深缺: 深缺-Part13

"大家準時上午十點係東涌地鐵站A出口集合。" 李Sir 再三叮囑户外攝影日嘅地點同日期。

就係果日, 我一丁友九點十到左東涌站。

無錯， 係一個人！

原先話同我一齊黎嘅John少竟然係尋晚打黎講左句: "Sorry的哥， 頭先我老婆提我先記得原來聽日要同個仔小學interview, 我諗我去唔到影相， sorry sorry。"

面對John 少一個咁有說服力嘅理由， 我只好一個人出發去參加今次呢個户外攝影堂， 一個我今生今世都唔會忘記嘅攝影堂。。。





比預定時間早到左十分鐘嘅我， 一到埗就見到李sir 同中年亞叔亞姐四人團吹緊水。 內容不外乎係佢地帶左幾貴幾貴器材等等。。。基本上大家每次上堂都會聽到， 已經見怪不怪。

向李sir 報到左， 同埋交代John少黎唔到之後我就走去買左支水, 返到黎見到其中一個亞叔問緊李sir幾點出發。

"亞李sir, 人齊未， 行得未？" 亞叔問。

"差唔多， 仲有兩group人。" 李sir 同亞叔講緊野同時， 佢一手攞起張人名紙， 另一手拎起電話準備打比其他未到嘅人。

"Sorry, 我遲左。"





大家都自然反應地向聲音嘅來源望去， 係Amy。

李sir 見到Amy後， 輕輕地點頭打左個招呼。

與此同時， 李sir電話接通左。

"喂？。。。喂？你好， 我係李sir, 你地到未？ 我地準備出發。"

"Ok, 咁我地等埋你地。" 收左線後李sir 就將電話放好， 同大家講。





"仲有四位同學下個站就到， 麻煩大家等等佢地。"

十五分鐘後， 兩男兩女組終於到左。 我不其然有一個疑問: 一個港鐵站要成十五分鐘？？

哈， 最得意嘅係， 同一時間， 我竟然從佢地四個身上見到以前佳儀同亞俊嘅影子。。。

點都好， 既然人齊左就起程去玩。 我並未無聊到因為此等小事影響我嘅心情。

我同李sir 行係隊伍前面吹水， 亞叔亞姐四人組緊隨我地。 亞叔佢地之後就係Amy同兩男兩女組。

一隊人向11號巴士站走去， 出發到大澳。









[不斷前進的世界只會遺下永念回憶的人]