米米蓮妖怪作品 -《旅行‧如此‧難以忘‧記 》(百集長篇): 第072集 ~ 欣︰13樓OK！阿狗OK！家姐都OK！不過我就…
第072集 ~ 欣︰13樓OK！阿狗OK！家姐都OK！不過我就…
阿明…你…有冇講錯呀？我係…你「女神」？
(故事裡面你唔可以知架，快D扮唔知啦！)
哦…哦，OK！咁我講返Pakka出現啦。
應該係佢唔俾雪女出手，我見佢嘅出現令全部人都停落嚟，所以我就襯呢個時間走返埋陳老師嗰邊。
Pakka佢問咗一句，有個會講國語嘅傳教士就回應一句「自古正邪不倆立」。
唔知係咪有D乜嘢背後嘅故事呢？陳老師聽到呢句就即刻一步踏前，一掌打埋去呢個傳教士塊面度…
「啪」一聲，好大聲，我都俾佢嚇親，而個傳教士就當場暈咗。
「高手！你唔好咁嬲嬲豬住，呢度我地頭，等我處理就好。」Pakka咁講。
之後，一個傳教士用英文鬧陳老師，仲話我哋都係怪物，要將我哋都一齊攪掂，仲講晒粗口咁添。
佢哋仲…攞咗好多武器出嚟…
好在，Pakka原來真係好勁架，一吓就整到全場水浸，呢招好似叫「水淹金山」。
陳老師原來都識法術，我突然諗起「先生」曾經講過「北鳳」係喺輝輝學校教書嘅，唔通就係佢！？
Pakka見班傳教士好似唔妥協，就收返晒D水，仲用埋另一招打佢哋添…
咦！咁肉酸架！佢…佢好醜怪呀！用D噓噓射人哋都有嘅，我噤住咗雙眼唔敢睇。
「靚仔河童，轟天水炮！」
咦！Pakka佢係都要再用多次添噃！攪到人哋好尷尬啊！
但係點都好啦，班傳教士真係俾佢攪掂晒，呢度總算平靜返落嚟。
「你哋唔使驚喇！清潔吓就繼續玩啦，不過夜晚唔好玩咁嘈，仲有，唔好好似頭先嗰兩隻酒鬼咁，飲醉酒就去騷擾人類呀，明唔明？」
原來之前嗰兩隻鬼都係因為飲醉酒先攪人類架咋喎，所以話呢，飲酒真係會亂性架，尤其是揸車嘅朋友，飲咗酒就唔好揸車喇。
好似幫人賣廣告咁添，嘻嘻…
「係呀，Pakka佢係警察嚟架，係嚟幫我哋架。」我聽到陳老師講Pakka係好人，我咪加把口囉。
之後，D鬼怪就幫手整理返現場，Pakka就處理返D傳教士…
我見我哋喺度都冇乜嘢好做，咪同Pakka講聲再見，就同阿明同佢朋友一齊落返樓下搵輝輝囉。
………
返到落去，突然聽到有人喺房嗌「救命」，阿明就即刻帶我哋衝咗去個房嘅門口…
門口亦都啱啱好時間開埋，原來係「袋袋」呀，佢乜嘢事要嗌「救命」呢？
「死人喪狗，真係就變死人喇，快D嚟睇佢最後一面啦！」
我哋即刻衝咗入去睇佢最後一面，啋啋啋啋啋，LUR口水講過，入去睇吓佢咋…
我見到阿狗佢好似俾鬼上身咁…
「佢係咪俾鬼上身呀！？定係有咩病呀！？」
佢個樣好似痛苦咁。
「丫~！丫~！」
「喂！唔好死住呀！最多我帶你去叫雞丫！」
之後…阿狗就醒返喇，咩D男仔真係咁鍾意出去滾架咩？
「阿狗，你冇事啦嘛？」
「冇事，啱啱傾掂數。」
我心諗，傾掂數！？同邊個傾？傾咩數呀？佢係咪未清醒呢？
之後，大家就陪佢傾咗陣計，希望佢清醒返啦。
我見咁夜，都諗住返房訓喇，聽日先搵輝輝啦，點知…
「喂喂喂！你哋睇吓！」係輝輝呀！
「欣欣，你點解都喺度嘅？」唔答佢，等佢呷吓醋先。
點知佢竟然無視我，衰人丫！嬲死你呀！
「細妹！細妹！細妹！細妹！」房外傳嚟家姐把聲。
「BYEBYE喇！」我嬲嬲地就衝返出去搵家姐。
「係唔係阿輝班友仔又攪你呀！？」家姐咁問。
「係呀！佢攪到人哋唔開心呀！」
我回應完家姐，就即刻走咗，唔知家姐係咪有咩誤會呢？一直問我佢哋攪過D咩令我唔開心喎。
返到入房，沖個涼，寫個日記…
第一日嚟到日本，又食過達叔請嘅日本嘢，又見過呢度D日本人同「物」，仲見到輝輝佢安全，今日都算唔錯丫…
我寫完日記就去咗覺覺豬嚧。
………
可能尋晚太夜訓喇，我同家姐都訓到好晏，起身都差唔多成十一點，食唔到早餐…
「啪啪啪，啪啪啪~」
「阿欣，我係陳老師呀！」
我叫家姐著返好D衫，之後我就去開門。
「陳老師，咩事呀？」
「我哋今日會自由活動嘅，不過都會先一齊去一個購物點買吓嘢，你哋一唔一齊去呀？」
「好呀！幾點？喺邊度集合呀？」
「十二點啦，喺樓下大堂集合丫！」
「OK！」
之後陳老師離開咗，我同家姐就著返件靚衫…
化妝！？我哋呢D天生麗質，兩姊妹都唔使化嘅，不過…
一陣會見輝輝，仲會見到佢D朋友，都係用返少少潤唇膏，打返少少粉底，劃返少少眼線…
「細妹！行得未呀？」家姐又催人喇，咁人哋要見人丫嘛。
我哋就係咁去咗樓下同大家集合。
「欣欣，你今日好靚呀！」
聽到輝輝咁讚我，我都不知幾開心，總算冇白費時間化妝，就原諒佢尋晚無視我啦。
「嘩！你著成咁，我哋班善良單純嘅同學就忍到啫，唔知D日本仔忍唔忍到架喎！」
「袋袋」佢咁話家姐，不過家姐冇理佢，之後佢哋都仲有幾個同學撩過家姐，不過家姐佢又真係…
著咗件緊身衫，加條熱褲，真係有D過份性感嘅。我就唔同啦，要俾面輝輝丫嘛，我著咗條吊帶裙咋。
………
我哋好快就出咗發，仲好快咁去到呢個購物大道，呢度好多潮流衫褲架，比起香港仲多款式，真係睇都睇唔晒呀。
阿妮都請咗假，跟埋阿狗嚟，佢沿途都蹺住阿狗隻手，真係羨煞旁人呀。
最衰家姐喺度啦，唔係我都想蹺住輝輝隻手。
我同輝輝﹑家姐﹑袋袋﹑阿明，五個人一齊行開咗，自己睇吓嘢咁…
沿途真係如「袋袋」所料，真係唔少男仕目光望住家姐…
不過大家都冇理太多，行到去D邊邊位度睇嘢，即係冇乜人嘅餔位呀。
我同輝輝去咗揀牛仔褲，阿明同「袋袋」就睇吓D波鞋咁，點知…
「!@#$%^！」有五六個日本男學生突然行埋企喺路中心嘅家姐度撩家姐。
有個肥佬捉住咗家姐，仲想胸襲佢呀！
我見到…「袋袋」佢即刻衝前去，擋住咗個肥佬隻手，但係…
佢用手背擋，結果俾個肥佬隻手打咗埋去家姐個心口度。
「你條死鹹蟲！揸我個胸！？」家姐一巴打落「袋袋」塊面度，佢即刻飛開咗。
家姐再順勢一個提腿，踢落去肥佬個頭度。家姐都打得吓架，唔係平時點保護我呀，不過…
另外幾個男學生一湧而上，捉住咗家姐，仲想…
「放開佢！唔係我X都切咗你哋！」「袋袋」大嗌。
個「X」字我唔敢講，不過俾家姐打咗一巴塊面都紅晒嘅「袋袋」咁嘅樣，又好似幾有型噃。
之後佢一步踏前…一個直拳…
………
咦，男仔打交，拳拳到肉，睇到我都有D心寒，我都係唔講喇，等輝輝下集講啦，總言之，大家之後都冇事，繼續行街。
而我就要去一吓洗手間…
我本來都唔想講洗手間呢部份嘅內容，因為始終有D醜怪丫嘛，但係…因為「佢」…
我去完之後，想攞D廁紙啦，點知…
我隻手俾卷廁紙捉住咗，冇錯，我冇講錯，大家都冇聽錯，真係卷廁紙捉住咗我隻手，仲好實添…
一隻…紅眼，冇口，冇鼻，淨係得對手嘅白色大紙怪喺我面前出現…
「哇丫！」
「你…你想點呀？」
「嘻嘻嘻~」
(待續)
下集預告︰
「BRUCE LEE！？」