細細個見到嘅靈異事件勿語: （三插四）經歷之談

（三插四）經歷之談

好似氣球，好似搭lift，好似上格床，
果時一見到，都會即刻衝去攬住阿媽勁喊，
形容返比佢聽乜事。

其實係好蠢嘅做法。

第一、二次你形容比你阿媽聽，話頭先咁咁咁，
佢會安慰你話你眼花，係咪太累呀等等。





第四、五次你同阿媽講佢會話你成日亂噏廿四，衰仔貪囗爽。

第八、九次直頭鬧你，咪講埋d唔吉利嘢啦。

唉...講真，阿媽咁大個人，
聽你一個?仔形容一兩次就話假啫，
聽得幾次，都知你奶野啦。
佢地又見唔到，聽你咁形容，
一時又話有小朋友响屋企，

一時又話書枱有個黑影…

唔驚就假。

於是乎，無法子下，
唯有周圍問下姨媽姑姐，問下紙紮鋪等等。
成日又裝香，又燒嘢，又要掛葫蘆響床邊，
仲要返埋鄕下祖墳到拜祭。

我雖然細個，但係都好明白就係因為我成日話見到d哥哥姐姐，

所以令到屋企人頻頻撲撲。

每次做完d儀式，屋企人都會即刻問：「點呀…仲見唔見到呀…？」

我：「見…見到…呀…同頭先合埋眼之前…個位置一樣…」

「係正常既，返去抖返七日就慢慢開始無架喇。」通常道士會答。

一次一次的講「見到」，一次一次的望住阿媽個失望樣…

久而久之，我識喇。

我擘大眼，答：「唔…無喇，見唔到喇…」

果年係，應該十一，十二歲。





咁樣本來都無事無事，但係，自從我飲左杯符水…

見到嘢嘅頻率…仲多左。

事緣因為我響學校嚇親同學仔，要被罸見家長，
就係呢件事，阿媽唔知聽邊個隱世街坊講，
就帶我去左飲符水同所謂做封眼嘅儀式。

哎… 

所以話，講出黎，其實都係自己受返，
同學仔又以為你short short地。

一次又一次咁以為，呢次應該得，結果都係無用，

果種失落同打擊我已經唔再忍心同阿媽講出口。
唔忍心見到阿媽係咁駛錢買d我知道用唔著嘅嘢…
唔忍心嚇親人地之後，
仲要人地黎講d嘢安慰返我…

唔…sor，各位…呢一節感性左…

好啦，講返我响學校見過嘅嘢啦，
就係呢d事，搞到老師要見我家長，
之後飲符水…

並開拓左我更瞭闊嘅世界…


圖片參考

ig : donotsayhello