[舊文重修] 假如蝙蝠俠想做的，其實是小丑。: 6.

星期日中午，我一身騎士既打扮，企左係阿福屋企門口。
佢係租私人樓住，環境認真不錯。
我要住呢度。
 
我既計劃是咁的：
今朝一早，我已經執好晒所有衣物、貴重物品，離開我住緊果個鬼地方。
冇錯，我係著草。
大家可以話我唔敢面對現實，但係如果我唔咁做，我確信今晚包租婆就會上黎大發佢既獸性，毫不憐憫地用我去滿足佢既性慾。
面臨如此酷刑，我諗文天祥都會選擇投降。
 




因為冇車錢既關係，我咩住行李行左兩個鐘先到。
好彩間屋入面，值錢既野已經拎去當晒，唔係實咩死我。
上到阿福住個層，我暫時將啲行李放左係後樓梯，然後換上騎士既打扮。
我打算用騎士既身份，威逼利誘阿福暫時收留我。
阿福外表凶狠，實際碌撚，實唔敢對住騎士Say No。
就算拒絕都唔會即刻，我仲可以拖多幾日。
遲啲既事，遲啲先算。
 
我禁門鐘。
十秒之後，阿福開門。




「欣少……你做乜撚野？」阿福第一句就問。
我都知道個天唔會比我成功架喇，哈哈，哈哈哈哈，哈。
屌。
 
於是，我將呢幾日發生既事，一五一十講晒比阿福知。
點解我要著成咁，點解騎士會變左英雄，當中所有因由，阿福全部都知道晒。
我地坐左係廳，靜默左十五分鐘。
我準備起身就走。
我後悔講左比佢聽，我諗佢只會覺得我戇鳩既，作啲咁既出黎昆佢。
「你真係好戇鳩。」阿福話：「不過真係完全符合你既作風，柒頭。」




佢信左。
終於有人可以同我分擔呢件事。
 
「你知唔知你呢家對社會有幾大影響？」
夜晚，阿福突然講。
佢知道我係騎士之後，唔知係欣賞我既勇氣，定係同情我既遭遇，同意比我暫時住係佢度，一搵到地方就要走。
「唔知？」
「已經有一班你既戇鳩Fans打算學你，夜晚出去行俠仗義。」
佢打開Facebook，入面除左有幾百個世界各地網民組成既騎士Fans Club，仲有一個由香港人組成，宗旨係宣揚騎士精神，約埋夜晚扮成騎士落街巡邏既組織。
「哈，咁咪幾好，以後唔駛我再扮騎士，有大班人代替左我個位。」
「屌，你太低估個事態喇。」阿福扯一啖煙。「係呢種被渲染既風氣，同佢地戇鳩鳩無知既心態下，肯定有事會發生……」
 
阿福既說話又再係我腦海徘徊，令我訓得唔好。
 
「喂！起身！」




頂，一早拍醒左我。
「睇新聞！」阿福叫。
 
『本台將會再次播放呢段片段，內容可能令觀眾不安，敬請留意。』
男主播話畢，電視播放一段用手機拍攝既片段。
一個黑衣人比人綁住係張櫈度，背景係一個貨倉。
「救命！救命呀！」
「頭先你唔係好型好威既咩？騎士仔。」
一把男人聲響起。
「我唔係騎士呀！對唔住，求下你放我走！」
「咁點解你要扮佢，打我啲手足呢……」
一陣槍擊，黑衣人身上多了幾個彈孔，血流如注。
靜止，死亡。
鏡頭一轉，影住一個身穿白色西裝既男人，佢身後企左一班蒙面人。
西裝人戴住一個電影「殺人狂傑克」既面具。




 
「你睇下。」阿福企係我側邊，推左我一下，好似想我回應。
我講唔出野，冷汗冇停過咁流。