米米蓮妖怪作品 -《旅行‧如此‧難以忘‧記 》(百集長篇): 第082集 ~ 輝︰我要打「百刀鬼吼」喇！
第082集 ~ 輝︰我要打「百刀鬼吼」喇！
見到個菜單D菜式，真係有D嘔心，一個將人煎皮拆骨攞嚟食嘅菜單…
睇嚟佢哋唔係變態，就係好憎人類頂喇。
不過，我真係唔明點解「肋骨碎頭髮卷」會上得到宴會場合嘅檯…
擺明就係酷刑嚟啦，我講緊對食嘅人嚟講啊。
但係，話時話，佢哋又真係好似唔係人嚟噃，話唔定，佢哋真係好鍾意食添。
…
「咦，阿明呢？」「光管陳」咁問我先知阿明唔見咗。
之後，佢同「星」老前輩佢哋講咗聲，就走咗去搵阿明。
而我哋就聽「星」老前輩講，喺呢度等佢D徒孫整好個「風雷天網」。
………
「呢度班妖怪好多都係被逼嚟嫁啫，一陣打起上嚟，我估只有「西斜」﹑「南轅」﹑「千年石妖」﹑「毒藤女妖」﹑「迷霧天魔」﹑「草帽呼子」同「百刀鬼吼」要打，丫，仲有嗰一大堆人類跟班。」
聽到「大師」咁講，大家都你眼望我眼，似乎冇乜信心離得開呢度咁。
話晒人哋人又比我哋多，高手又俾我哋多，而家仲要…
「結好網喇！」
無啦啦個「風雷天網」都整好埋，即係逼我哋去死啫！
「天網」一出現，成千隻鬼怪嚇到「依哇鬼叫」咁，場面亂晒龍…
但係好奇怪噃，D鬼怪真係一陣就已經走晒…
係間中有一兩個頭俾其他「人」踩甩咗，留低咗喺地下啫…
我好似講到係好自然咁添。
唔怪得知「大師」話佢哋係被逼嚟嫁啦，佢哋就好似一早準備好晒抆水咁。
而家，我哋前面就淨返「大師」所講嘅嗰幾隻妖怪同埋一堆人類跟班…
不過睇嚟「星」老前輩個隱身網頂得吓，佢哋仲未見到我哋。
「風雷天網」底下嘅現場而家變得雷電交加…
但係D閃電淨係喺晒天上面，好似等緊劈落嚟咁…
…
「果然冇錯，就係淨返呢七隻妖怪同一堆廢人，你哋唔使驚，而家我哋主場！」
「大師」雖然咁講，我都明白佢意思係「風雷天網」製造咗一個對我哋有利嘅環境出嚟，但係…
人哋咁多人，真係蟻多可以摟死象啦，我哋點打啊？
…
「其實你哋冇理由會驚嫁喎，會驚嘅應該只有呢個小妹妹。」「星」老前輩摸摸欣欣個頭講。
「點解啊？」阿狗問咗我想問嘅嘢。
「你哋七個人，有「北鳳」後人，有靈犬護身，有靈貓護身，有靈狐護身，有老鬼護身，仲有邪靈護身，你哋使乜驚啊？」
「北鳳」後人即係「光管陳」啦，靈犬應該係「居居」，靈貓應該係欣欣提過喺佢家姐身嘅「荷瑪」…
靈狐唔通係阿妮跟住咗阿狗？老鬼就應該係「公公」啦，但係…
邪靈唔通係「大袋」身上已經有咗「酒吞童子」條蛇嘅邪力，佢會唔會有事架？
我真係有D擔心。
…
「前輩果然係前輩，我都想試試靈狐嘅力量有幾大，你哋又識唔識運用你哋身上嘅靈力啊？」
阿狗咁講，佢好似一早就識運用咁，佢條友真係…
唔知點形容，總係做乜都比人快，比人好咁，早洩例外。
「你識用就好，咁你揀隻嘢嚟單挑啦。」「星」老前輩咁講。
「迷霧天魔！佢個樣夠衰，見到就想打爆佢！」
「好！佢就由你負責啦，至於「草帽呼子」，雖然係隻強大嘅妖怪，但係性格孤僻，仲好怕醜，小妹妹你冇靈力，就你去同佢傾吓計啦。」
「大師」叫欣欣去用「美人計」，雖然我有少少擔心…
但係始終呢個已經係對欣欣嚟講最好最安全嘅位置，所以我唯有支持。
我拍拍欣欣膊頭，俾信心佢。
「好，我試吓啦。」
「好！咁而家淨返嘅就靈犬打「百刀鬼吼」，靈貓打「毒藤女妖」，邪靈打班躝坦廢人，明唔明？」
「邊個係邪靈啊？」「大袋」咁問。
「你啊！」
似乎大家都知，但係「大袋」個樣就好似好矛盾咁，我估佢係擔心自己會有事。
而我就聽「星」老前輩指示，準備同「居居」並肩作戰去打「百刀鬼吼」。
…
「哼，我都估到嫁喇，原來真係你哋。」佢哋班妖邪終於睇到我哋。
「千年石妖」亦都喺台上行緊落嚟，但係…
佢完全唔係電椅石像嗰個恐怖樣，仲…仲好似成個明星咁…
高大得嚟又型又靚仔，根本就係反町隆史咁款，乜唔係話越樣衰先越勁嫁咩？
「嘻嘻嘻，呢班咁嘅嘍囉，就等我同丰田兄去對付就得啦！」余二十懶醒咁講。
「柒位鳩手，狗養狗養！」「星」老前輩專登讀歪D，仲要強調D字眼，佢總係串串貢咁嘅。
「就等我嚟分場啦！蝦！蝦！蝦！」「大師」突然三個閃電彎刀打埋去。
「分工！」
「星」老前輩同「大師」就引導「西斜」﹑「南轅」同「千年石妖」上台對打。
阿狗就即刻…變身！？白毛？紅眼？狐耳？仲要變得咁高大靚仔，咁益佢！？
佢仲衝咗埋去「迷霧天魔」度…
「迷霧天魔」一身灰袍，頭尖額窄冇嚟貴格，鬍鬚尖尖，成個白粉友咁…
睇嚟阿狗有得贏。
呢邊欣家姐亦變咗隻貓，雙眼發光，貓耳利爪，速度奇快…
貶吓眼就衝咗埋去「毒藤女妖」度…
「毒藤女妖」就頗為妖艷，身材均勻，個樣仲幾靚，SORRY，淨係記得睇樣添…
總知佢個身有D樹藤咁，都似個高手嘅…
不過，我估佢頂唔順欣家姐嘅橫蠻，即係呢邊估計都OK。
但係我估唔到欣欣同「大袋」出手都比我快，欣欣就成個社工對住自閉青年咁即
行咗埋去同「草帽呼子」傾計…
嘩！「大袋」就爽囉，一個打四百個，不過佢又真係做到一拳一個…
一腳掃低幾個咁，睇嚟佢哋都好掂噃！
好！到我！
(吼~！)「居居」變身！
「巨型白獅！？」「百刀鬼吼」對住「居居」大嗌，似乎有D淆底。
我見佢咁，即刻就一吓跳上「居居」背脊，抆出皮帶…
將校章扣上皮帶最尾嗰度，再用「九字護身法」包喺皮帶外圍，變成我嘅武器。
「居居，衝啊！」
半秒之後，「百刀鬼吼」露出奸笑，仲突然…
分身啊！分咗幾十個身出嚟，每個都揸住兩把刀，難怪佢叫「百刀」啦。
而家，我同「居居」就係咁，俾呢幾十個「雙刀骷髏鬼」圍困住，點算好呢？
「汪~！汪~！」「居居」突然吠咗兩聲…
嗰幾十個「雙刀骷髏鬼」即刻郁都唔敢郁…
佢一爪噤低一隻，一爪又爪開幾隻咁…
而我就一鞭打爆一隻，再鞭發爆幾隻咁…
我哋合作無間，一陣就已經打死咗二三十隻…
但係似乎仲未打中「鬼吼」嘅真身。
仲弊嘅係…佢哋好似越打越多咁，再加上佢哋開始識得避開「居居」…
直接跳上嚟追打我…
我唯有學西部牛仔咁，係咁揈條皮帶，總算暫時可以保護到自己，但係…
咁樣揈法，我應該好快就會覺得手軟，點算好呢？
「吼~！」「居居」再次擘大口咆哮！
仲有隻好似蛋咁嘅嘢喺佢個口度走咗出嚟…
係「龍也」啊！但係…點解要咁樣出嚟啊？唔覺得嘔心嫁咩？
「龍也，小心啊！做乜嘢跟埋嚟啊？呢度唔係玩嫁！」
我雖然未至於覺得佢係負累，但係要擔心埋佢，真係覺得有D攰。
「哥哥，係叔叔佢要我嚟嫁，佢話唔好意思出面，呢把嘢係佢叫我攞俾你嫁。」
佢一講完就將一把三尖兩刃槍掟咗俾我，但係…
做乜嘢得個槍頭嫁？仲差D整傷埋我添啊，D刃咁鬼鋒利。
「佢咁嘅款，點用啊？」
「差D咩啊？」佢仲要問返我。
「冇咗條棍啊！」
「棍！？我明白我有乜用喇！輝哥哥，接棍！」
佢一講完，就喺褲浪抽咗D嘢出嚟，仲掟咗舊嘢上嚟…
但係我真係俾佢激奀，條棍臭嫁，仲要得條芝士腸咁短。
「龍也啊，唔好玩啦！」
我都未講完，一隻似乎相對力量較大嘅「雙刀骷髏鬼」跳埋我度…
唔知點解，呢一吓，我感應到佢就係「百刀鬼吼」嘅真身，但係…我可以點呢？
(吱依~~~！)
芝士腸突然好自然咁同三尖兩刃槍頭結合，仲發出金光同震蕩嘅聲音…
芝士腸伸長，變成鐵棍…
一支正式嘅三尖兩刃槍登場！仲…
「攀~！」一聲擋開「百刀鬼吼」嘅「骷髏十字斬」，再立即飛返埋我右手度…
我好自然咁一手握實佢，用力打橫一發，地下迅間爆出一條裂痕。
「勁啊！「鬼吼」丫喇！？我就要你變成「鬼膠」！」
「鬼吼」真身似乎想由「雙刀骷髏鬼」分身群中逃走，我當然即刻追返上去啦。
「居居，嗰邊啊！衝啊！」
我騎住「居居」衝咗大約一百米，一跑近「鬼吼」個背脊…
我就一吓跳起飛埋去，順便好自然咁作返個靚名俾我呢招…
「光輝碎月！」唔知大家啱唔啱聽呢？
不過唔理啱唔啱聽喇，我就係中正「百刀鬼吼」個背脊…
佢「嗚哇~」一聲迅間變成灰燼，一堆「雙刀骷髏鬼」分身亦跟住唔見晒…
…
「丫~！」
咦，欣欣把聲啊！乜事呢？
(待續)
下集預告︰
佢就係我孫新袍呀？個樣又幾標緻噃。
註腳︰呢集比較多廣東話術語，所以我解吓我意思啦︰
(1) 亂晒龍—形容情況混亂。
(2) 抆水—有兩個意思嘅，呢度嘅意思同「散水」有D似，又有另外一個講法叫「走佬」，簡單D嚟講即係離開咁解。
(3) 嘍囉—卒仔﹑廢物，睇唔起人嗰陣用嚟形容對手。
(4) 串串貢—同「臭串」意思差唔多，即係自大﹑囂張。
(5) 均勻—呢個唔知係咪廣東話術語，不過呢度意思係形容女仔身材有一定比例，有尚好嘅意思。
(6) 揈—音「FING」，「條條Fing」個「FING」。
(7) 激奀—書面語即係「氣壞了」。