[舊文重修] 假如蝙蝠俠想做的，其實是小丑。: 9.

外面黎既，當然係警車同警察。
呢個本來係我打算用黎控制班賊既手段。
頭先同阿福講電話個陣，我拜託佢做既，就係幫我落街去電話亭報警，將蒙面人捉左兩個假騎士黎呢度既事，話比差佬聽。
我計過，由阿福落樓，到差佬黎到，大約要十五至二十分鐘。
只要我打低左面具人，佢地群龍無首之際，突然差佬出現，我就以料事如神之勢，救佢地出困境。
針對佢地徬徨無助同對我恐懼既心理弱點，我好快就可以成為新既領袖。
我可以從此大富大貴，過住傳說中黑幫老大既夢幻生活。
我可以由垃圾墮落到更黑暗既層次，成為地下世界既霸主。
不過今鑊我真係中撚晒伏。
 




我打錯人。
差佬亦早到左！
 
「裡面既人聽住，你地已經被重重包圍！」貨倉外面傳來差佬嗌咪既聲音，同時響起佢地撞開鐵門既碰撞聲。
「死！差佬！」
「點算？」
果然，佢地混亂起黎。
之但係有撚用咩！面具人仲龍精虎猛咁企左係度！
 
我眼見蒙面人係腰間蚊出手槍，齊齊望向大門。




我知道呢度好快就會有一場血腥既大槍戰，而好明顯槍戰呢味野唔岩我。
所以我係佢地分心望向大門個一瞬間，立跑！
 
「轟！」
一聲槍鳴，一閃槍火！
我感到手臂一陣灼熱。
仆街，有人開槍！
 
我誓估唔到面具人既雙眼竟然冇離開過我半秒，完全不為差佬所動。有一剎那，我以後面具人係基既。
好彩，就算佢係基佬，都係一個眼界唔好既基佬。




子彈只係擦過我手臂，並冇真係打中我。
我唔理得咁多，腳步未有停，伴隨身邊既槍火，衝向最近既窗口，一躍而出！
我跌出貨倉外既草地，同時聽見裡面傳來破門聲與駁火聲。
我唔想再理，起身向前衝，發覺出面一個人都冇。
挑！又話重重包圍，原來只係包圍個門口仔，冇啲料到。
 
我繼續跑。
出到馬路，心裡面正諗緊點樣走之際，一架的士駛到我面前。
原來係頭先個司機。
「上車！」佢打開後座車門，擺出一雙梁朝偉般的眼神。
我對佢既形象冇興趣，不過照上左車。
上車一刻，不遠處的貨倉發生爆炸！
「哇！我屌！咁撚誇！」司機大叫一聲，極速踩油。
其實我心入面都係諗住同一句野，不過講出口既係另一句說話：
「唔該。」




佢微笑，答：「呢啲係男人既浪漫。」
 
車程上，司機不停講野。
「哇，幾廿歲人，都未見過啲咁既場面！返去同老婆仔女有排威！」
我冇應佢。
「頭先見你單拖入去，都知你有危險，咪抱住睇戲既心態留低，估唔到竟然幫到你！」
我依然冇應佢。
我其實好應該應下呢個救左我既人幾句，不過我心情實在好差。
本來我已經習慣晒失敗，我本身就係一個失敗既廢柴。
但係，騎士既呢種失敗法，卻係第一次。
我好唔爽。
我唔知係我開始著迷於成為騎士既感覺，定係因為我今次收唔到面具人皮。
總之我未試過有呢家咁既感覺。
 
第二日既新聞，當然係呢單野。




我從新聞上得知，警察攻入貨倉之後，面具人引爆入面地下既炸彈。
大部分賊人死既死，傷既傷，亦有警察受重傷。
面具人成功走甩左。
不過，兩個假騎士卻奇蹟生還。
阿福冇評論過呢件事，可能仲嬲緊我唔聽佢講而扮騎士行動。
我坐係地下，心情怪得冇辦法形容。