《我要追番我老婆》: 花絮1

跟小惠和好如初後，我們繼續在尖沙咀閒逛。走著走著，小惠突然停下來，扭著我的耳朵怒道﹕「之前做咩晚晚都同Rachel兩個人食飯﹖我唔係話咗唔準你同佢單獨兩個人㗎咩﹖」

我面容扭曲道﹕「咁...咁我見佢得自己一個人食飯好似好慘呀嘛......咪......」

小惠手上加了把勁﹕「街邊個乞衣無飯食仲慘啦！你唔去同佢食﹖」

「痛！痛！」我苦著臉道﹕「對...對唔住啦......我以後都唔敢啦......」對著憤怒的小惠，講道理是沒有用的，還是趕緊道歉吧。

她轉而扭著我的手臂，怒道﹕「仲有呀，你係咪有次同你班同事去飲酒，跟住同Rachel挨身挨勢，最後你哋仲一齊走呀！」她說到最後聲線已經有點接近咆哮了。



我愕然道﹕「吓﹖幾時呀﹖」除了重遇小惠之前的那一次，其餘的我都是獨自回家啊。

小惠叉著腰瞪著我道﹕「你仲唔認﹖Bonny話我知佢有一晚去酒吧撞到舊同事，佢個舊同事就係你個同事Stephanie呀！佢話見到你同Rachel挨身挨勢，跟住仲一齊走添呀！」

原來如此！難怪Bonny結婚那天看到我後樣子變得那麼古怪。原來那晚那兩個陌生女子其中一個就是Bonny，只怪我當時喝得醉醺醺的，名字又聽不到，樣子又看不清。

我大呼冤枉﹕「冤枉呀！老婆大人！嗰晚就係我飲醉咗你執我走嗰晚呀！喺酒吧入面我已經飲醉咗，唔小心挨落Rachel度咋。跟住Rachel係扶我走，但一出酒吧我就叫佢自己返屋企，然後你就嚟接我啦！」

小惠聽到我稱呼她作「老婆大人」，手上的勁度消失了大半，紅著臉佯怒道﹕「邊...邊個係你老婆呀﹖」然後瞪著我道﹕「你無呃我﹖」



「無！絕對無！」騙天騙地我也不敢騙你啊！還不怕你再次離我而去嗎﹖

小惠看著我認真的樣子，終於道﹕「哼！算你啦！咁你幾時同你班八卦同事講清楚呀﹖」

我心想還是快刀斬亂麻吧，待得越久只怕會再次發生今天的事。

於是我道﹕「聽晚啦，我同Rachel講聲，跟住聽晚約哂佢哋落間吧度講清講楚啦。」

小惠靠在我的懷裏﹕「你要唔要我陪你去呀﹖」



我想了想，我也很想小惠能伴著我，但她去的話會不會被Tina她們罵作第三者﹖我可不想她承受這樣的罵名。

於是我道﹕「或者你喺酒吧外面等我，我講完先再叫你入嚟啦。」



 
結果當晚，Tina聽到我和小惠拍拖，以為我為了前途拋棄了Rachel，隨即潑了我一身啤酒，還好Rachel及時制止了她，不然我還要多吃一個耳光。最後經Rachel拉了小惠出來一起苦苦解釋後，她們終於相信我和Rachel是清白的。我當時在幹甚麼﹖當然是忙著抹身上的啤酒啊！