮。




唔係因為佢係邪惡大罪犯，唔係因為我要幫個假騎士報仇。
而係因為佢成功做左我想做既野！
我要取代佢！