[真人真事]唔知你地既初戀係點架呢 我既初戀係咁: 相愛(第三章)
到MIKI生日果日喇，我果日廢事咁多整色整水比佢覺得我有古蠱，我直接同佢講我"買"左個蛋糕放左係屋企，放學果陣叫佢返去佢自已屋企先，咁我就照我計劃拎住個蛋糕上佢屋企喇，上到去佢屋企佢拆開個蛋糕盒之後，佢好驚喜咁問我個蛋糕係咪自已整，呢個時侯我緊係話係啦
咁佢許完願就開始切蛋糕，第一下佢切中間，如我所願係唔會切得中盒頸錬，點知第二刀，第三刀都切唔中盒頸錬，呢個時侯我發覺得我唔記得左樣好重要既野，我唔記得把刀同D架生係晒佢度，佢切唔中唔緊要，但係連負責分邊件蛋糕比我同邊件比佢呢樣咁重要既環節個話事權都係佢手度，
我靠個粉碎左既心形果占分辨邊件有涵邊件無涵，結果一開始果兩件都無涵，佢仲話驚食唔晒，連埋有涵果舊蛋糕放埋入雪櫃，我果陣諗唔緊要!!佢分左6份，我只要每人食多一件，即係食左四件都應該會中
咁我地開始食個蛋糕，咁我形容下個蛋糕既味，D生果其實都正常，但係D果占就因為我要整個心形，所以其實放得唔係好多，而且仲好淡，不過最令我驚喜係個蛋糕既內層，我夠膽講我整左個海綿蛋糕出黎，但唔係個口感似海綿呀，係個味道似海綿呀!!
我唔知自已落少左D咩，攪到家陣我唔知自已係食緊乜野，舊野係完全無味!!跟住我望下MIKI，佢個樣話比我聽好難食，我明白..所以我無理佢，我好辛苦咁食完第一件，叫佢拎第二件出黎都唔中有涵果件呀!!我唔知點解好似玩緊俄羅斯輪盤...好似抽獎咁，我唔知自已仲要食多幾多舊先中舊有涵，我家陣既心情好不安
我食第二件果陣MIKI仲係停留係第一件，我好後悔點解唔整好食D，我有諗過叫MIKI如果唔食既話可以餵佢隻貓啦，反正個蛋糕同貓糧一樣無味，但係我無咁講到，我覺得如果我用咁既野餵佢隻貓，佢隻貓應該會同我絕交，係我好辛苦啃完第二件果陣MIKI問我係咪好肚餓，我話係呀
我心諗係我未見到有涵果件之前都要話係架啦，點知佢比埋佢食剩果半舊比我!!我果刻既心情灰到核爆，我明知無涵都要啃，我寧願難食都好過無味，我果陣好想問MIKI屋企有無豉油比我加埋一齊食
到食完第三件終於到第四件喇，第四件終於有涵喇，跟住我同佢講不如你幫我切開佢，我地一人一半啦，我講到一人一半果陣我見到佢面有難色....，但係佢都有切，佢發現到盒野果陣佢個樣好感動，而我都因為唔駛再食蛋糕而好感動...
佢拆開禮物果陣我有留意佢表情，佢果種笑容我諗我以後都唔會係第二個人身上搵得返...
佢背住我示意我幫佢戴起佢，我幫佢戴起條頸錬果陣嗅佢D頭髮好香，我覺得自已好鐘意佢，好想攬住佢，但係我無咁做，戴完之後佢輕輕錫左我塊面一啖，跟住我怕醜到講野亂晒龍，無幾耐我就要走喇
果一晚我成晚都諗住佢錫我一刻，而且我無洗面就訓...