米米蓮妖怪作品 -《旅行‧如此‧難以忘‧記 》(百集長篇): 第119集 ~ 明︰我乜都唔知，打咗佢先算啦。
第119集 ~ 明︰我乜都唔知，打咗佢先算啦。
喂，我返嚟喇！
唔知大家仲記唔記得我呢邊發展成點呢？
無錯，就係我喺「盲俠展昭」嘅幫助下，打通咗經脈，仲學識咗「心眼」…
佢仲俾咗把神劍我，叫做「九陽草薙」，慘就慘在為難咗小倩啫…
「好喇，你哋都要快D返上去救你D朋友喇！」盲俠展昭講。
「係噃，但係…我哋點返上去啊？」我問。
「哦，其實你用你嘅輕功就得，咩名話？」
「天馬行空。」
「係喇，係喇，天乜乸嘢馬行空就夠飛返去嫁喇，但係…」
「但係乜嘢啊前輩？」小倩問。
「好似唔夠派頭，仲好似…阿明一個帶住你仲要帶埋隻龜嚟跳，有D難度。」
「我可以唔返上去嫁，我同呢度D動物好啱傾，我想留低。」洋腸講。
盲俠冇理洋腸，仲突然向遠處大嗌起嚟…
「彩雲！」
「係！」遠處一把女性嘅聲傳嚟。
我向住聲音嘅方向一望，見到一舊七彩閃光嘅不明飛行物體飛緊過嚟…
…
「係，咩事啊，師父？」
一隻…一隻…係另一隻先啱，另一隻龜而家喺正「盲俠」前面講緊嘢…
「幫我送佢哋返上「異域魔城」。」
「係，師父！」
呢一刻我見到「洋腸」佢…
「Hello，我叫十里洋腸啊，你叫咩名啊？你鍾唔鍾意食青椒嫁？」
「彩雲，我叫七色彩雲，我唔食齋嫁。」
回應完洋腸，彩雲就叫我哋上佢背脊。
「咁就啱喇，我都係食肉獸嚟…」洋腸講。
「龜你就龜啦，食咩肉獸丫，出發啦！」
我一邊應佢，一邊同小倩上彩雲背脊。
「我唔係龜啊，你幾時見過龜食肉嫁啫…」
「不過我係噃。」彩雲回應。
「哈哈哈，其實我都係…哈哈哈…」
「人不要面，天下無敵，龜不要面，應該都一樣…」我同小倩講。
「好喇，再見喇，希望你哋凱旋而歸啦！」盲俠講。
「仲「歸」？唔使返嚟啦，咁煩，真係返嚟探我哋咩？」阿信講。
「放心啦！先生，太太，如果贏咗，我死都會死返嚟探你哋嘅。」
「家明，唔准咁講嘢啊，我哋一定贏嫁，我會同你生勾勾咁返嚟嫁。」小倩講。
冇記錯，小倩好似係鬼嚟，竟然學人講生勾勾。
之後，我哋講聲「再見」就諗住出發喇。
彩雲開始起飛…再開始起飛…再開始起飛…
點解仲唔飛嘅？
「彩雲，你仲唔飛？」我問
「我係龜嚟嫁，點會識飛啫。」
「頭先你唔係飛過嚟嫁咩？」
「咩飛啊？係大牛龜踢我過嚟嫁！」
「咁而家？」
「擘天射球！」盲俠突然大嗌。
咩事啊？
(嘭 ~！)
原來我哋係要乘坐「彩雲」，等待「盲俠」抽射佢上天…
「攪~~~ 掂~~~！」
我哋成功飛咗上天，仲越飛越高，同埋…
明顯飛過咗龍，「異域魔城」喺我哋旁邊略過…
冇幾耐，我哋喺空中停定，再慢慢飄返落去…
而我個心就仲未安定落嚟…
「彩雲啊，見有時間，不如我作首詩你聽吓丫，好嗎？」洋腸講。
彩雲當然冇回應。
「悄悄的我走了，正如我悄悄的來；我揮一揮衣袖，不帶走一片雲彩。」
多謝洋腸，佢嘅廢話令我冷靜落嚟…
「洋腸啊，你都係龜縮吧啦，拋書包拋錯都唔緊要，你而家仲要不帶走「彩雲」，你係咪溝女嫁？」
「咁第二首，咁第二首，eee…唱啦，怎去開始解釋這段情，寫一首關於你的詩…」
「胡言亂語，心思交瘁，仍未帶出合意字啊你！」我講。
「咪阻住晒啦你，就到喇，我希望…我希望…唉，可以同你一齊做龜苓膏啊！」
…
「好浪漫啊！」小倩竟然咁講。
呢一刻，我真係完全唔明白女人究竟諗緊D乜…
見到雖然未到，但係都差唔多喇，唯有…
「YO！有我喺度，使乜驚啊？」
我離遠就向住「異域魔城」跳咗落去，最起碼唔使再聽洋腸廢噏…
「阿明！？」阿欣。
「傻佬明！我都知你條友仔冇咁易死嫁喇！」喪狗。
「傻佬明，你條死佬！而家先識得返嚟，快D幫手打怪獸啦！」阿輝。
「哈哈哈，睇嚟我萬眾期待咁噃，大家都冇事就好喇…咦，光管陳呢？」我問。
「佢…」阿輝。
「佢同達叔都已經唔喺世上喇。」美奈子喺旁邊行出嚟講。
…
呢一吓，我晏時間真係唔知俾咩反應…
其實我一早都有預咗呢次旅行會有人死，但係…
到咗真係出現呢個情況嘅時候，原來感覺會係咁差，咁難受嫁…
我就係咁呆咗一陣…
「哼，你哋講夠未啊？當我死架？你哋班人真係…」一隻怪物講。
「超，你又唔係最後大佬。」「南龍」先生講。
「你想見最後大佬咩？我怕你哋唔夠資格噃，哈哈哈。」隻怪物再講。
我乜都唔知，所以接過小倩落嚟，就細細聲問阿狗…
「喂，傻狗，發生過咩事啊？前面呢隻紅色木偶哥又係邊個嚟嫁？」
「太長篇喇，總之你講嘅紅色木偶哥就係之前嘅日本鬼王。」
「咁…南龍又話咩佢唔係最後大佬，佢都仲唔係最後架？仲有邊個？」
「佛地魔。」
「佛地魔？」
「酒吞童子話係「星」老前輩同期嘅三大魔人「天地人三魔」之一，地魔力量增強咗，自命如佛睇齊，所以咁叫喎。」
「咁佢人呢？」
「唔知，係酒吞童子齋噏啫，但係而家我哋最少要打埋「司徒不正」。」
「哦，佢旁邊條木獨佬呀？」
「係，佢最少勁過打你落深淵嘅「呼子」十萬倍。」
「有冇咁誇啊？」
「誇係誇咗D，但係肯定好勁係真嘅。」
…
「睇嚟我太仁慈喇，俾咁多時間你哋班人類喺度傾計，接招啦，鬼風！」
之後個「鬼王」就撥佢把大葵扇，一吓一吓咁將D風撥埋嚟…
D風就好似鐮刀咁斬埋嚟，風同風之間仲會有D鬼手捉人入去咁…
「大家小心啊！」
(嚓嚓 ~ 嚓嚓 ~ 嚓嚓 ~ 嚓嚓 ~)
周圍D石柱都俾佢削平…
「爆裂神拳！」我襯有空間，即刻就試試佢有幾勁，點知…
佢完全冇閃避，仲…
一口咬實咗我個拳頭…
痛楚直達大腦神經，好在我喺盲俠度學識咗個「捱」字，所以我冇叫到出聲…
「狐焰！」阿狗一個火球打埋「鬼王」度…
「鳳凰閃現！」
嘩，阿輝丫，幾時咁勁嫁？佢一吓就飛到埋我同「鬼王」中間…
「鳳凰火炎！」一把火劍向上拖斬…
「鬼王」鬆開佢個臭口，再迅間閃避，仲快手到即刻就…
「天狗夢魘！」
突然間，有幾隻得半身嘅靈異怪物喺佢身邊出現咗，仲捲住咁飛向我哋…
「水狐之尾，淨化！」阿狗幫我消除我傷口嘅妖氣。
而我就好快咁企定定，紮行馬，諗住用盡全力去攻擊「鬼王」，點知突然…
(嘭 ~！) 天上面嚟咗一件龐然大物…將我…將我…砸暈咗…
我迷迷糊糊間淨係聽到…
…
「對唔住啊！」
…
「摩天大廈咁大隻嘅鬼爪啊！」
究竟…究竟發生乜事啊？
(待續)
下集預告︰
估唔到…估唔到…打贏鬼王嘅竟然係小倩…