米米蓮妖怪作品 -《旅行‧如此‧難以忘‧記 》(百集長篇): 第073集 ~ 輝︰要多謝阿倫，再睇大袋打功夫。
第073集 ~ 輝︰要多謝阿倫，再睇大袋打功夫。
我雖然擔心欣欣啫，但係冇理由入去女廁家嘛，加上有佢個惡死家姐喺度，肯定夠照啦！
何況…對手只係卷廁紙…
唉，算喇，都係講返自己嘢先。
上一次，講到我發現咗個秘密，就係原來決賽嗰場俾「傻佬明」鏟斷腳嗰條友…
唉，算喇，對死者，都係恭敬D好，嗰個男仔，因為斷咗隻腳，仲輸咗場比賽，一時睇唔開，就去咗自殺，仲死埋添。
唔知點解，我第一時間就覺得佢嘅死，同我哋呢次旅行咁驚險有關，所以我即刻就…
「阿妮，借呢份報紙我一用！」
「哦，好呀，你睇完就攞返嚟啦！」
我衝返去房搵佢哋班友…
「喂喂喂！你哋睇吓！」
我仲見到阿欣喺度添，如果班友唔係都係我嘅死黨，我肯定呷醋死，仲殺人依次。
「欣欣，你點解都喺度嘅？」作為人哋男友，循例都要問吓嘅。
「你哋睇吓呢段新聞丫！俾你個「傻佬明」鏟斷腳嗰條友呀！佢自殺死咗呀！」
「咩你唔知咩？你冇睇新聞架？」
「仲好攪笑添，佢有寫遺書，話係因為阿輝鏟斷佢隻腳，佢先自殺丫嘛，但係明明係「傻佬明」鏟斷佢腳。」
「即係點呀？」
我無奈到黐肺，唔係白痴到咁呀？點錯相！？呢一吓，我真係想殺死阿明！
好在，欣家姐嘅出現，救咗佢。
欣欣聽到聲就衝返去搵佢家姐。
「係唔係阿輝班友仔又攪你呀！？」
我心諗，班死仔夠膽點吓我阿欣，睇吓我會唔會閹咗佢哋！？
之後，見大家都冇嘢做，其實都好夜喇，我咪返自己房休息囉。
「喂，今日係咁喇，有咩聽日再講啦，我返房訓喇！」
………
返到自己房，我正想閂返埋門，點知…
一個…都幾靚嘅女仔頂住咗道門。
「小姐，乜嘢事呀？」我都嘗試望望自己個房門牌，不過確認係冇錯嘅。
「你唔記得人哋喇？」
「吓！？我識你架？」
「阿芙呀！」
「阿芙！？肥…」我差D就嗌咗「肥妹」出嚟。
「係呀！人哋好掛住你呀！等咗你成晚喇！」
「Eee…咁乜嘢事呀？」
「入去先講啦！」佢推咗我入房，仲閂埋度門，佢仲…
推咗我落床，企喺我面前，徐徐…咁除低…
咗條吊帶長裙，依家…(我吞咗啖口水)
呢次唔俾上次見鹹濕女鬼少嘢，因為呢度更靜，更封閉…
佢再慢慢除低埋…呀唉…而家…
女性赤裸裸嘅軀體更加貼近我眼前…
我…我嘅身體…真係…(又吞咗啖口水)…唔生性呀，尤其係「佢」…
「佢」充血充到實晒，死喇！死喇！點算好呀？睇嚟我要屈服喺佢淫威之下喇！
「你知唔知呀？頭先有個女仔自稱話係你女友喎，佢幾衰呀！」佢仲要用把超級嬌嗲嘅聲音咁講。
好在，佢一講到「女友」二字，欣欣同我錫錫嘅畫面就彈咗出嚟喇！我總算可以冷靜到…一秒咁多啦！
更好嘅係…第二秒，房門就突然打開咗，係阿倫返嚟呀！救星到喇！
我即刻衝出去捉住阿倫，「肥妹鬼」，唔啱，而家應該叫「妹妹鬼」，佢都跟咗埋嚟，想一手扯我返去…
我即刻嚟個「成昆大挪移」，冇計，我覺得自己真係衰過「成昆」，我將阿倫隻手轉咗俾「妹妹鬼」捉住…
而我自己就…
衝咗出門口，仲好自然咁閂埋咗道門添…
「嘭~！」
唔好意思呀，阿倫！不過…
希望你快樂啦！
過咗一陣，竟然冇晒動靜，我咪試吓俟埋道門度偷聽返吓囉…
「Eee…小姐，唔好意思呀，係咪阿輝佢蝦你呀？」
「唔係呀！唔好理佢喇！你…有冇人話過你好似Alan呀？」把聲好似…咁姣嘅。
「吓！？你講…明星嗰個阿麟！？」
「係呀！D香港人鍾意Leslie就唔會鍾意Alan架，但係我唔同，我兩個都好鍾意，比起阿輝似Leslie，你好似…」
「似咩呀？」
「仲更加似Alan呀！你好靚仔呀！不如…今晚就等小女子嚟服侍你丫。」
嘩！似乎我做咗件好事噃！我都係求其搵個房訓算喇。恭喜晒！
嘻嘻，不過我一諗起「肥妹」本來個樣就想笑喇，我係咪好衰呀？
………
我都唔記得自己去咗邊度訓喇，訓醒就求其搵咗個地方梳洗吓就去咗搵返阿明…
問佢借件衫，借條褲都好丫嘛，費事打攪阿倫同「肥妹」啦。
換完衫褲又出發喇喎…
………
落到樓下，見到欣欣化咗少少妝，咪讚吓佢，等佢開心吓囉，不過，其實佢唔化都一樣咁靚啦。
「欣欣，你今日好靚呀！」
見到佢開心，我都覺得好開心。
班死仔就撩佢家姐，其實…除咗用發姣兩個字嚟形容，我真係唔明點解佢要咁著。
我仲見到…「光管陳」佢好似好輕鬆咁，佢唔知係咪尋晚都發生咗D開心事呢？
我望一望大家。咦，阿倫喺度噃，點解…佢個樣…好似咁慘咁嘅？
我再望一望後面，近櫃檯阿妮嘅旁邊，我即刻明晒，我真係…
對唔住呀，阿倫！我見到「肥妹」變返原狀囉，唉…真係人間悲劇。
………
我哋之後一齊出發，跟咗「鐵拳」去一條大街度睇吓嘢，買吓嘢咁…
我同欣欣﹑欣家姐，仲有「大袋」同阿明一齊行，阿明就話好似有D心事咁，所以求其跟我哋行啫。
「大袋」條友又唔知做乜跟埋嚟，唔好話我話佢丫，佢肯定係「被虐待狂」，仲肯定係「生滋貓入眼」…
佢睇中咗阿欣家姐啦！
我哋就係咁一直行吓睇吓咁，死人「大袋」見到D男人望住欣家姐，仲好似想打人咁款，佢個樣真係好Q低能。
我哋行到去D冇乜人嘅餔位，欣欣似乎睇啱咗條牛仔褲，我哋咪入去講價囉。點知…
有五條架仔學生，突然行埋去欣家姐度，仲想非禮佢。
兩個係「金毛瘦骨仙」，兩個頭髮長長，遮到鼻樑，仲有個大肥仔，真係一般壞人必備組合…
我諗「大袋」條死仔都等咗呢個機會好耐喇，仲唔嚟招「英雄救美」！？
為咗佢嘅前途，我係唔會出手幫架！
點知個衰仔唔生性，一出手就錯喇！咦，咪住，個死仔係咪專登架！？
佢一吓揸咗落欣家姐個心口度，呢吓爽囉，可惜換來嘅係…
一巴掌，仲俾欣家姐打到飛埋我腳邊添，你話佢醜唔醜丫！？
唉…欣家姐果然潑辣，仲一腳踢走咗個死肥仔，睇嚟「大袋」嘅「英雄救美」都係唔成功架喇！
不過…似乎仲有一線生機，班架仔突然好齊心，一湧而上，仲捉得住欣家姐佢添，睇嚟係時候喇！
「放開佢！唔係我啫都切咗你哋！」
我真係唔明佢嗌乜，人哋點會識聽先得架，留返啖氣開拖啦！
不過佢都總算有返個型，唔失威，睇嚟我都要出吓手幫吓喇，但係…
我見住佢…一步踏前，一個直拳…
「龐」一聲，一個「長髮」應聲倒地…
另外，兩條「金毛」想出手幫拖，「大袋」再嚟一個左勾拳，「噗」一聲，又一個冧低…
再轉身閃過「金毛」攻擊，順勢一個鞭搥，「碰」一聲，又訓低埋…
原來「大袋」成日話自己打爛仔交打大係真架喎！真係好勁呀！出手快！狠！準！
「BRUCE LEE！？」
班架仔已經淆淆地，但係仲想盡地一舖，一齊衝埋「大袋」度…
嘩！使唔使真係咁李小龍呀！？「大袋」佢一腳踩到肥仔心口，借力彈起身，一腳橫掃踢頭…
最少踢中兩三個頭，一落地，隨即又再單腳彈起，轉身又橫掃一腳，之後落地，再斜身連環三腳…
「呯~！嘭~！噗~！」
踢到五個架仔訓晒喺地，個肥仔仲要俾佢踢到爆晒缸。
俾人打到咁，班架仔當然走夾唔抖啦！
可能男仔打交打到拳拳到肉啦，好似嚇親欣欣添。
「欣欣，不如你去個洗手間，洗洗個面先丫！」
之後佢家姐就陪咗佢去，我哋D男仔就喺度等。
「喂，阿輝，我頭先得唔得呀！？係咪好型呀？」
「如果冇咗第一吓「揸波龍爪手」會好好多囉，不過…我睇你都有行架喇，畢竟…英雄救美噃！」
「OK架！真係幾型，我睇好你架！我行開一陣，買D嘢先，你哋等D女仔啦！」阿明終於出吓口。
我見欣欣佢哋未出嚟，咪再同「大袋」傾吓閒計囉。
「係噃，你學過功夫架？咁勁嘅？」
「唔係呀，不過真係由細打爛仔交打大咋，但係…」
「但係咩呀？」
「我覺得好似唔係太正常，好似…突然好大力量咁。」
「我諗係愛情嘅魔力啫。」
雖然我咁講，但係…我突然諗起，「大袋」尋日咪俾「酒吞童子」條蛇咬過嘅，唔知有冇關係嘅呢？
(待續)
下集預告︰
「貓~ 貓~ 貓~」點解呢隻貓叫到咁唔似貓嘅？