米米蓮妖怪作品 -《旅行‧如此‧難以忘‧記 》(百集長篇): 第074集 ~ 明︰多愁善感嘅我終於揀啱用嚟氹返小倩嘅毛公仔喇！
第074集 ~ 明︰多愁善感嘅我終於揀啱用嚟氹返小倩嘅毛公仔喇！
阿輝真係丫，成日過度幻想…
尋晚又幻想我鏟斷條友隻腳同日本發生嘅怪事有關…
而家又幻想「大袋」咁打得係因為俾「酒吞童子」條蛇咬咗啖…
我真係完全唔明佢咩纙輯…
唔通真係俾條蛇咬親就會勁咗嫁咩？唔啱佢又俾條蛇咬返啖睇吓點？
我都廢事理太多佢D無謂幻想，所以，尋晚佢問到「即係點」，我都冇理佢…
佢嘅意思係話D鬼怪點錯相，所以唔追我，走去追佢喎。
之後，佢一個人死死地氣走返自己房，我就同「細鬼」返自已房。
返到去，我見未訓得，咪同「細鬼」傾咗陣計囉。
「細鬼你都睇到D鬼怪喇可？你擔唔擔心啊？」
「可以擔心D乜丫，得快樂時且快樂啦！」
… (佢咁回應，我呆咗兩秒)
「如果而家話走，點同人講啊？話見到鬼怪，好驚，所以要走啊？訓啦！你唔攰咩？」
佢又講得幾啱嘅，未見過鬼嘅人，總係有千萬個理由唔信有鬼…
真係估唔到「細鬼」條鹹蟲都幾睇得開噃。
夜闌人靜，我都變得好多愁善感，又擔心呢樣，又擔心嗰樣咁…
………
咦，原來我諗諗吓嘢訓咗都唔知，唔經唔覺已經到咗第二朝…
即係呢次旅行嘅第四日。
我起咗身，打開窗，望出去，深呼吸一啖，感受一吓陽光…
合埋雙眼，再感受一吓俾風輕輕吹嘅感覺，真係好正，好舒服…
「你條友係咪傻嫁？就嚟正午喇！你當仲好早啊？！」
「細鬼」原來一早已經起咗身。
「大家都喺樓下集合喇！快D洗面刷牙啦！」佢再講。
我嗱嗱聲就洗口浪面，換過件出街衫，好快就出咗門。
「阿公，出發喇！」
我差D唔記得咗阿公，不過佢又衰D嘅，原來仲訓緊，仲要訓喺床下底。
「係咪有孫新袍見啊？」佢仲蒙蒙鬆鬆咁。
「冇咁早啊，夜D先啦！」
我哋就咁出門喇。
………
落到樓下，我就見到一班一成不變嘅同學…
樣衰乞人憎嘅老師，死性不改嘅淫蟲校長，一副死樣咁嘅阿倫…
春風滿面嘅「喪狗」同阿妮，溫馨甜蜜嘅阿輝同阿欣，仲有…
玲瓏浮凸嘅欣家姐，同埋遍體鱗傷好返咗D嘅「大袋」…
但佢對住欣家姐個樣好似…唔同咗噃…
睇嚟佢尋晚又唔知發乜鹹夢發到忽咗喇！
我哋之後一齊出發…
………
好快就嚟到呢度，呢度係一條日本大阪嘅購物大街…
左右兩邊都佈滿行人，情景同香港D舊式地攤市場好似…
賣吓衫褲﹑賣吓波鞋﹑賣吓皮鞋﹑賣吓電話﹑賣吓小食﹑賣吓公仔﹑賣吓飾品…
真係乜都好似有得賣咁，款式比香港多，地方比香港整齊同乾淨…
有好多唔同嘅人喺度…
有搬運嘅大叔，有買賣嘅大嬸，有購物嘅遊客，有閒聊嘅年青人…
大叔D樣都係差唔多，都好老派，一件藍色背心…
頭上綁住條卷起嘅長毛巾，笑笑口咁搬運貨物，睇落去真係好熱血﹔
大嬸又係一式一樣，一條長衫裙，電咗個攣毛頭…
或者間中有D頭上有條絲帶紮住D頭髮咁，總係面帶微笑﹔
閒聊嘅年青人中，有男有女，我認真睇吓，其實並唔係好似電視劇咁好…
靚仔靚女比例真係唔會好得過香港，不過…
大多數都係彬彬有禮，談笑間，總係會點吓頭咁，佢哋呢D文化又真係幾得意﹔
至於遊客…咪就係我哋囉！
唔知係咪人大咗諗嘢都唔同咗呢？而家嘅我…
總係多愁善感，乜都諗一餐咁，好奇怪，但係…
反而覺得睇得身邊嘅事物更加清楚。
我就係咁一直跟住阿輝佢哋行。其實…
我個心係一直諗住今晚去見小倩，我想喺度買返份禮物送俾佢…
希望可以氹返佢。
但係班友仔就係咁一直喺度睇褲睇鞋，仲要行到冇雷公咁遠，山卡啦咁偏僻添…
我真係想自己一個人行就算，點知我想走嗰陣，喺度遇到一班攪事嘅日本學生…
我諗…最開心嘅應該係「大袋」啦…
可以借D倚抽咗吓阿欣家姐水之餘，仲有得表演俾佢睇，威吓…
不過，佢條死仔又真係打得幾好睇嘅…
佢三拳五腳一個閃身就將班日本仔攪掂晒。
「我頭先得唔得啊！？係咪好型啊？」佢咁問。
「OK嫁！真係幾型，我睇好你嫁！我行開一陣…」我咁答。
真係唔抵得佢個屎忽鬼樣啊，我都係決定自己一個人行吓好過…
我去睇吓D毛公仔先。
………
我行咗成幾個字都睇唔啱心水，最後終於見到間比較多毛公仔嘅舖頭。
我衝到埋去，見到隻幾得意嘅狗仔毛毛，咪執起嚟睇囉…
佢眼睛大大，D毛仲白雪雪添…
「汪 ~ 汪 ~ 汪 ~」
我頂佢個肺丫！原來係「居居」！學乜人炒起D前蔭，露返對大眼出嚟啊！？
「妖！」
我一吓就將佢掉低，再望去隔離…
見到隻好可愛嘅貓仔毛毛，咪順手執起嚟睇吓囉…
「貓 ~ 貓 ~ 貓 ~」點解呢隻貓叫到咁唔似貓嘅？
我頂！我都黐咗線添，呢隻係貓毛毛嚟家嘛，點會識出聲嫁！？
我心諗，唔通佢係發聲公仔？
所以我摷吓佢個身，試吓搵唔搵到個發聲制…
「哈哈哈，好痕啊！唔好再摷喇！」隻毛毛竟然講嘢！？
「何方妖孽！？」
「妖你媽媽個孽咩？我撩緊「居居」傾計嫁，係你過嚟攪我哋，阻住晒咋。你想知我係咩嘅話，就去問阿欣或者阿麗啦！」
佢梗係又係一隻妖怪，所以我冇理佢。
我再望遠少少，見到一隻又係白雪雪，有個大便頭…
個身一節節士啤呔咁，最得意係佢隻手伸起，好似講緊Sorry咁…
似乎好啱同小倩講對唔住用噃，所以我即刻就拿起佢，俾咗錢，買咗佢！仲
將佢改名為「米米蓮」。
(待續)
下集預告︰
我叫一反木棉，你哋D香港人叫我布先鋒！