深缺: 深缺-Part2

今日係四月十三日星期五，老闆同我地講"黎緊星期二我約左澳洲航空公司傾我地隻新product, 亞的，Mimi, 安仔同佳儀幫我整定個PowerPoint, 星期一早上放係我枱面。另外星期二早上十點，Mimi，亞的同我一齊去見個客。"老闆講完就走返入房。   

"亞的，點算，隻新product大家都未有料，而家仲要差唔多三點半，個PowerPoint點搞吖？"Mimi有少少擔心同急咁問我。係呢個時間，或多或少都要表現一下自己係幾咁處變不驚."佳儀，去依隻Nuts個網站睇下有無咩料，順手揾埋Google 同Yahoo有無多Information" 佳儀係老細個秘書，我諗廿二三歲到。可能我地呢D老餅真係唔明九十後諗乜，佳儀好地地一個後生靚女，就日日帶住一副大個塊面嘅黑粗框眼鏡。。。當然，佳儀亦都有傳統九十後果種特性: 返工例遲，"我住得遠吖嗎~";收工例早"我約左人食飯/睇戲~", 哈哈， 一貫九十後作風。。。 

佳儀一聽到佢要做乜之後，就用飛快嘅極速，無錯，係極速，返埋位開始search野。好明顯，佳儀係怕唔可以準時收工去街。相反，另一位同事。。。"咦！咁多野做，九成九要OT啦，等我打個電話同老婆講夜D返先"未等其他同事反應，安仔已經將佢部電話解左鎖，純熟咁入左個電話號碼。" 喂？老婆？係吖，今日公司有urgent野要搞，我應該都夜架，我唔返黎食飯啦。你氹兩個女訓先，夜D再講啦。"跟手就收左線。好明顯，電話嘅另一方已經習已為常，由安仔收線果個速度就可以知道，佢老婆只係答左一個"ok"。

 "我得啦，有乜野要我搞？"安仔問。咁我都唔埋人地家事咁多，繼續講返公事。"安仔，你同Mimi 用PowerPoint整定個 Draft, 我就去搵下Competitor D料，五點到大家再夾" 


時間一轉眼就過，話咁快就到五點。"大家整成點，有無野可以攞出傾？"我首先問大家。   





"我地呢面整左個框啦，你睇下。"Mimi同安仔已經砌好左PowerPoint 個Layout, 入埋公司backgound 同一D general嘅資料。  

"我搵到咁多jor~"佳儀拎左三張網上嘅print out。我一睇，心諗"我頂，有無搞錯吖，依三張紙我十分鐘揾到啦，不過都好過無嘅" 你知啦，而家D九十後唔話得架，一時又話同老細投訴，一時又話辭職唔做。 

"我無左個秘書你係唔係做埋佢果份！？"曾經就係有位同事去老細度投訴，話之前個秘書工作態度懶散而搞到老細講出以上一番說話。自此之後，公司就再無一個人敢投訴老細個秘書。 

＂唔該佳儀。安仔麻煩你幫我睇下仲有無其他方面嘅資料。我同Mimi 開始整個powerPoint先＂佳儀一聽到唔駛再做其他野，就笑笑口返埋位。而我地三個呢？接過佳儀果三張紙之後，就只好無奈地繼續做過PowerPoint。。。  

當我再由電腦個screen轉望牆上個鍾已經係八點三多D, 而份PowerPoint 亦都完成左差唔多八成。"不如休息十分鐘？"我首先開聲問一下大家。而Mimi 同安仔都好爽快，一個"好"字之後就逕自向洗手間同茶水間方向走去 





我去完洗手間後都去諗住入去Pantry斟返杯水飲下，入到去見到Mimi。 

"佳儀走左啦呵？"Mimi 首先開口問我。

 "走左啦，我見佢六點兩個字就執野走左lu, 不過我諗佢係度都唔幫得好多手"我苦笑咁講 

Mimi 接住講"咁都係吖嗎，走都唔講聲，而家D九十後真係。。。D工作態度咁樣，遲早一定出事。。。"

 "Haha, Mimi 姐，而家D妹妹又點似得你咁體貼吖，做野又好， 又有耐性，又善解人意，又靚， 又......."未等我一連串似是疑非嘅讚美說話講完， Mimi 已經作狀將佢隻咖啡杯飛過黎。就係呢個時候， 我個電話響起。。。 





來電顯示上面寫住Cat。