米米蓮妖怪作品 -《旅行‧如此‧難以忘‧記 》(百集長篇): 第075集 ~ 欣︰我都有隻毛毛狗，不過要同「紙妖」傾完計先見到。
第075集 ~ 欣︰我都有隻毛毛狗，不過要同「紙妖」傾完計先見到。
米米蓮，米米蓮！
原來佢唔似「荷瑪」同「居居」咁，佢係唔識出聲架喎…
(咁人哋真係毛公仔嚟，唔係妖怪嚟丫嘛。)
妖怪！？而家我面前呢隻就真係妖怪喇！
好在，佢怪極都係一張紙，但係…
其實佢究竟係張紙定係塊布呢？
「你…你想點呀？」
「嘻嘻嘻~」
我完全唔明佢笑乜，講嘢就講啦，最多我聽唔明架啫。
我之後仲用埋日文同英文問佢「想點」。結果…
佢同我講廣東話。
「我有料爆，你想唔想買？」
呢度係洗手間，佢話有料爆，我第一時間係以為佢講緊肥田料。
「唔要喇！留返俾你自己啦！」
「真係唔要！？正料嚟架喎！」
「細妹！你同邊個講緊嘢呀？」家姐都聽到我個廁格有聲，就喺出面問入嚟。
「冇呀！同隻妖怪傾緊計喳嘛！」
「妖怪！？細妹退後！」
「嘭~！」
家姐緊張到一腳就踩開咗道門。
佢仲諗都冇諗，一見到隻…
「紙妖」，呢個名似乎幾啱隻妖怪，就咁叫佢啦，家姐兜腳就伸咗佢埋牆…
再連環十二巴打埋去，打到隻「紙妖」由白色變成灰色，估計應該係因為家姐隻手未抹乾淨。
「夠膽蝦我細妹！？」
「女俠，饒命呀！」
「快D講！你姓乜名乜住喺邊一忽？做乜喺女廁偷窺？」
「冤枉呀，大老爺…」
之後家姐再連環十三巴打埋去…
「大老爺丫嗱！？」
「啞啞啞…對唔住呀，靚女…其實…其實我都係女性嚟架，我叫…」
「叫咩呀！？」
「我叫一反木棉，你哋D香港人叫我布先鋒！」
「好似好威咁噃！？」
「唔敢喇！唔敢喇！我都係想賣吓情報啫。」
原來佢講嘅「料」係講緊情報喎…
「情報！？呢度係日本，有乜嘢情報會關我哋事呀？」
「我都話過你架啦，如果我俾力量你！？而家隻「木棉」肯定死咗啦！」「荷瑪」突然出口話家姐。
家姐個樣尷尬之餘，仲有少少唔忿氣咁。隻「紙妖」見到家姐似乎暫時唔會再打佢就回答我嘅問題。
「我係妖怪界嘅「專業二五…女」，所以我識好多地方嘅語言，情報嘅嘢，當然係秘密啦，不過有錢就唔同咁講。」
………
大家都呆咗，靜咗一陣，因為我哋都唔覺得有乜情報我哋係需要知…
「D情報係關你哋事架！Eee…應該講話係關你哋嗰團嘅人事先啱！」
我突然有D興趣…
「你講少少嚟聽吓先，唔係我點知有冇用呀？」
「好好好，就當係拋磚引玉，呢條大街，有間古玩店，有隻銅雞，俾邪氣入侵咗，你哋自己小心啦！」
我﹑家姐同「荷瑪」都一線眼咁望住佢…
「咁關我哋乜嘢事呀？」我哋三個一齊問。
「會有關架！不過…唉…都係算喇！講個勁料俾你哋聽喇！我喺香港收風返嚟嘅，話你哋團人當中有D嘢…」
「咩嘢呀？」似乎大家都擔心真係有問題咁，大家都好想知。點知…
「唔講！除非你哋出得起錢啦！我要三百萬円！」我哋點可能有咁多錢噃！
我望一望家姐，家姐同「荷瑪」都準備好喇，準備好出手喇！
「你打死我都唔會講架喇！」「紙妖」竟然咁講，我哋都冇晒佢乎，但係又好想知噃，點算好呢？
突然，家姐個樣變得好奸，仲左手放喺心口個領位度，摸吓摸吓咁，再輕輕力借D倚咁拉低個V字位，佢…
就連成條「罅罅」都露晒出嚟，究竟家姐想點呀？「紙妖」話佢自己係女性嚟架喎，呢招對佢有用咩？
「係咪好想睇呢？如果你講俾我哋聽，我就俾你睇。」家姐仲要陰聲細氣，姣到出晒汁咁講。估唔到…
隻「紙妖」真係流晒口水，對眼仲想凸出嚟咁滯…但係，佢仲未肯講D料俾我哋知。
「如果你肯講嘅話，我細妹嗰度都俾埋你睇丫，點呀？」
佢呢句真係嚇死人兼激死人呀！
「家姐呀！」
點知隻「紙妖」真係望埋我心口度，我當然即刻唵住啦！
「好呀，好呀，好呀！係咁嘅…你哋當中有人係隱居多年嘅「北轍」，田育文，嘻嘻嘻。」佢個樣真係好鹹濕呀！
「「北轍」！？咩嚟架？佢想點呀？你講晒俾我哋聽，你先有得睇。」
「好好好！「南轅北轍」係兩個人嚟，佢哋都係邪術師，至於佢係咩原因跟住你哋，我就唔知喇，不過唔方會係好事啦。」
「講完晒啦嘛？」
「講完喇，係咪可以睇喇？」衰人鹹濕鬼！
做人要信守承諾，我…我唯有…慢慢拉開…
「細妹，你傻咗呀？真係俾佢睇！？」
家姐一腳就將「紙妖」踩咗埋牆…
「哎吔！你…你唔守承諾…」
「對你呢D衰鬼使乜守承諾呀！何況你都爽完啦，我俾你睇咗一眼。再加上我都未話你呀，講大話，呃我哋！」
呃我哋！？唔通意思係佢D情報係假嘅？
「呃我哋話自己係女性呀？頭先我見到你偷睇細妹心口條罅，仲睇到下面有條紙條飛起咗，我都覺得奇怪喇…」
原來係講緊「紙妖」話自己係女性係大話。
「所以我就拉低件衫試吓你，點知你真係講大話呃我哋，即係你入女廁偷窺啦，我識河童Pakka架！你係咪想我叫佢拉你呀？」
「Pakka！？唔好呀，唔好呀！」
佢好似好驚Pakka咁噃，所以我都唔執輸，要佢幫我哋做多D嘢。
「你唔想我哋叫佢拉你都得，你快D幫我哋搵埋「北轍」佢究竟係我哋團嘅邊一個人？仲有，佢究竟想點？」
「哦，遵命，咁…女俠…我可以走未呀？」
「走啦！唔好諗住走佬呀！限你今日之內交料！」
講完之後，佢驚到即刻轉身就喺窗口飛走咗…
「你哋兩姊妹真係得人驚。」「荷瑪」一邊望住隻「紙妖」飛走，一邊咁講。
………
我哋洗個手，就返出去搵輝輝佢哋。
「頭先…多謝噃！」家姐竟然開口同「袋袋」佢講多謝，仲要怕怕醜醜咁，睇嚟又一段可歌可泣，驚人動地嘅愛情就係咁，要出現喇！
「欣欣，不如我哋自己行開唔好阻住佢哋丫。」
輝輝佢咁樣提出，我本身都想即刻和應，但係我都係先講咗頭先喺洗手間發生嘅嘢俾佢哋知先。
………
講完之後，雖然大家都有D擔心，但係可能呢D怪事佢哋都習慣咗啦，所以都冇太用心去理。
反而，我同輝輝見到家姐同「袋袋」傾緊計，咪借D倚靜靜雞咁兩個自己行開囉，等佢哋都有D空間丫嘛。
我哋兩個行開咗之後，我行行吓，見到輝輝膊頭上面有隻白色狗仔，佢好得意架，D毛毛長到遮住晒對眼。
「輝輝，隻狗仔係？」
「咦，欣欣你都睇到咩？」佢呆咗一陣…
「哈哈，我介紹你識丫，佢叫戇居居呀！哈哈，其實係居居先啱。」
「佢好得意呀！我可唔可以抱吓佢呀？」
之後，輝輝將佢俾咗我抱住，「居居」佢真係好乖，好得意，我摷佢個身，佢會好多動作架。
輝輝幾衰呀，唔知邊度嚟D啫喱，佢將「居居」前面D毛毛炒起晒，露返對大眼出嚟，個樣好攪笑呀。
仲…突然…喺間舖頭度放低咗「居居」…
「居居，你喺度休息吓先！」之後佢拉咗我去河邊…
我哋就係咁，坐咗喺D石壆度，我哋都好靜咁望住條河，D河水好靚架，景色又靚，加上柔和嘅清風吹埋嚟，真係好舒服…
突然，「吮」一聲，輝輝佢鍚咗我塊面珠一啖…
我當場紅晒塊面，淨係怕怕醜醜咁望住輝輝，點知佢…
佢再用佢個嘴錫落我個嘴度…我…我…淨係…
覺得輝輝佢個嘴唇好軟，好溫柔呀~~~
「喂！阿張出咗事呀！俾個癲佬脅持咗呀！」遠處傳嚟一把咁嘅聲音。
(待續)
下集預告︰
估唔到…原來條死淫蟲…係咁…