米米蓮妖怪作品 -《旅行‧如此‧難以忘‧記 》(百集長篇): 第117集 ~ 欣︰「鬼王」第二次變身，輝輝趕到嚟喇！
第117集 ~ 欣︰「鬼王」第二次變身，輝輝趕到嚟喇！
唔好意思，今集又係我啊，冇辦法啦，條Timeline未趕到佢哋，係要OT喇。
提提大家先，而家現場有我﹑家姐﹑荷瑪﹑先生﹑阿狗﹑阿妮﹑中神通…
仲有傷重嘅沙婆婆同郁唔到嘅一班輝輝同學同老師…
我身上有件「隱形斗蓬」，所以我喺某程度上都係安心嘅…
(咁你做乜露個頭出嚟啊？)
我見而家安全丫嘛…
(唔係講呢樣啊！人哋而家淨係見到你個頭咋！好恐怖啊！)
嘻嘻，Sorry囉！
上集講到輝輝嘅張老師變咗做「中神通」，仲挑戰緊「鬼王」添…
「鬼王」唔夠佢打，唯有…
「變型！」
講完呢兩個字，大家都睇住佢由一隻「羚羊」變咗做一隻「公牛」…
血紅色嘅身體冇變，兩隻角就重生咗，變成彎曲，十足十就係一隻「公牛」咁…
全身肌肉爆炸，仲有成十尺高添。
「神拳丫嗱，我就俾你睇吓咩叫神拳！」「鬼王」變完身就咁講。
「蠻牛神拳！」
佢即刻就一拳打埋去「中神通」度…
一時之間，「中神通」根本冇空間去閃避，唯有硬對呢一拳啦！
「鋼鐵神拳！」
「嘭」一聲，灰塵飛起晒…
…
一段時間之後，灰塵散開，淨係見到…
兩邊都係伸直拳臂，再加弓字腳企，雖然表面雙方都冇損傷，但係…
好明顯退後咗嘅係「中神通」…
我望一望地下，發現我冇睇錯，兩條由腳踭挖出嚟嘅痕跡係屬於「中神通」嘅。
「哈哈，睇嚟你嘅神拳唔係幾夠力噃！」
「鬼王」笑完「中神通」之後，再次打出…
「蠻牛神拳！」
(嘭趴 ~ 嘭趴 ~ 嘭趴 ~ 嘭趴 ~)
佢哋之後一直喺度對拳，全場就一直沙塵滾滾咁…
睇唔到佢哋實際戰況，唯有用呢D時間去問吓嘢啦…
「先生，「中神通」唔係最勁嘅喇咩？點解好似都唔夠打咁嘅？」
「最勁又未至於，但係對付呢隻「蠻牛」，「中神通」本身嘅力量應該綽綽有餘，好可惜使用者並唔係學術之士，更加唔係健壯嘅身體，只係一個又肥又論盡嘅中年男人…」
「哈哈…」阿狗喺呢一刻都忍唔住笑咗出嚟…
「唔好意思，第一次聽人咁話「鐵拳」，真係忍唔到笑，不過都係認真返先，想問吓其實可唔可以將「中神通」嘅力量轉移俾第二個呢？」
「未必唔得，不過…」先生回應。
「不過咩啊？」大家一齊問。
「我唔識。」先生回應。
大家之後都無言…
突然…
(嘭 ~！) 戰事好似由呢一吓拳聲停頓咗…
我雙手合實，就好似祈求打出呢一拳嘅係「中神通」咁…
好可惜事與願遺，灰塵散去之後，見到「中神通」佢訓咗喺地下…
「哈哈，神拳似乎都係我嘅犀利D噃！」「鬼王」驕傲自滿咁講。
「蠻牛！睇嚟係時候單打獨鬥喇！」突然聽到「先生」咁講。
唔通佢想一個人出手去打「鬼王」？但係…
我見到佢隻手對住阿狗同阿妮撥吓撥吓咁…
大家都有D唔明佢意思…
之後「先生」佢就再講…
「我哋咁多個人會同時同你單打獨鬥！」
=_=
無錯，上面呢個係個表情符號，就係我哋成班人當時嘅反應…
「好啦！我嘅妖狐力量已經準備好喇！」阿狗講。
「我都可以喇！」阿妮講。
「麗欣，你休息吓先啦，我都要幫吓手喇！」荷瑪講。
「好！青龍劍準備！」先生講。
「我都仲可以打嫁！」「中神通」起返身講。
其實我有D擔心呢D時候「司徒不正」會出手幫「鬼王」…
好在，佢依然企到定一定，好似冇諗過出手咁…
定係…佢好有信心我哋一齊都唔會夠「鬼王」打呢？
(咁我呢，你唔擔心我會出手幫咩？)
你去死啦「大蕃薯」，你已經係個廢物嚟，冇人想理你囉。
我諗緊嘢嘅時候，原來「先生」早已經出咗手喇！
「綠龍盤據！」有D樹藤唔知喺邊飛咗出嚟想纏繞「鬼王」…
「火狐之尾，狐燄！」
「狐炎舞！」
「赤煉神拳！」
後者都選擇用火攻啊。
咦，荷瑪呢？我望一望佢嗰邊…
「點解會變咗呢隻冇口嘅貓嫁，有咩用啊？」
「呢隻唔啱啊？咁呢隻囉！」佢再次變身，變咗做…
「招財貓」…我唯有唔理佢啦，可能「荷瑪」真係能力有限，想幫都幫唔到啦。
大家嘅招數都打中「鬼王」，可惜換嚟…
「雕蟲小技，牛鬼神體！」
「鬼王」淨係用佢強壯嘅身體已經抵擋晒所有攻擊…
「神體？哼，如果我哋真係有「神體」，你呢隻牛鬼蛇神就肯定唔使活喇！」
「先生」咁樣講，唔知「神體」究竟係咩呢？係咪可以救到我哋嘅呢？
「又到我喇喎，呢次你哋多人，我要用群體技喇，蠻牛十字旋風拳！」
丫，我唔識打機都知呢招係「街霸」「蘇聯佬」嘅必殺技啦，力量好勁啊！
現場出現一個血紅龍捲風，一直向我哋衝埋嚟…
「丫~！」「哇~！」「哎呀~！」
阿狗﹑阿妮同「中神通」都中咗拳，彈埋一邊，佢再一招…
「蠻牛衝擊！」
(嘭~！)
將「先生」撞到飛開咗…
點算好呢？
「哈哈哈，不堪一擊。」
「土靈璧…」
(啪 ~) 阿狗想由地下衝上嚟攻擊「鬼王」，但係俾佢一手抓住咗個口…
阿狗不斷掙扎都冇用…
「紫龍神劍！」
「大地神拳！」
呢兩招雖然傷唔到「鬼王」，但係總算令「鬼王」縮開咗手，救返阿狗…
「我條仔你都夠膽打！」
「小心啊，阿妮！」
「不知火流派奧義﹒火狐亂舞！」
D火焰蓬蓬聲飛埋去，但係…
「牛鬼神體！」「鬼王」硬食咗呢一吓，仲好似好舒服咁添，完全冇事…
「哼，哈哈哈哈…」「先生」佢突然大笑。
「有乜好笑啊老嘢？」「鬼王」問。
「四肢發達，果然頭腦簡單，你啱啱呢一招話咗俾我聽一樣嘢！」
「先生」起返身，慢慢行過嚟我度…
「咩嘢啊？點解我唔知嫁？」「鬼王」問。
「所以咪話你頭腦簡單囉，我係都唔講你知啊，吹咩。」
之後「先生」攤開左手手掌俾我睇，上面乜都冇，佢用右手喺上面寫咗個字…
係個…「水」字？
咦，我明喇！但係…
我哋邊個有能力用水嘅力量去克制疑似係赤煉身軀嘅「蠻牛」啊？
「我都明喇！」
阿狗佢冇睇到「先生」嘅手勢都知道？
「我都明喇！」
連阿妮都知道？
「我都明喇！」
連「中神通」都知道？
「但係我唔明噃，可以解釋吓嗎？」「荷瑪」睇嚟最誠實。
「先生」係咁另頭，應該係唔想佢哋講出口，但係…
「佢係一隻火牛。」「中神通」講。
「火牛？咁點打佢好啊？」「荷瑪」再問。
「火牛最怕係咩丫？」
「唔好意思，係咪冇電啊？」
「錯，係水！」
「唉…」「先生」唔想講嘅都俾佢講埋。
「咁水牛怕咩啊？」「荷瑪」繼續問，但係大家已經冇人理佢，因為…
「哦，原來你哋想用水系靈力嚟對付我呢個牛鬼嘅身軀，哈哈哈，真係太天真喇，你哋唔講都好D，一講，我就俾D嘢你哋睇吓，其實我嘅呢個變身包含咗五行嘅分體，金木水火土無一不精，就變個水系你哋睇吓啦！」
「鬼王」佢一邊講嘢，一邊變型，慢慢慢慢兩隻牛角縮起嚟，生出魚鰓…
雙手變成扇頁咁，而家佢成隻魚怪咁…
「哈哈哈哈哈。」
就喺佢笑緊嗰陣…
(嘭 ~！) 突然有人打爆咗另一邊石牆…
係輝輝啊！
「阿輝！」
「輝輝！」
輝輝眼中好似只有怒火一樣，完全冇理我哋…
「咦，得返一個細路嚟到咋？哈哈哈，余老兄果然厲害，北鳳都俾佢攪掂咗。」
「大蕃薯」睇嚟有想死嘅傾向，見到人哋發緊火，仲去惹火…
一如我所料，輝輝一個箭步衝前，零點五秒嘅時間，就…
一吓手刀劈落去…
「你去死啦！」
(嘭 ~！)
呢一吓，全場呆晒，成個「大蕃薯」劈到渣都冇得剩…
睇嚟輝輝會係我哋嘅救星啊！
「哼，睇嚟唔錯噃。」「鬼王」出聲。
「阿輝，鬼王原來識變身，我哋幾經辛苦，終於打敗咗佢頭兩個變身，但係…」
阿狗雖然咁講，但好明顯我哋淨係打贏咗一個，但係點都好啦…
只要見返輝輝，我連死都願喇！
「鳳凰火炎，出嚟啦，我要殺死呢隻乜街杏加橙！」
(蓬~~~~~~~)
我見到…我見到…
一隻「火鳳凰」喺被輝輝打爆嘅石牆度飛咗出嚟，停企咗喺輝輝頭頂之上…
威風凜凜，英姿颯颯…
(待續)
下集預告︰
「哀風」響起…「風婦」前輩留言？
註解︰
(1) 「街霸」 — 全名係「街頭霸王」，本來係一隻街機格鬥遊戲，之後仲出過漫畫，當時喺香港係超流行嘅。「蘇聯佬」係裡面其中一個角色，簡單嚟講就係一個淨係著住紅色底褲嘅大隻佬，「十字旋風拳」係佢必殺技。
(2) 火牛 — 呢度係講緊火屬性嘅牛牛，不過本來意思係變壓器，所以有以下呢個對答。「火牛最怕係咩丫？」「唔好意思，係咪冇電啊？」