細細個見到嘅靈異事件勿語: （五）小學 - 跳飛機

（五）小學 - 跳飛機

小學操場側邊通常都有個「跳飛機」，我地果個就響平台嘅後面， 
即係過曬操場，再轉條短短地嘅路先會見到。

換句話講，即係唔太開揚，要特登行入去先搵到。

可能大家未必知，先解釋一下。
「跳飛機」玩法即係地下上面畫左一個一個正方格，
然後先拋個豆袋入去第一格到，再單腳跳入去。

執起豆袋，拋下一格，單腳雙腳咁響上面跳，
如此類推，考眼界又考平衡。

小四果年某日某個小息，
我坐係入面側邊d石膊到嘆支芬達，
睇下d同學玩「跳飛機」咁，
果時有兩個應該細我一級嘅師弟師妹玩緊。

丟下跳下丟下跳下，兩個玩得好開心下。
我某程度上都係眼望望阿師妹，

見佢紮條馬尾係度玩到忘曬形，幾過癮下。

睇下睇下，上堂鐘聲響喇，即係要出返去返上課室。
岩岩見過女仔跳完企定定，到個男同學仔丟豆袋喇，
去最高，最頂果格。

跟住佢就單腳雙腳單腳咁跳去最後終點果格。

答...答...答... 答！





我見住個男同學仔一下一下咁，
跳到最頂果格突然「蓬」一聲跳左落地下裡面！

就仔似果到有個洞，一下跳左落去咁！

而當然，果到只係一塊平地，
一塊畫左「跳飛機」嘅平地。

好似好滑稽咁？

你見到，你真係會一d都唔想笑。

個女同學望住最頂個格，呆左，
我望住佢背影，無郁無嗌俾唔到反應，
我自己梗係都洧底啦，

但果下本能上唔知係咪想突顯自己大哥哥，
同埋知道無理由丟低個女仔自己走，
於是我就由石膊跳落地下同時講：

「打鐘囉！返課室喇...」

唔造作之餘，又唔會太過比「男同學」知我見到佢。

我係咁樣認為...

但係，成句嘢都未講完，我由石膊落返地下果刻，

我眼前... 一個人都無。

我擰左擰右，肯定無眼花，

女同學都霎時間消失「跳飛機」場裡面，
頭先都講過，入黎係要由條短短嘅小路行入黎，
所以，無可能半秒都唔夠就行得到出去！

「跳飛機」場內突然得返我一個。

或者，由始至終，

成個小息都係得我一個...

我望住個「跳飛機」，格仔上面有樣嘢，
原來頭先「佢地」一路都唔係拋緊豆袋，
地下剩低係一條類似幾個銅錢穿埋嘅紅手繩。

我，緊係無理啦，拿住支芬達，

急急腳又唔敢跑咁，行番出去操場。

果條手繩究竟係邊個嘅？
或者代表咩？
兩個學生係咪曾經係到讀過？

我梗係唔知啦，亦唔想去知，
條手繩最後有無俾有緣人執左去？
就更加不得而知了。

總之，唔好多事，
有時，保你無事。

記住。
跳飛機 參考圖片






ig : donotsayhello