細細個見到嘅靈異事件勿語: （四）小學 - 吊扇

（四）小學 - 吊扇

唔知後生一代知唔知道咩係吊風扇，
即係課室天花吊落黎果把大風扇呢。
呢個年代學校係咪全冷氣，無曬吊扇架喇？
我真係唔知。

可以同大家講，以前小息食完媽咪麵呀、
完左體育堂呀、火警演習呀等等，
返課室果下，我一定唔會九衝第一個行入班房。





有一次，有個肥仔同學懶快，懶霸氣一衝衝入班房，
當堂嚇到滴尿，面青口唇白。
同學老師問佢做乜，佢真係講都講唔出。

後尾佢同我講返起，
我先知佢見到我曾經都見到過既野，
在同一個位置。

果次好似漏左本music notebook係位，自己由走廊折返。

一推班房門果下，不自覺為意到有d嘢響天花上面，
一望上去，見到有一個男人人頭响把吊扇上面，
面容痛苦，灰白色臉，戴日軍帽。

一下啫，再望就已經唔係到。

肥仔同學形容嘅同我完全一樣，
所以真係唔好嘭嘭聲仆倒入去，
原理就好似你返酒店房果種咁。





而家做地產，帶客去睇d舊式單幢樓或者樓齡高嘅，
我都會專登鈴多兩下條鎖匙（發聲）或者門口同客吹兩句水先介紹下，
又或者左右扭下把匙咁，其實唔淨止我會咁，好多agent都會咁做，
下次你地去睇樓可以留意下佢地呢d細微動作。

亦見過有風水佬做反向嘅。入去嘈端巴閉周圍踢，
當然，果種客人，通常都係撈偏門嘢。
所以，d人揀黃賭毒嘅單位，
其實大有學問，遲下再講。

講埋d小學嘢先。


圖片參考

ig : donotsayhello