[真人真事]唔知你地既初戀係點架呢 我既初戀係咁: 相愛(第二章)

其實想用一個特別D既方法送件生日禮物比佢，我諗左好多方法，但我覺得唯一可行而唔算太複雜既都係得一個，就係..整!蛋!糕!

我既計劃就係親自整一個蛋糕再係個蛋糕入面收埋盒頸錬，唔知有無人聽過以前有一個廣告係「電飯煲，焗蛋糕」，而我屋企就有果個電飯煲，我只要照住個步驟整其實都唔算係超高難度，因為味道並唔係我既主打，我既主打係想係個蛋糕入面放盒頸錬

我諗左好多方法點樣放入去，我最初諗住衛生D成盒頸錬用錫紙包住就掉入個電飯煲度等佢同D材料一齊纏綿，但我諗到就算衛生，個盒都有可能會溶，都唔係好方法，跟住我就諗起一段新聞，段新聞就話M記比人告，原因係D熱朱古力摸落去唔熱，但飲落去熱得濟整親個人，我就記得發泡膠可以隔熱

但係我又覺得用發泡膠既碎好難包圍晒成個盒，又諗過用膠紙痴晒D發泡膠碎先用錫紙包住，但係一來驚痴唔實，又驚膠紙會溶，如果痴唔實既話我諗我係變左生日逼佢入醫院再係病床上面送生日禮物咁浪漫

最後我都係整好晒蛋糕先，凍左之後再係上面挖個洞放盒用錫紙包住既頸錬入去，我特登唔係放中間，因為正常人第一下一定切中間先，咁我放好左之後就落街買左枝噴忌廉士多啤梨，藍苺，大白朱古力同細黑朱古力，仲有一樽果占





我用噴忌廉補好個洞，再用忌廉"炆"晒成個睇得到既地方，但我唔知自己係咪有柏金遜，我點"炆"都"炆"唔平，跟住我就用生果鋪晒上上面，中間係心形果占，果占隔離係藍苺，外圍個圓形就用士多啤梨鋪，再斬細白朱古力，整溶黑朱古力用筷子係白朱古力後面寫Miki happy birthday就差唔多喇

咁個側邊位點算呢??我見過人地D蛋糕既側邊有好多坑紋係度，我有諗過用手指甲，但係我斷估都唔會成功

點 知 我 係 家 姐 間 房 搵 到 把 未 拆 包 裝 既 梳 ! !

.....我用完之後有幫佢係咁意過一過水咁，再放返入個包裝痴返好，我唔知佢有無發現，我淨係聽倒有一晚佢係間房大叫，但係全家都無人理佢...

到MIKI生日果日喇，我果日廢事咁多整色整水比佢覺得我有古蠱，我直接同佢講我"買"左個蛋糕放左係屋企，放學返去佢屋企，我淨係咁講已經睇到佢個樣好似好開心....