米米蓮妖怪作品 -《旅行‧如此‧難以忘‧記 》(百集長篇): 第081集 ~ 欣︰個菜單咁怪嘅…
第081集 ~ 欣︰個菜單咁怪嘅…
根據「圍雞百科全書」，「媽祖」係海神嚟，喺江戶時代之前已經嚟過日本…
長崎縣、青森縣、橫濱等嘅地方都有「媽祖」嘅廟。
日本人叫佢做「天妃」，仲將佢同日本傳統神道結合…
建造「天妃神社」方便供奉佢。
而「河童」就係天神委派落嚟嘅使者，雖然外表醜樣…
但係法力無邊，屬於半神妖怪。
咩係「圍雞百科全書」！？如其名，就係一班好「雞」…
即係唔叻嘅人圍埋一齊，創製出嚟嘅一本百科全書…
正所謂「三個臭皮匠勝過一個諸葛亮」丫嘛。
所以，陳老師請「媽祖」上身大戰「河童」絕對就係一場水系大戰。
大戰嗰邊都留返俾現場嘅阿明講啦，我就講返我自己呢邊先。
我睇睇電話，原來「先生」一早發咗個短訊俾我。
「飛機延誤，可能今日都嚟唔切，萬事小心，要等我啊！」
冇辦法啦，不過有陳老師喺度，應該夠力保護我哋呱。
「男仔嚟架？做乜俾個咁嘅短訊你啊？」
輝輝佢呷醋喎，我梗係打蛇隨棍上啦。
「嘻嘻，你呷醋呀？係啊，佢對我好好嫁，你小心D佢氹走我添啊。」
「係啊，我呷醋啊，唔好啦，唔好俾佢氹走啦。」
佢仲咋晒嬌咁搖我隻手。
「好啦，睇吓你對我好唔好啦。」
之後，我哋食完嘢，淨返七個人就一齊出發。
………
嚟到呢度，覺得好怪，究竟呢度係遊戲機舖，定係寺院呢？咁多憎人嘅？
我都未知佢哋下一步係點，又唔知佢哋幾時先去搵「千年石妖」…
更加唔知點解要嚟呢度。
我就係咁，俟住輝輝咁望來望去，連佢哋講過乜我都唔知。
突然，家姐想扯我入去一個房度…
「唔好，聽你哋之前所講，裡面有條空間隧道，淨係佢哋兩個入去太危險，就喺度等齊人先啦。」
陳老師咁講，所以家姐都停咗落嚟，我哋就係喺度繼續唔知等乜。
…
「咦，你哋都嚟到喇，咁多人嘅？我以為得你兩個添。」
一位老人家同一個又高又肥嘅僧人行緊埋我哋度…
唔通佢哋就係輝輝之前所講嘅高人！？
睇嚟似喇，原來係要等佢哋，班僧人原來都係佢哋同伴嚟。
我哋齊人喇，正式出發！但係…
入到個房度，竟然有個女仔換緊衫，我咪即刻…
「輝輝，唔准睇啊！」噤住輝輝對眼囉。
個「肥高人」仲突然打暈咗個女仔，真係嚇死我啊！
其實我知佢係「虫節大師」，不過覺得叫佢「肥高人」得意D。
原來佢冇嘢嘅，只係將個女仔放埋一邊。
我哋就喺度，跟住老人家，即係「星」老前輩啊，一齊準備進入一條空間隧道。
輝輝叫我合埋眼，我咪跟住做囉。
……
耳邊突然傳嚟「呼呼~」兩聲，我一開眼，就已經到咗一個黑媽媽嘅地方…
仲好大霧添，睇嚟呢度似係「迷霧森林」喇。
「呢度就係「迷霧森林」喇？」
………
之後，跟住「肥高人」嘅僧人都留晒喺度，話要結「風雷天網」喎…
我哋就九個人一齊落去山坡。
…
輝輝佢扶住我摸黑慢慢咁行落山，感覺又好似幾浪漫噃，嘻嘻。
嚟到山坡下面，雖然大霧，但係明顯前面有一大堆…
妖魔鬼怪啊！
個場面好詭異恐怖，就連燈光都係由一大堆凌空飛起嘅白色紙燈籠發出嚟…
感覺的確好奇異。
呢度大約係十張檯乘廿張檯咁擺放，形成一個長方形…
大約有千幾隻妖魔鬼怪同幾百個人類。
唔知點解，我突然諗到，好似尋晚咁，人哋D妖怪可能只係想開心吓啫…
其實我哋係咪反而唔應該騷擾人哋呢？
所以我篤一篤「肥高人」就問︰—
「前輩，如果D妖怪冇做壞事，我哋係咪唔應該騷擾人哋啊？」
佢諗咗一諗，之後冇回答我，仲四圍望，之後…
(啪~！)
佢一吓打暈咗隻小妖怪，仲攞咗個菜單嚟俾我睇，我打開一睇…
係一個有多種語文嘅菜單，所以我選擇先睇中文。
"刁民內臟拼盤﹑清蒸百姓五官﹑人心清燉狗肺﹑屍油爆跪人皮﹑百福伴活人蹄…"
"肋骨碎頭髮卷﹑人紅大長壽麵﹑童子童女壽桃﹑千孔蓮蓬乳頭﹑人頭盛鮮果盤。"
「你諗吓佢哋捉幾多活人先可以做呢一餐？咁仲算唔算壞事做盡啊？」
「但係…人夠食其他動物啦…」
「Mmm…或者咁睇啦，你見到嘛，菜單有狗肺，人都唔會食啦，個「百福」又係講緊一百種唔同動物嘅腹，你話佢哋幾咁暴殄天物呢？」
佢答咗好似冇答一樣，不過，我覺得佢哋連小朋友同狗仔都濫殺…
肯定就唔會係好妖，所以我冇再問落去。
我再睇一睇菜單，發覺佢哋將「拼盤」譯做「PING PONG」…
「百姓」譯做「HUNDRED LAST NAME」，「屍油」譯做「C OIL」…
至於「百福」個「福」字就唔使講啦，佢咁譯法我都已經有殺人嘅衝動…
所以呢次行動我變得十分支持…
「咦，阿明呢？」陳老師突然問。
原來阿明一個人偷偷地行開咗。
「個死仔真係壞大事嘅，呢度希望兩位前輩睇住先啦，我要去睇睇佢個衰仔。」
陳老師講完就走咗去搵阿明。
「唔緊要，我哋依家睇定D先，俾D時間我D徒孫結好個網。」「老人家」講。
「呢度班妖怪好多都係被逼嚟啫，一陣打起上嚟，我估只有…」「肥高人」講。
「有邊D會出手嫁？講嚟聽吓！」「袋袋」插口問，家姐就及晒頭咁。
「左邊手一身道袍嘅鬍鬚佬，佢係「西斜」余二十，同檯嗰個又肥又矮嘅大冬瓜，佢係「南轅」袁丰田，大台上面呢度睇得唔係咁清楚嘅「千年石妖」，幫佢手製造「迷霧森林」嘅四隻妖怪，製造森林嘅「毒藤女妖」﹑營造環境嘅「迷霧天魔」﹑建造居室嘅「草帽呼子」同維護秩序嘅骷髏鬼阿頭「百刀鬼吼」，最少都有呢七隻嘢要打，仲有嗰一大堆人類跟班。」
我望吓大家嘅神情，似乎都冇晒信心咁。又係嘅，人哋淨係人類都成四五百人…
我哋計埋「肥高人」嘅徒弟都係得幾十人，加上人哋高手最少有七隻…
我哋就得返兩個。
「結好網喇！」
天上突然嚟咗一個巨網，好似將成個宴會場所變成另一個空間咁…
「哇丫~！」「依丫~！」「走呀~！」「救命呀~！」「哇~！」
D鬼怪都爭相走避，場面一時間真係好墟冚，好混亂啊！
(待續)
下集預告︰
巨型白獅！？