米米蓮妖怪作品 -《旅行‧如此‧難以忘‧記 》(百集長篇): 第080集 ~ 明︰我見到小倩喇！仲見到…河童！？點解佢好似唔同咗嘅？
第080集 ~ 明︰我見到小倩喇！仲見到…河童！？點解佢好似唔同咗嘅？
我呢邊上次講到大家仲喺間快餐店度，呢間快餐店我估應該得日本先至有…
佢個名我都唔識讀。
「光管陳」佢知道晒我哋D經歷之後，仲話會陪我哋去「迷霧森林」。
咦，多個高手幫拖，睇嚟我又可以放心D去搵小倩喇。
其實我一直都好擔心，唔知係咪睇電視電影太多呢…
總係覺得D「千年老妖」最鐘意就係逼人同佢成親。
加上小倩佢咁靚女，我驚隻「千年石妖」要逼小倩同佢一齊，到時就煩喇…
「我都想跟埋去睇吓隻「千年石妖」啊！」
阿欣突然咁嗌，佢呢一句嚇醒返胡思亂想中嘅我，希望小倩佢冇事啦。
之後，阿欣講咗佢D經歷出嚟，原來佢同佢家姐都經歷咗唔少嘢…
就因為咁，「光管陳」都批准埋佢哋一齊去。
好在，班死仔掛住買嘢食，冇一個知我哋幾個講過D乜嘢…
唔係佢哋肯定都想跟埋嚟。
我哋慢慢食完嘢之後，「光管陳」就打發佢哋班死仔走。
「我搵佢哋幾個去幫手買D嘢，你哋班衰仔就跟住Kenny返酒店啦，記得唔好離開酒店太遠啊。」
就係咁，等佢哋班死仔走咗。
我就同「光管陳」﹑阿輝﹑喪狗﹑大袋﹑阿欣﹑欣家姐…
七個人一齊出發去機舖嗰邊。
………
嚟到呢邊，我哋傻傻呆呆咁喺女更衣室門口等…
「唔好，聽你哋之前所講，裡面有條空間隧道，淨係佢哋兩個入去太危險，就喺度等齊人先啦。」
「光管陳」講呢句嘅時候，我睇到一個女職員行緊入去更衣室。
不過我冇提大家，因為一來我諗住「星」老前輩佢哋應該唔會咁早到…
二來佢哋好多係僧人，應該唔會咁猖狂直接入去呱。
點知一諗曹操，曹操就到。
「你哋都嚟到喇，咁多人嘅？我以為得你兩個添。」「星」老前輩嚟到咁講。
佢哋仲好疊馬咁，有成五六十人嫁，點知…
「大家唔使覺得誇張，因為我估計「余二十」同「袁丰田」會比我帶更多嘅徒弟出席「千年石妖」嘅壽宴，各二百個左右啦。」
我真係…俾佢激死，仲想鬧爆佢，明知人哋咁多人，自己就帶得嗰八分之一嘅人，唔係覺得自己嗰D可以一個打十個呀？
不過我諗諗吓，可能佢淨係得咁多徒弟呢，冇辦法啦。
我掛住諗嘢，完全唔記得咗同佢哋講更衣室有人…
仲估唔到佢哋仲大安旨意到咁，直接行咗入去…
「肥龍大師」見到個女職員一絲不掛咁，竟然一D驚訝都冇…
仲「啪」一聲就打暈咗個女職員…
之後仲幫佢披返件衫，放佢埋一邊，就同我哋一齊出發去「迷霧森林」。
佢嘅動作話俾我聽，佢一早就預咗呢個情況，做大事嘅人果然不拘小節。
「出發！」
………
「呼呼~」兩聲我哋就到咗「迷霧森林」。
「原來呢度都會天黑架？」
我見到天都黑晒，似乎係我第一次嚟到呢度將會經過嘅一個夜晚…
感覺好似呢度將會發生好多大事咁。
「肥龍大師」吩咐佢D徒弟留喺度…
我哋七個就跟「星」老前輩同「肥龍大師」行落山坡下面…
唔知點解，我總係覺得小倩可能有危險咁…
所以落到山坡下面，我第一時間就係視察周圍去搵小倩嘅蹤跡…
呢度好多妖魔鬼怪，但係我根本唔在乎，可能係因為有幾個高人喺我旁邊啦。
我搵勻全場都見唔到小倩，就算係「寶寶」同「沙婆婆」嘅蹤影都冇…
我好擔心，又驚佢哋會阻止我…
所以我淨係同「大袋」單咗聲就偷走咗去搵小倩。
佢哋似乎都未知我走開咗，冇人阻止我，我就係咁…
行返上山坡再直行返去「桂家村」。
………
返到「桂家村」，呢度好靜，成條大街都冇晒人…
應該係去晒「千年石妖」個壽宴…
我就喺度係咁四圍搵，終於見到紙窗木門後面有個女性身影…
個身形咁靚，我肯定係小倩啊！
「小倩！對唔住啊！」
… (佢冇回應)
「我買咗隻公仔送俾你啊！佢叫米米蓮啊！」
我唔敢驚動佢，只係對住紙窗木門嘅影講，但係佢一直冇回答。
「我唔識講嘢，但係希望你原諒我丫，我其實…不如我唱俾你聽丫。」
… (依然佢冇回應)
唔知點解，我見到而家嘅情況，就諗到上一世嘅一D景象…
所以我選擇唱呢首歌氹返佢…
「行近 ~ 我又怕驚動你 ~」我就係唔敢行近。
「我又怕心難SAY ~」死喇！走音！
「立DENGG~ 以後分離 ~」仲唔小心吞咗啖口水窒住咗添。
「嘻嘻 ~」小倩佢笑喇！但係…
「一生裡頭 ~ 誰是我的心中最美 ~」繼續唱先。
「往日的你 ~」
…
我見佢好似再冇反應，就想行近D…
「淨係往日咋！？」小倩佢突然大嗌，好似係有D意思嘅…
但係我一心只係諗住氹佢，冇諗其他。
「唔係，唔係，我唱過第二首丫。」
我一見到D霧，就諗起呢首，我都唔知啱唔啱唱俾小倩聽嫁，即管試吓啦…
「如霧起 ~ 暗暗蓋掩 ~ 身邊你 ~」
「像霧裡 ~ 面前幻化不定 ~」
「無法記起 ~ 以往那刻 ~ 你怎闖進我心裡 ~」
「還是愛著你 ~ 曾話愛著你 ~ 你永在我心 ~」
咦，唱到呢句，小倩好似有D反應噃，我即刻再大聲D咁唱。
「每次我望真你 ~ 每次我望真你 ~」
「你那眼光中 ~ 也都帶淚 ~」
「每次我望真你 ~ 每次我望真你 ~」
「你那眼中都有我 ~」
為咗再感動D，我夾硬唱多一句。
「而 ~ 我 ~ 那 ~ 眼中都 ~ 有你 ~」
唱完喇，出嚟喊住擁抱我啦！我心係咁諗。
「小倩！」我見到小倩佢終於肯行出嚟喇！但係…
「咦，河童！？但係…你做乜嘢啊？」
「家明，救我啊！」河童佢脅持住小倩啊！
「小倩！」
點解會咁嫁？佢唔係好妖嚟嫁咩？但係佢個樣好似有D唔同咁嘅。
「我唔知你記唔記得我，但係我就好記得你，係你阻住我同婉君喺埋一齊嫁！」河童竟然咁講。
我知道婉君即係小倩嘅上一世，我而家除咗發呆同擔心，根本唔知可以做乜。
「點啊？係咪好想打死我呢？而家我有能力，你冇，我就睇你可以點對付我？哈哈哈！」
我真係好想打死佢，但係又真係冇能力，究竟我應該點算好呢？唯有試試啦！
「九字護身法！蝦！」
(趴嘭趴啪趴趴趴趴趴~！) 全部打中晒佢！
但係…佢竟然完全冇事，對佢就好似搲痕一樣…
我已經完全冇辦法可以對付到佢，救到小倩，唯有…
死衝埋去啦！
「啪~」突然一隻強而有力嘅手阻止咗我。
「唔使急！你有我，等我對付佢啦！」
又係佢啊！我嘅救星，「光管陳」啊！呢一吓，我真係感動到想喊出嚟。
「邪體河童！就等我嚟會一會你啦！」
「哼！你乜水啊？」
「阿明，呢隻同你之前所見嘅河童唔同，佢哋本來係同一驅體嘅，但係正體河童已經俾河仙點化，而呢隻嘢…」
「就係俾正體河童逼離驅體嘅邪靈。至於點解同你上世嘅情敵有關，呢個我就唔知喇。不過佢係用水力量嘅妖怪，我對付佢，唔會太樂觀。」
的確，上次見識過正體河童嘅力量真係好勁，如果邪體呢隻都有相同力量…
咁樣「光管陳」真係唔容易對付到佢。
「睇嚟呢次，難打喇，我冇土系神明嘅聯絡方法，唯有用佢啦！海軍鬥水兵！」
我估佢意思係水鬥水，佢仲識講笑，睇嚟佢依然有信心打敗河童。
之後，佢又再次做出一連串請神動作 — 合眼﹑手印﹑踏地…
「海上女神，天上聖母，急急如律令，請媽祖顯靈，上徒兒我身，收服呢隻河中惡妖！」
(待續)
下集預告︰
刁民內臟拼盤﹑清蒸百姓五官﹑人心清燉狗肺…
註腳︰阿明唱到走音嗰嗰首歌係黎明嘅《對不起我愛你》，完整嗰首係譚詠倫嘅《霧之戀》