米米蓮妖怪作品 -《旅行‧如此‧難以忘‧記 》(百集長篇): 第118集 ~ 輝︰殺咗「鬼王」先知咁多嘢！
第118集 ~ 輝︰殺咗「鬼王」先知咁多嘢！
「光管陳」已經再返唔到嚟，「達叔」又已經元氣耗盡…
呢D嘢都經已成事實，冇可能返轉頭…
好可能大家都覺得佢哋好戇居，甚至可以鬧鬼佢哋浪費米米蓮嘅筆墨…
但係我，甚至係我哋呢班人，冇一個可以有權去咁話佢哋，因為…
佢哋今日嘅犧牲，所為嘅人，就係我哋。
我嘅傷痛﹑我嘅怨恨﹑我嘅憤怒﹑我嘅慨嘆…
呢D一切一切嘅感覺，充斥住我成個身體…
我只有…我只有…
(嘭 ~！)
一拳打爆咗道石牆…
再衝入去搵人嚟發洩…
「咦，得返一個細路嚟到咋？哈哈哈，余老兄果然厲害，北鳳都俾佢攪掂咗。」
係你喇！袁丰田！
我雙眼發出前所未有嘅怒火，右手運勁運到拳頭都想爆咁滯…
得到「英雄」嘅配合，我一個箭步就衝咗埋去…
只需要零點五秒嘅時間，無錯，就係咁快，我一手就劈落去…
「你去死啦！」
(呯嘭 ~！)
呢一吓，就係一吓，我就將成個「袁丰田」劈爆咗…
…
「哼，睇嚟唔錯噃。」
「鬼王」咁出聲，擺明就係淆我底…
「阿輝，鬼王原來識變身，我哋幾經辛苦，終於打敗咗佢頭兩個變身，但係…」
阿狗咁講，我都冇理佢個「但係」，就直接…
「鳳凰火炎，出嚟啦，我要殺死呢隻乜街杏加橙！」
生為受高等教育嘅一群，我唔想直接講粗口…
(扮咩魚蝦蟹啫，收皮啦！)
最起碼喺呢一刻我唔可以收皮住，我要救大家啊！
(蓬~~~~~~~)
喺已完寂嘅「達叔」口中飛咗一隻「火鳳凰」出嚟…
仲停咗喺我頭頂上面，就好似出嚟照住我咁…
佢下身向住我，仲要熱辣辣咁，我唔想佢再喺我上面泣泣樣樣，唯有…
「鳳凰火炎，化為神劍！」
不出一秒，「火鳳凰」變成一把三尖兩刃附帶火焰嘅神劍…
「你呢隻杏加橙，等我攞你條命嚟祭我老師同師父啦，蝦！」
我一劍就拮埋去…
「火嘅嘢我又點會怕啊？火牛再現，牛鬼神體！」
「鬼王」一吓向後跳，同時立即變返牛身，諗住硬頂我呢一吓…
但係我冇理佢係乜，總之就係直插，要插爆佢為止…
「蝦丫~！」
(插 ~！)
「哇丫~ 嗚~ …」
「鳳凰火炎」插正「牛鬼王」心口，仲令佢當場嘔血…
血液灑滿喺我身，但係我都冇理太多，再向上一拖…
「去死啦！」
「嚓」一聲成個「牛鬼王」俾我由心口去到頭頂開咗兩邊…
佢再慢慢跌咗喺地下，就好似死屍一樣…
…
大家呆咗一呆，三秒之後…
「阿輝，好嘢！」
「輝輝，好嘢！」
「唔好讚我住喇，我都冇做過咩，都係「光管陳」同「達叔」嘅功勞啫，快D去救返「大袋」先啦。」
之後，欣家姐同阿狗就爬上石牆諗住去救返「大袋」…
而我就一直望實「司徒不正」，驚佢會出手…
但係唔知佢係咪都怕咗我呢？佢一直都好似石化咗，郁都冇郁過…
(嘟嘟 ~！)
咩聲嚟嫁呢？
「哀風響起！？」「南龍」先生講。
佢攞咗塊好似紙皮咁嘅嘢出嚟喺度睇…
「風婦前輩留言？」佢再講。
「風婦前輩？先生，佢留咗咩言俾你啊？」欣欣問。
我呢一刻先真係見到欣欣，見到佢，我真係好開心，我離遠對佢笑咗吓…
「等我聽吓先…」「南龍」先生再講。
…
「前輩講咩啊？」欣欣問。
「天機，三個字，神與神。」「南龍」先生回應。
之後，佢木口木面，異常認真咁望住咗我後面嘅地下…
「哈哈，你哋真係好攪嘢，你哋唔會以為我就係成件事嘅策劃者呱？哈哈…」
我另轉頭一望，原來俾我開咗邊嘅「鬼王」仲未死…
分開咗嘅雙邊個口仲郁郁吓講緊嘢…
「我冇咁大力量，就連「東歪」﹑「南轅」﹑「西斜」三個都唔係嚟幫我手嘅…佢哋其實只係我同事啫，哈哈哈哈，你哋真正嘅對手係天地人三魔中到今時今日仲活喺世上嘅「地魔」，佢已成邪神，力量與佛睇齊，所以叫做「佛地魔」，哈哈哈哈，佢嘅力量大到可以俾我哋呢班惡魔多一次重生，亦一早準備咗最好嘅魔體俾我， 就俾你哋試吓我終極嘅魔體啦！」
佢講完之後，身體捲成一舊，再慢慢向上飄起…
「我諗你哋都聽過日本有三大妖怪，「九尾妖狐」，已成過去，而家佢個族群都冇人再可以做到真係有九條尾，至於「酒吞童子」，就係我，仲有一個，就係「天狗」，佢條友自命清高，唔順從「佛地魔」，所以「佛地魔」大人將佢收拾，仲將佢嘅身體俾咗我，哈哈哈哈，就等你哋試吓我呢個由兩大妖怪合成嘅身體啦！」
(趴 ~！)
嗰舊嘢爆開咗，變咗一隻…
紅面，凸眼，長鼻，苦口，白眉，白鬚，有對翼，手執巴蕉扇同藤籃嘅妖怪…
佢仲順勢向欣家姐同阿狗撥去…
「鬼風！」
阻止咗佢哋救「大袋」…
「D風有鬼爪嫁，小心啊！」欣欣大嗌。
「橙龍繞林！」「南龍」先生用繩將欣欣同阿狗拉返落嚟，去到自己身邊…
大家停定之後，「南龍」先生即刻…
「我都想試好耐喇！不過咁多年嚟都冇得再試，而家阿初又唔喺度，希望可以同你一試啦，阿輝，準備「鳳凰火炎」，出劍啦！龍鳳合璧！青龍火鳳！」
我見「南龍」先生突然右手執起「青龍劍」就飛一樣衝向「天狗鬼王」…
我亦立即跟隨住…
「天凰三十六變，人劍合一，鳳凰衝天！」
力量由「達叔」而生，我好自然咁就好似一個修煉咗好耐嘅高手一樣…
龍鳳雙劍合璧，直衝「天狗鬼王」，只聽見佢…
「巴蕉風牆！天狗食日！」
「巴蕉風牆」明顯就係減低我哋衝勢，「天狗食日」亦唔係佢用自己個口去吸…
而係佢手上嘅藤籃，藤籃就好似一個神器一樣，將大部份我哋嘅靈力都消去…
但係我同「南龍」先生嘅雙劍始終做到一定大嘅力量，所以…
「妖夢縱橫！」
最後都係逼咗沈寂咗好耐嘅「東歪」出手幫「天狗鬼王」。
呢一吓，意味咗三樣嘢…
第一，我哋真係已經夠力量同「鬼王」打…
第二，呢個係「鬼王」最後一個身體…
第三，我哋而家要同時打埋「東歪」司徒不正…
正當我仲諗緊「點打」嘅呢一刻…
突然天上面嚟咗一把聲…
「YO！有我喺度，使乜驚啊？」
「七色彩雲啊！」
(待續)
下集預告︰
摩天大廈咁大隻嘅鬼爪啊！