深缺: 深缺-Part3

亞Cat係我女朋友，我地係由一次工作機會下認識，之後開始拍拖，到今年八月就正式踏入第五個年頭。亞Cat 係一個長頭髮，眼大大嘅女仔。 雖然我唔係好覺得，但係不下於五個人話佢化左淡妝後似徐子淇=_=。 性格方面亞Cat 絕對唔港女，更甚嘅係，佢係一個無一百分都有九十分嘅女朋友。 返寫字樓，五天工作，唔出夜街，一放工就返屋企陪家人。 

除此之外，佢仲非常遷就我，錫我，就算我有時發埋D少爺脾氣佢都會忍我，讓我。 對我講過嘅野佢都好上心。記得有一次我病左，食左藥係屋企訓到不醒人事。亞Cat係我屋企門口拎住碗粥足足等左我兩個鍾，直至我娘親返到屋企開門比佢先入到屋。。。 

佢仲係我嘅財務專員，所有上至儲錢計劃•交稅，下至咭數•電話費，亞Cat 都幫我處理得妥妥當當。 我娘親都好鍾意亞Cat, 直情當左佢新抱一樣, 有時星期六日佢地自己仲約埋行街睇師奶野 tim! 但世事又係咪真係咁理想呢...... 

我望到亞Cat個來電， 將個接聽掣向右推一下。

"Hello hello"我語帶輕鬆咁同電話另一方say hi。事實上我同佢拍拖咁耐我都好少同佢講我公司D不愉快事同壓力，起碼少一個人知道，少一份擔心。 





Hello hello" 亞Cat 學我個語氣同我say hi。

"點呢傻妹？我失笑咁問佢。 

"無吖，搵下你之ma, 係公司？忙緊？我返到屋企la"亞Cat關心地問我。

"係吖，突然老細有urgent野要我地跟，急住星期一要用。係呢，你食左飯未？" 

"就啦，一係你得手先打比我啦~" 





"okok, 做完晒我同同事食埋飯先返，一陣call 你"

"無問題，不過唔好咁夜食飯，知無？byebye" 跟住亞Cat就收左線。佢就係一個咁嘅人，永遠唔會比壓力我，只會關心我。我個班識左十幾年豬朋狗友成日只會話"你好彩啦，你執到啦" 無錯，我真係好好彩，只不過當時嘅我一D都無為意！？