米米蓮妖怪作品 -《旅行‧如此‧難以忘‧記 》(百集長篇): 第116集 ~ 欣︰「鬼王」第一次變身嚟喇！
第116集 ~ 欣︰「鬼王」第一次變身嚟喇！
係咪好好奇點解今集係我呢？
冇辦法啦，鬼叫阿明跌咗落深淵咩，都唔知佢返唔返到上嚟添啊？
(放心啦，我會同家明踩住七色彩雲嚟營救你哋嫁喇。)
咁浪漫呀？小倩，你就好啦。而我嘅輝輝就仲未趕到嚟…
上一次講到「先生」一拳打爆咗道外牆…
我哋出咗去一個大石殿度，石殿冇頂，見到漆黑嘅天空…
仲見到「鬼王」﹑「東歪」同「南轅」…
「鬼王」同之前一樣，血紅皮膚加上羚羊長角，仲有高大嘅身體…
「東歪」直頭冇變，同啞嘅一樣，仲喺度擺緊甫士…
「南轅」就一副狐假虎威樣…
而我哋竟然連再多一個幫手都冇…
好在，唔夠幾秒，阿狗佢哋就到咗，仲帶埋一個神秘人添…
一個禿頭，白髮，滿身肌肉，電光沿住身體閃爍嘅男人…
似乎唔少嘢，但係…
仲俾我哋見到「袋袋」佢…
佢俾人掛咗喺個十字架度半天吊…
家姐見到佢咁，已經喊到傻咗…
「哼，點啊？就憑你呢幾條蛋散，就想同「鬼王」作對？！會唔會太天真啊？」
「南轅」個死人頭真係好討厭…
「你都傻嘅，幾時有人同佢作對啫？踢波又係佢逼嘅，嚟呢度又係佢逼我哋嚟嘅，擺明就係佢自己攪屎棍，係都要搵人嚟打死自己，我懷疑佢有自殘傾向添啊！」
神秘人咁講，又好似講得啱噃，但係佢會唔會講嘢太掘？
「哈哈哈，咁都俾你知道添，我係有自殘傾向啊，咁又點啊？就睇吓你哋幫唔幫到我，打殘我囉，哈哈哈哈！」
「鬼王」仲要咁樣回應，擺明就係一個變態佬。
「唔講太多喇，你哋想一個個嚟，定係一次過嚟啊？」
「鬼王」企咗起身，向住我哋咁問。
「等我嚟啦！」神秘人咁講。
我同阿狗仲有D距離，所以問唔到佢，只有問吓「先生」，睇佢知唔知啦…
「先生，你知唔知個神秘人係邊個啊？」
「馬勒當拿。」
「馬勒當拿！？」
「你記唔記得我同你講過「五絕」當中仲有個「中神通」啊？佢個樣好似「馬勒當拿」，佢本人我估計應該已經完寂，但係我曾經聽過佢有一個「術」，個「術」可以將佢自己嘅靈力鎖起，仲可以一直喺人世間漂流。當感應到人間需要呢個力量，佢就會附喺某人嘅身體嚟運行，所以我估…呢個「中神通」嘅力量附咗喺呢個禿頭老師度。」
「咁…有佢咪打得贏「鬼王」囉！」
「希望係咁啦。」
「先生」咁答，好似連佢都覺得唔係太樂觀咁…
不過冇辦法喇，就睇「中神通」佢點打啦！
「通臂神拳！」
「中神通」迅間一拳就打埋去「鬼王」度…
「東歪」就一副睬你都唗氣嘅款，睇嚟唔會幫手…
「南轅」就擺明已經廢咗，淨係嚟睇戲嫁啫…
至於「鬼王」自己，竟然仲嚟得切一個奸笑先閃避呢一拳…
「赤煉神拳！」
「中神通」又一拳打埋去，但係又俾「鬼王」閃避咗…
「鋼鐵神拳！」
「巨樹神拳！」
「海量神拳！」
「赤煉神拳！」
「大地神拳！」
「通臂神拳！」
「兩儀神拳！」
「中神通」就係咁，一直唔停咁追打「鬼王」…
我哋班人就襯有時間，行返埋一齊先，「先生」就一直安慰家姐…
「阿狗，做乜你哋老師變咗做「中神通」嘅？」我問。
「「鐵拳」，即係而家嘅「中神通」佢俾「草帽呼子」嘅一個奸招打中，仲將佢拮到成個蜜蜂竇咁釘咗喺牆，本來九死一生，但係冇端端個天有條光柱射落「鐵拳」度，之後佢三兩吓手就打敗咗「千年石妖」，但係阿明佢就…俾「草帽呼子」攪到跌咗落深淵，而家生死未卜。」
「但係你咁講，係你覺得阿明佢仲有生還機會呀？因為正常人跌落深淵，根本實死冇生啦。」我再問。
「嚟度呢度，經歷咗咁多嘢，仲邊有可能用邏輯去諗丫，我淨係有個強烈感覺，我信阿明會返到嚟，仲會係我哋嘅救星。」
「我都有呢個感覺啊！」阿狗旁邊嘅阿妮都咁講。
「但係…頭先你話「中神通」三兩吓手就打敗「千年石妖」，咁點解而家又好似打得咁辛苦嘅，唔通「鬼王」仲要勁過「千年石妖」咁多？」
「丫，唔好意思，係誇張咗，其實係三兩萬吓手先啱。」
「吓？呢個唔係仲誇張咩？」
「我都唔知邊個先叫誇張，不過我意思係佢打「千年石妖」嗰陣已經係咁，唔知係咪「鐵拳」佢唔識用「中神通」嘅力量，所以好多時都打唔中對手，但係佢勁就勁在佢可以唔攰咁一直追打，直至打中致命嗰一拳。」
「哦，咁我都放心D。」
我隻手就依然摸住家姐背脊，眼就一直望住戰況…
「鋼鐵神拳！」
…「兩儀神拳！」「鐵拳」老師將一套神拳再出一次。
「你條禿頭佬，用腳得唔得啊？淨係識用拳！」「鬼王」一邊閃避一邊咁講。
唔知點解，佢咁講，我反而覺得佢真係開始對「中神通」嘅追打產生恐懼感咁。
「哼，你識條鋼咩？「神拳」梗係用拳嚟打嫁啦！」
佢雖然咁講，但係…
「鋼鐵神拳！」佢真係用腳啊呢次，仲…
(碰~！) 一腳踩中「鬼王」心口，將佢彈開九尺遠啊！
「你D…你D人類實用太狡猾喇！」
「又係你叫人用腳嘅，招式名冇變，我只係採納咗你嘅建議啫。」
「你老味，呢腳又真係幾重，不過而家應該係時候到我出招喇！」
「鬼王」講完呢句就即刻起返身，仲想出招添啊！
「你都真係戇膠膠嘅，你估拍戲咩？俾時間你反擊，我不如乘勝追擊！」
「中神通」再次追打「鬼王」，完全唔俾時間佢反擊…
「鋼鐵神拳！」
…「兩儀神拳！」「鐵拳」老師又再打出一套神拳。
佢又拳又腳咁，而家「鬼王」避得仲辛苦咗…
「哼，對你呢D陰險小人，唯有用呢D招啦！」
呢D說話竟然喺壞人把口出，真係覺得個世界變喇。
「鬼王」之後竟然…
「猴子偷桃！」
嘩，呢四個字實在太邪惡喇，塵世間應該冇一個男性會唔縮…
而「中神通」亦都真係稍為縮咗一吓…
「哈哈哈！係我時間喇！邪羊羚角﹒破壞衝擊！」
佢嘅一雙羚角好似充滿邪力咁，之後就撞向「中神通」…
(憑，憑！)
兩吓聲音，估唔到嘅係，「中神通」勁到赤手就捉實佢對羚角，仲…
「呢吓你仲唔食正？七拳歸一﹒七傷神拳！」
(嘭~！)「中神通」一拳將「鬼王」打到入咗牆…
………
全場靜咗十幾秒，之後…
「哈哈哈，估唔到你哋班人有D料，真係滿足到我自殘傾向，正啊喂！就俾你哋睇吓我變咗身嘅力量啦！咁就更加好玩喇！」
「鬼王」喺牆裡面行返出嚟，佢心口爆開咗個窿，兩隻角又斷咗…
「變型！」
講完呢兩個字，大家都睇住佢由一隻「羚羊」變成一隻「公牛」…
血紅色身體冇變，兩角重生，仲型成「公牛」一樣…
全身肌肉爆炸，仲勁過健美先生，加上而家佢成兩個人咁高大添…
(待續)
下集預告︰
「神拳丫嗱，我就俾你睇吓咩叫神拳！」
註解︰
(1) 馬勒當拿 — 踢波嘅，係阿根庭嘅球王，最出名係「上帝之手」。不過喺呢個故事度純粹想簡單直接咁形容「中神通」嘅外型，矮矮地肥肥地，皮膚偏黑，一頭攣毛。